Heblu 7 - Chahta Holisso Holitopa 1886

Melkisetek atok a̱ chohmit Klaist Chisʋs ʋt nan isht ʋtta holitompa, 1, 11 Alon na holitompa isht ʋtta yatok a̱ i̱ shahli fehna.

¹ Yohmi ka Melkisetek ilʋppʋt Salem i̱ mi̱ko, Chihowa holitopa fehna i̱ na holitompa isht ʋtta yosh, Eblaham ʋt mi̱ko ʋhleha ont ʋbit falamʋt a̱ya ma yʋmmak ash ot ont afama mʋt, yukpali tok.

² Yʋmmak ash o̱ Eblaham ʋt moyuma ka a kashapa ont isht pokoli ka ima mak inli tok: ʋmmona hoka toshowakmʋt, Nan ai ʋlhpiesa i̱ miko, mikmʋt anonti yʋmma achaka̱ya kʋt Salem i̱ mi̱ko, yʋmmʋt nanaiya i̱ mi̱ko achi hoke,

³ I̱ki iksho, ishki iksho, isht ai unchululi iksho, nitak ai isht ia ʋmmona tok ʋt iksho, micha im ilhfiopak ʋt ont ai ʋhli tok ʋt iksho, amba Chihowa Ushi yak o̱ chiyuhmi hosh na holitompa isht ʋtta yosh ahantʋt bilia hoke.

⁴ Yohmi ka hatak ilʋppʋt a chinto kaniohmi ho̱, i̱ki chinto Eblaham ash ot nana ka in tʋnʋp a̱ im ai ishi tok ash achu̱kma i̱ shahli kak o̱ a kashapa ont isht pokoli ka ima tok a̱, hʋsh anukfillashke.

⁵ Yohmi ka Lefai ushi ʋhleha atuk ʋt na‐holitompa isht ʋtta ʋlhtoka kʋt, okla yʋmmʋt itibapishi; micha Eblaham ak o̱ isht atiaka yak inli kia, ʋba nan‐ʋlhpisa in tonla hatuk osh, a kashapa ont isht pokoli ka im ai ishi beka mʋhlishke:

⁶ Amba yʋmmak ash o̱ ilap okʋto ai isht unchululi ho̱ keyu kia, a kashapa ont isht pokoli ka Eblaham a̱ im ai ishi mʋt, nana im ihi̱sa tok ash o̱ yukpali tok.

⁷ Mikmʋt i̱ shahli hak osh ik lauwo ka yukpali hoka ik ai a̱hlo, acha hi yʋt ikshoshke.

⁸ Mikmʋt ilʋppak okʋno hatak ʋt illa he kia a kashapa ont isht pokoli ka ishi; amba yʋmmak okʋno yʋmmʋt ishi kʋt okcha̱yʋt ahanta ka, nana kʋt isht ai atokowa hoke.

⁹ Yohmi ka Lefai yokʋt a kashapa ont isht pokoli ka ihi̱shi kia, Eblaham ak o̱ isht ai unchululi hokʋt, a kashapa ont isht pokoli ka Eblaham a̱ ibai atobbi ak inli tok, yʋmma chiyuhmi achi la hinla ak inli hoke.

¹⁰ Yohmi ka Melkisetek ʋt yʋmmak ash o̱ afama ma, yʋmmʋt i̱ki ikfeksa anu̱kaka yak o̱ fo̱ka moma hatok.

¹¹ Yohmi ka Lefai na‐holitompa isht ai ʋtta yokʋt ai a̱hli bieka hatok okma, yʋmmak o̱ okla hʋt i̱ nuta ai asha hosh ʋba nan ʋlhpisa puta ka ihi̱shi hatok oka, Melkisetek atok a̱ chiyuhmit na holitompa isht ʋtta inla hokʋt na katihmi ho̱ ʋlhtoka he ʋlhpesa moma ho̱? micha Alon na holitompa isht ai ʋtta yatok a̱ chiyuhma he keyu ho̱?

¹² Yohmi ka na holitompa isht ai ʋtta inla hosh ʋlhtoka hatuk o̱, anonti nan ʋlhpisa yash ot inlʋt toba he ʋlhpiesa hoke.

¹³ Yohmi ka yʋmma nana puta ilʋppʋt isht anuhumpa hokʋto, oklushi inla ho̱ ibai achʋfa hatok; yʋmmak okʋto hatak achʋfa kia alta ya̱ nan isht ai ʋtta beka tok keyu hoke.

