Heblu 6 - Chahta Holisso Holitopa 1886

Nan ai yimmika ya̱ ai i̱ filʋmmit aka ik kaho ka chi̱, 1: 11 amba kʋllot hiela chi̱: 12 nana ka achunanchit nuktaiyalʋt Chihowa ya̱ aiokpʋcha chi̱ ka i̱ miha: 13 Chihowa im anumpa hʋt a̱hli hoka.

¹ Yʋmohmi hoka Klaist ai isht ʋlbʋchi ʋmmona hokʋno e boyuhli cha, ai a̱hli fehnʋt itikba il ia hosh nan toksʋli isht ai illi ai i̱ filʋmmit ile kostininchi, micha Chihowa isht i̱ yimmi;

² Baptismo nan isht ʋlbʋchi, micha ibbak onohonchi, micha illi tok ʋt falamʋt tani, micha hatak puta nan im ʋlhpisʋt bilia he aiena ka intolahpi ka atuklanchit keho bohlo kashke.

³ Micha Chihowa ak osh ʋlhpesa ahni hokma, ilʋppa e yʋmohma he mak oke.

⁴ Yohmi ka kʋna hosh himonna ha̱ im ʋlbʋchit, na‐hʋlbina ʋba yakni minti ka akostininchi, micha Shilombish Holitopa ya̱ ibai ishi tok okʋto,

⁵ Mikmʋt Chihowa im anumpa achukma, micha ʋbanumpa nitak nan isht ai a̱hla he aiena ka anukfoyuka ha yak okʋto,

⁶ Yʋmmak ash osh ʋbanumpa ha̱ i̱ filʋmmi hokʋt kaniohmit atuklant himonʋt toba cha, ai isht ile kostinincha hinla kʋt iksho kamohmi hoke; yohmi kʋt ilap ash inli hosh Chihowa Ushi ya̱ himonʋchit ititaiyukhʋna ya̱ ai ʋbi kʋt, otʋninchit hofahli hokʋt.

⁷ Yohmi ka yakni ak osh uhumba aiyuka ka ai ihi̱shke hosh yakni a toksʋli yʋmmak atuk ʋt ai isha he ʋlhpiesa ho̱ offohonchi cha, nan isht ai yukpa Chihowa a mihinti ka ishi hoke:

⁸ Amba bafʋlli halupa ilaiyuka offohonchi hokʋno nan ik ahobo hatuk o̱, isht ai okpuloka he anumpa hʋt onʋtuyula̱ hosi; yʋmmʋt ont im ishtaiyopi hokʋto lua he mak oke.

⁹ Yakohmichit il anumpuli hoh kia, amba holitopa ʋhleha ma! hʋchishno yokʋno nana achukma i̱ shahli, micha ai okcha̱ya nana kʋt ai ahalaia kak o̱ a hʋchi yʋmohmi ka, pi yimmishke.

¹⁰ Yohmi ka Chihowa hʋt ik ai ʋlhpeso hokmá, nanta tuk osh nan toksʋlit holitoblit ilap hohchifo imma ka nan isht hʋsh im ahanta tuk a̱ imi haksa he keyu, ʋbanumpuli ʋhleha ha̱ nan isht hʋsh im ahanta tuk osh, isht hʋsh ahanta kʋt imoma hoka.

¹¹ Mikmʋt ai okcha̱ya ishi la he ai ahnit, ai a̱hlit hʋchi yimmi hosh ont ai ʋhli ka hʋsh ona chi̱ kʋt, nana hʋsh a kaniohmi kash ot moyuma kʋt hʋsh achunancha he e hʋchim ai ahnishke.

¹² Yohmi hosh ik hʋch intakobo kashke; amba kaniohmi kʋt na yimmi kak osh nana ka nuktaiyalʋt hoho̱yo hosh, nana im ihi̱sa tok ash ont ieshi ʋlhpesa tok ak o̱ hʋsh hobachashke.

¹³ Yohmi ka Chihowa hʋt Eblaham a̱ nana ka im ihi̱sa hokʋt ilap inli ho̱ ai isht anumpa kʋllo il onochi kʋt, i̱ shahli kanima ai isht anumpa kʋllo il onocha he keyu kak atok,

¹⁴ A̱hlishke yukpahanlit chi yukpali la he, mikmʋt lauahanchit chi lauachi la hi oke, ahanchi tok.

¹⁵ Yakohmit nana ka nuktaiyalʋt hoho̱yo hatuk osh, nana ka im ihi̱sa tok ash ishi tok.

¹⁶ Yohmi ka hatak okʋto i̱ shahli ho̱ ai isht anumpa kʋllo il onohonchi chatuk ʋt ai a̱hli; micha nan isht ai a̱hlichi anumpa kʋllo il onochi kak osh itachowa puta hokʋno ont im ai ʋhlichi chatuk bano hoke.

¹⁷ Yʋmohmi ka Chihowa hokʋt nana ka im ihi̱sa tok a̱ ont isha he im ai ʋlhpiesa ʋhleha hoka ilap nana im anukfihinla tok ʋt kaniohmit ai inla himma keyu ka, achukmalit i̱ shahlichit im otʋninchi bʋnna hosh, anumpa kʋllo yo̱ il onochit isht ai a̱hlichi tok:

¹⁸ Yohmi ka nana kaniohmit ai inli himma keyu tuklo yʋmmak oka Chihowa hokʋt isht a holaba himma keyu hoka, ʋba isht il aiyukpa pim ihi̱sa tok ash il isha chi̱ hosh a hlakofi yo̱ il o̱ chaha̱fa kʋt, nan isht a nuktaiyala chinto il iesha he ak atok.

¹⁹ Nana pim ihi̱sa tok ash il isha he il ai ahni kak osh, isht a kʋllo ai a̱hli kanʋlla he keyu yo̱ shilombish ʋt im itilaui, micha yʋmmak osh, aholitopa fehna isht ompoholmo anu̱kaka yoka chukowa mak oke.

²⁰ Yʋmmak oka pin tikba‐heka, Chisʋs ʋt chukowʋt, Melkisetek atok a̱ chiyuhmit na holitompa isht ʋtta chinto bilia toba tok oke.