Heblu 8 - Chahta Holisso Holitopa 1886

Klaist ak osh na holitompa isht ʋtta i̱ shahli bilia, yohmi ka Klaist ʋt ʋla ha yokʋno Alon isht ai unchululi kʋt na holitompa isht ʋtta ʋlhtoka he keyu mak oke, 1: 7 yʋmmak inli chohmit Chihowa yʋt nan ʋlhpisa himona ikbi ha yokʋno Islael ʋt Echip a kohchʋt minti ma, nan ʋlhpisa toba tok ʋt kashofʋt taha hoke.

¹ Nana isht il anumpohonli kash puta ka ilʋppak osh moma i̱ shahlishke: Na holitompa isht ʋtta chinto yakohmi hosh ʋba yakni Chihowa Chitokaka yʋt a binili kak o̱ isht impak imma yo̱ pi̱ binili hosh;

² Ʋba aholitopa, micha ʋlhtipo ai a̱hli fehna ka hatak ak atok keyu, amba Chitokaka yak osh ikbi tok, yʋmmak o̱ nan isht ai ahanta hoke.

³ Yohmi ka na holitompa isht ʋtta chinto puta kʋt na hʋlbina, micha nan ai ashʋchi isht ʋlhtoba puta aiena pit im issa chi̱ hosh ʋlhtoka chatuk oka; hatak ilʋppak kia anonti nana im ai asha tuk osh pit im issa he im ʋlhpiesa hoke.

⁴ Yohmi kʋt yakni ilʋppak o̱ ahanta hokmʋt, na holitompa isht ʋtta ya hi o̱ keyu, ʋba nan ʋlhpisa yak atuk pulla mak o̱ na hʋlbina pit im issa hosh na holitompa isht ʋtta ʋhleha hʋt ai asha hoka:

⁵ Yʋmmak okʋt nan isht ahanta kʋt ʋba yakni nana ai asha kak o̱ isht ʋlhpisa, micha isht a hoyulba mak o̱ isht ai yʋmihchi hoke: yohmi ka Moses ʋt ʋlhtipo ya̱ ikba chi̱kma, Chihowa hʋt nan i̱ miha kʋt, Ahah! ahnit nan isht a holba nʋnih paknaka chim ai otʋni tok ak o̱ chiyuhmi ho̱ nan oklu̱ha ka ish ikbashke, achi tok oka.

⁶ Yohmi tok kia himonasi hokʋno yʋmmak okʋt nan it im ʋlhpisa achukma i̱ shahli, nana achukma i̱ shahli annoho̱wa puta isht ai a̱hli tok a̱, it i̱ nanaiyʋchi yosh nan isht ai ʋtta holitopa i̱ shahli fehna ho̱ ieshi mak inlishke.

⁷ Yohmi ka nan it im ʋlhpisa ʋmmona yʋmmʋt nan isht ik o̱no iksho hatok okma, anonti atu̱kla kʋt ai yʋmohma hi ya̱ hoya hi atok keyu hoke.

⁸ Yohmi ka yʋmmʋt nan isht ik o̱no ka pisa kak osh Chitokaka yʋt achi kʋt, Yakeh! Islael in chukachʋfa, micha Chuta in chukachʋfa aiena ka nan it im ʋlhpisa himona im apihi̱sa la he nitak ʋt ʋla hi oke,

⁹ I̱ki ʋhleha hoka ibbak halʋllit pehliechit, nitak kaniohmi kash Echip yakni yoka a kohchi li mʋt, nan it im ʋlhpisa im apihi̱sa li tok okʋno chiyuhma he keyu; yʋmmak okʋt nan it im ʋlhpisa im apihi̱sa li tok ash foyukʋt maha̱ya keyu hatuk o̱, ak ahnincho ki tok, Chitokaka yʋt achishke, im ahanchi tok.

¹⁰ Yohmi ka nan it im ʋlhpisa ilʋppak o̱ nitak himak a pilla mak o̱ Chuta in chukachʋfa yoka im apihi̱sa la hi oke; yohmikmʋt a̱ nan ʋlhpisa puta yoka anukfokihinchi likmʋt, chu̱kʋsh oka ai o̱ holissohonchi la hi oke; mikmʋt in Chihowa sia hahe, mikma ʋm okla hahi oke. Chitokaka yʋt ahanchishke.

¹¹ Yʋmohmikma hatak puta kʋt in chuka panta, micha hatak puta kʋt itibapishi aiena ka nan im abʋchit, Chihowa hoka ish ithaiyanashke, im ahancha he keyu; moma ik lauwo, micha moma i̱ shahli aiena kʋt sʋthana hi oka.

¹² Yohmi ka ik ʋlhpeso ai yʋmohmi puta ka i̱ nukha̱klo la he, mikmʋt nan ai ashʋchi, micha ʋba nan ʋlhpisa kobaha̱fi puta ka himak a pilla ak ithaiyano ka he mak oke.

¹³ Nan it im ʋlhpisa himona yʋmmak achi kak osh, ʋmmona tok ʋt sipokni yo̱ chohmichi hoke. Yohmi ka nana kʋt okpulot sipoknit isht ai aiena hokʋto, ont ik ai iksho kamohma chi̱ kʋt ʋlhtaiyaha hoke.