¹⁴ Yohmi ka Chuta yak o̱ pin Chitokaka yʋt a tobʋt kohcha tok ʋt ai atokowa; oklushi yʋmmak oka na holitompa isht ai ʋtta imma nana kia Moses ʋt isht anumpuli tok keyu hoke.

¹⁵ Mikmʋt nana ai atokowa hokʋt i̱ shaiyahli fehna imoma ka, Melkisetek atok a̱ hoyulba hosh na holitompa isht ʋtta inla kʋt hikia hoke,

¹⁶ Yʋmmak okʋto haknip nan im ʋlhpisa imma ho̱ isht ʋlhtoka tok keyu, amba okcha̱yʋt bilia im ai ʋlhpiesa hatuk osh ʋlhtoka tok oke.

¹⁷ Yohmi ka yʋmmʋt atokolit anoli hosh, Chishno yokʋt na‐holitompa isht ʋtta Melkisetek atok a̱ chiyuhmit bilia chia hoke, ahanchi tok.

¹⁸ Yohmi ka nan ʋlhpisa yʋmmak ash osh nana ka isht ai achukma, ai a̱hli ka ik ono hatuk osh akshu tok ʋt ai a̱hlishke.

¹⁹ Nan‐ʋlhpisa yʋmmak ash okʋto nana kia ai a̱hlichi tok keyu hoke: yʋmmak atuk mak o̱ nana achukma i̱ shahli ho̱ pim ataiyahli hosh ʋla hatok pulla kak o̱, Chihowa i̱ bili̱kasi ka il ona hoke.

²⁰ Mihma yʋmmak ash ot anumpa kʋllo il onoyuchi keyu iksho ho̱ yʋmmak ash ot na holitompa isht ʋtta toba tok oka:

²¹ Yohmi ka anumpa kʋllo il onochi kia iksho ho̱ yʋmmʋt na holitompa isht ʋtta ʋhleha tohomba tok oka: amba ilʋppak okʋno anumpa kʋllo il onochi hosh nana im ahanchi kʋt, Chitokaka yak osh anumpa kʋllo il onochi kʋt, inlʋt im anukfila he keyu mak osh, Chishno yokʋt na holitompa isht ʋtta Melkisetek atok a̱ chiyuhmit bilia chia hoke, ahanchi tok:

²² Yakohmi hosh Chisʋs okʋt nan it im ʋlhpisa achukma i̱ shahli yoka ai a̱hlichi toba tok oke.

²³ Yohmi ka yʋmmak ash okʋto na holitompa isht ʋtta yʋt la̱wa mʋhli tok: yohmi kʋt yʋmmak okʋto nan illi ak atuk pulla mak o̱ ahantʋt bilia beka tok keyu hoke.

²⁴ Amba hatak ilʋppak okʋto okcha̱yʋt bilia hatuk osh na holitompa isht ai ʋtta inla himma keyu ho̱ ieshi hoke.

²⁵ Yʋmohmi hokʋt anonti ilap ak o̱ anukchieto hosh Chihowa hoka im oho̱na hokʋno mominchit okchalincha he bano hosh, yʋmmak oka apelʋchit isht anumpohonli hosh ahantʋt bilia hoka.

²⁶ Yohmi ka na holitompa isht ʋtta chinto, yʋmmak okʋt ai ashʋchika ik im iksho, nan ik okpano, na liteha iksho, nan ashʋchi ʋhleha ha̱ ai i̱ filʋmmi, micha chaha kʋt ʋba yakni yak kia i̱ shahli, yʋmmak chiyuhmi hosh pim ahanta he ai ʋlhpiesa hatok:

²⁷ Yohmi ka na holitompa isht ʋtta pehlichi chinto ʋhleha hokʋto nitak moma ka ilap nan ai ashʋchi isht ʋlhtoba ka ti̱kba pit im issa ha yosh, okla nan ai ashʋchi isht ʋlhtoba ka pit im issa beka tok o̱, yʋmmak okʋto chiyuhma he im ʋlhpesa keyu, nan ai ashʋchi isht ʋlhtoba il im issa mak osh ilʋppak oka himonna ma yʋmohmi tok okʋt.

²⁸ Yohmi ka nan ʋlhpisa yʋmmak ash ot hatak ibetʋbla he im ʋlhtayak kia na holitompa isht ʋtta chinto atokohonli; amba anumpa kʋllo isht ai a̱hli tok ash ot ʋba nan ʋlhpisa yʋmmak ash ot toba ha yak o̱, Ushi ya̱ atokoli ho̱, yʋmmʋt na holitompa isht ʋtta ai a̱hlit bilia he mak oke.