Heblu 4 - Chahta Holisso Holitopa 1886

Ʋbanumpuli a‐foha he ʋlhtaha tok a̱ na yimmi pulla hokmak osh isha he, 1: 12 Chihowa im anumpa hʋt aia̱hli fehna; 14 Na holitompa chinto isht pim ʋtta yʋt Klaist Chisʋs Chihowa Ushi, 16 nan isht ai i̱ kana ai o̱ binili holitompa nukwa̱ya keyu hosh il oho̱nashke.

¹ Yʋmohmi hoka im afoha e chukowa he pim issa tok a̱ takali moma hoka, hʋsh kanima kʋt hʋch ik ono ahoba hinla ka, ahah! il ai ahnashke.

² Isht ai yukpa anumpa yash ot pishno ak kia pim annoho̱wa kʋt, yʋmmʋt im annoho̱wa tok ash o̱ chiyuhmi tok: yohmi kia anumpa im annoho̱wa kʋt nan isht im achukma tok keyu kʋt, anumpa haha̱klo yʋmmak okʋt na yimmi ya̱ ibafo̱ki keyu ak atok.

³ Yohmi ka, Si anukhobela hosh anumpa kʋllo il onochit anumpohonli li hoka, yʋmmak okʋt ʋm afoha yoka chukowa he keyu, ilap ʋt achi tok: yohmi ak inli kia pishno il i̱ yimmi hatuk okʋto yakni toba ʋmmona pilla kash nan toksʋli puta kash ot ont ʋlhtaiyaha tok im afoha yoka e chukowa hoke.

⁴ Ilap ʋt yakohmichit nitak isht untuklo ka ai atokowa kanima ka isht anumpuli tok: yohmi kʋt Chihowa hokʋt ilap a toksʋli puta hoka ataiyahli kak osh nitak isht untuklo hokʋno foha tok.

⁵ Mihmʋt ilʋppak o̱, Ʋm afoha yoka chukowa he keyu, anonti achi tok.

⁶ Yakohmi hoka afoha yoka kaniohmi kʋt chukowa chi̱ pulla ka takanli moma hoka, yohmi ka isht ai yukpa anumpa im annoho̱wa ʋmmona tok ʋhleha hokʋto afoha yoka ik chukowo kʋt na‐yimma he keyu kak atok.

⁷ Anonti Lewi ak o̱ isht ai anumpulit nitak kaniohmi ho̱ atokolit, Himak nitak a̱ ahanchi, nitak yʋmmak atok a̱ hopakit taiyaha, achi hoka, Himak nitak a̱ ʋm anumpa hʋsh haiyaklo hokmʋt, hʋchi chu̱kʋsh oka hʋch ik kʋllocho kashke.

⁸ Yohmi ka Choshua ʋt yʋmmak ash afoha ya̱ ima hatok okma, i̱ himmak okʋno nitak inla ho̱ isht anumpula hi atok keyu hoke.

⁹ Yʋmohmi hoka Chihowa im okla ʋhleha hokʋto afoha yʋt in takanli hoke.

¹⁰ Yohmi ka kʋna hosh Chihowa im afoha yoka ont chukowa hokʋto, ilap inli toksʋli kash issa kʋt, Chihowa hʋt ilap toksʋli tuk ʋt issa ak inli tok ash inli ho̱ chiyuhmi hoke.

¹¹ Yohmi hoka afoha yʋmma e chukowa chi̱ kʋt il achunanchi fehnashke; ik yimmo hosh itohonla tok a̱sh o̱ chiyuhmit hatak kʋna kia ik itulo kashke.

¹² Yohmi ka Chihowa im anumpa hʋt okcha̱ya, micha isht ai a̱hli fehna, micha halupa kʋt bʋshpo falaia itahla̱kla halupa yak kia i̱ shahli hosh hlopullichit bʋshli kʋt, ilhfiopak, micha shilombish ita tuklo ka it i̱ filʋmmichi, anonti itachakli, micha lupi ita tuklo ka it i̱ filʋmmichi, micha chu̱kʋsh anu̱kaka nan isht ahni, micha nan isht anukfilli puta ka akostininchit nan im apesa yoke.

¹³ Nana toba moma kʋt achʋfa kia itikba ya̱ ik im ai otano kʋt iiksho; amba nana ka il it i̱ kaniohma chi̱ yʋmma i̱ holhponayo hokʋno nan oklu̱ha kʋt ik ompoholmo i̱ bieka hoke.

¹⁴ Na‐holitompa isht ʋtta chinto pim anta, Chihowa Ushi, Chisʋs okʋt ʋba yakni oka ona tok oka, nana ka il il apihi̱sa tok ʋt il ai a̱hlashke.

¹⁵ Yohmi ka na holitompa isht ʋtta chinto nan isht a pilbʋsha ka ik piba nukha̱klo ka hi osh pim anta keyu; amba nana a kaniohmi puta ka imomaka pisa kʋt, pishno ak inli ho̱ chiyuhmi kia ai ashʋchi yak osh ik im iksho ki tok.

¹⁶ Nan isht i̱ nukha̱klo il ishi cha, ont ai ʋlhpiesa pi apela chi̱ ka isht i̱ kana il ahayucha chi̱ kʋt, isht ai i̱ kana ai o̱ binili holitompa nukwa̱ya keyu hosh il onashke.