Heblu 3 - Chahta Holisso Holitopa 1886

Klaist ʋt holitopa kʋt Moses a̱ i̱ shahli, 1: 7 yohmi hoka kil i̱ yimmokmʋt, Islael chu̱kʋsh kʋllo ʋt na palʋmmi isht onʋtula he im ʋlhpisa tok a̱ i̱ shahlit pi onʋtula he bano hoke.

¹ Yʋmohmi hoka itibapishi holitopa ʋhleha ʋba nan isht ilaiyukpa et annoho̱wa ka ibai i̱shi hʋchia ma! Apostel, micha Na‐holitompa isht ʋtta chinto, Chisʋs Klaist a̱ il ithaiyana, il il apihi̱sa tok a̱ hʋsh anukfihinlashke.

² Moses ʋt ilap in chuka ai achʋfa moyuma ka im ai a̱hli bano tok a̱, chiyuhmit yʋmmak ash osh ilap a̱ atokoli tok a̱ im ai a̱hli bano tok.

³ Yohmi ka hatak ilʋppʋt isht a holitopa i̱ shahli ho̱ isht a holitopa kʋt Moses a̱ i̱ shahli kʋt, chuka yoka kʋna hosh ikbi tok ak osh holitopa kʋt, chuka yash i̱ shahli chatuk a̱ chiyuhmi hoke.

⁴ Yohmi ka chuka toba moyuma ka ikbi ʋt a̱sha bano chatuk; amba nana moma ihi̱kbi tok ʋt Chihowa ak oke.

⁵ Yohmi ka tishu ho̱ chiyuhmit Moses ʋt ilap in chuka ai achʋfa moyuma ka im ai a̱hli bano kʋt, nana isht anuhumpa he mak o̱ atokolit anohonli tok:

⁶ Amba Klaist ʋto Ushi yosh in chuka achʋfa pehliechi ho̱ chiyuhmit ai a̱hli tok; yohmi ka ai okcha̱ya ya̱ na‐yukpʋt e hoho̱yo hosh Chisʋs Klaist il anukchieto kʋt, achunanchi ai a̱hli hosh ai ʋhli ka il ona hokmʋt, yʋmmak ash in chuka pia hoke.

⁷ Yʋmohmi hoka Shilombish Holitopa yʋt ahanchi kʋt, Himak nitak oka im anumpa hoka hʋsh haiyaklo hokmʋt,

⁸ Hʋchi chu̱kʋsh oka hʋch ik kʋllocho kashke: yohmi kʋt isht a nokowʋchi, yʋmohmit nana ka imomaka pisachi hosh yakni haiaka itʋnowa tok a̱ hʋch ik chiyuhmicho kashke.

⁹ Nitak yʋmmak ash hʋch i̱ki ʋt ik sai yimmo kʋt imomaka sa pisʋchi tok; micha nana a kaniohmi li puta ka pihi̱sa na afʋmmi pokoli ushta tok.

¹⁰ Yʋmohmi hoka okla yʋmmak ash isht ʋm ahchibʋt kʋnia tok: mihmʋt, Yʋmmʋt chu̱kʋsh anu̱kaka ya̱ isht ashʋchi bilia, micha ʋm anumpa ʋlhpisa puta ka ik ithanoshke, achi li tok.

¹¹ Yohmi kʋt sa nukhobela hosh anumpa kʋllo il onochit anumpohonli li hoka, Ʋm afoha yoka chukowa himma keyu mak oke.

¹² Itibapishi li ʋhleha hʋt ahah! hʋsh ai ahnashke, chu̱kʋsh okpulo, nan ik yimmo Chihowa okcha̱ya ya̱ isht hʋsh ai i̱ filʋmma hinla kʋt, hʋsh kanima ka ik hʋchi anukfoyuko kashke.

¹³ Amba himak nitak achi itin ta̱kla kak o̱ nitak puta ka nan it i̱ mihʋt hʋsh iti hlampkohonchi pulla ho̱, hʋsh kanima kia nan ai ashʋchi isht a haksit ik hʋchi kʋllo kashke.

¹⁴ Yohmi ka na pi yimmi ʋmmona tok ʋt ai a̱hli biekʋt ma̱ha̱yʋt ont ai ʋhli ka il ona hokmʋt, Chisʋs oka ibai achʋfa ʋhleha e toba hoke.

¹⁵ Himak nitak achi itin ta̱kla kak o̱, Himak nitak oka im anumpa hoka hʋsh haiyaklo hokmʋt, isht a nokowʋchi yʋmohmi tok a̱, chiyuhmit hʋchi chu̱kʋsh oka hʋch ik kʋllocho kashke.

¹⁶ Yohmi ka kaniohmi kʋt haklo hayʋt nokowʋchi tok: yohmi kia Moses ʋt pehlichit Echip a̱ kohchi tok a̱ moma hosh yohmi tok keyu hoke.

¹⁷ Amba afʋmmi pokoli ushta ka kʋta hak o̱ isht im ahchibʋt kʋnia tok o̱? nan ashʋchi tuk osh haknip illi ʋt yakni haiaka ya̱ ai itohonla ak atok keyu cho?

¹⁸ Yohmi ka kʋta hak osh im afoha yoka chukowa him ma keyu ho̱ anumpa kʋllo il onochit anumpohonli tok o̱? amba ik i̱ yimmo ke tuk ʋhleha ak atok keyu cho?

¹⁹ Yohmi ka ik i̱ yimmo pulla kak osh chukowa he keyu ki tok a̱ eho pisʋshke.