Heblu 2 - Chahta Holisso Holitopa 1886

Klaist a̱ il im antia he tuk, 1; 9 pi okchalincha chi̱ kʋt hatak o̱ toba tok oka; 14 yohmi kʋt nana kʋt a yakohma he ʋlhpesa tok mak osh hatak o̱ toba tok.

¹ Yohmi hoka nana e haiyaklo tuk puta kʋt ahah ahni fehna hosh il anukfihinla hetuk, e yʋmohmi keyukmʋt, nitak kanima ka pi̱ kʋnia hinla hoke.

² Yohmi ka enchil ʋhleha hʋt anumpa anumpohonli tok a̱ ai a̱hlit kʋllo hatok okma, micha kʋna hosh anumpa yʋmmak, ash o̱ kobaha̱fi, micha ik im antio puta ka isht ʋlhtoba kʋt isht ai ʋlhtoba he ʋlhpiesa ho̱ ihi̱shi tok okma:

³ Ai‐okcha̱ya chinto yakohmi ka kil anukfihinlokmʋt, katiohmit pi hlakofa hinla cho? yʋmma ʋmmona ka Chitokaka yak osh isht anumpohonli tok o̱, anonti yʋmma i̱ haponaklo tok puta kʋt ai a̱hlichi mak osh pim anohonli tok:

⁴ Chihowa hak kia atokowa ibai anohonli kʋt, nan isht atokowa, nan isht anukhlakʋshli, micha nan isht ai a̱hli ilaiyuka, micha Shilombish Holitopa na hopela aiena ka ilap im anukfihinla hosh isht ai a̱hlichi tok:

⁵ Yohmi ka yakni talaia he isht il anumpuli ka, enchil ʋhleha hokʋno i̱ nutaka apihi̱sa tok keyu hoke.

⁶ Amba achʋfa kʋt kanima ka atokoli hosh ai anumpuli kʋt, Hatak ʋt nanta ho̱ yʋmmak oka chishno yokʋt isht chim anukfihinla ho̱? micha hatak ushi yoka, chishno yokʋt ish i̱ noho̱wa ho̱? ahanchi tok.

⁷ Yʋmmak oka enchil ʋhleha hokʋno lumʋt ik lauwo ho̱ ish ikbi tok osh, isht a holitopa chinto ka isht ish iachukolechi, micha nan oklu̱ha chibbak ʋt ihi̱kbi tok a̱ i̱ shahli ho̱ ish ikbi tok:

⁸ Chishno yokʋt nan oklu̱ha kʋt iyi nuta aiasha cha, im antia hi a̱ ish apesa tok. Yakohmichit moyuma ka im i̱ nutakʋchi ha yokʋt, nana kia ik im i̱ nutakacho ka achʋfa kia iksho ki tok. Yohmi kia nan oklu̱ha kʋt ik im i̱ nutako ki̱sha ho̱ himonasi ka e pihi̱sʋshke:

⁹ Yohmi kia Chisʋs, yʋmmak okʋt enchil ʋhleha ha̱ lumʋt ik lauwo hosh toba tok kia, nan‐illi isht ilbʋsha ka pihi̱sa kak osh isht a holitopa chinto ka isht iachuka ka e pihi̱sʋshke; yohmi na Chihowa isht i̱ kana pulla hatuk mak o̱ yʋmmak ash ot hatak moyuma ka ʋlhtoba hosh illa hi atok.

¹⁰ Yʋmmak pulla hosh nan oklu̱ha ka ihi̱kbi tok, mih fehna kash inli atuk pulla mak o̱ nan oklu̱ha kʋt toba tok, yʋmmʋt yʋmihcha he im ai ʋlhpiesa hosh ushi ʋhleha laua ka isht a holitopa ka pehlichit isht oho̱na kʋt, yʋmmak ash isht ai okcha̱ya i̱ kʋpitʋni hʋt nan isht ilbʋsha puta ka pihi̱sa hosh isht ai a̱hla hi a̱ im apihi̱sa tok oka.

¹¹ Yohmi ka na‐kashofi, micha nan ai ashʋchika i̱ kashofa aiena kʋt it ibai achʋfa hoke; yakohmi hoka ik hofahyo hosh itibapishi ʋhleha hochihi̱fo kʋt,

¹² Itibapishi li ʋhleha ha̱ chi hohchifo ha̱ otʋninchit im anohonli la chi̱; itibapishi li ʋhleha ha̱ ai iklʋnna hikiʋt talaho̱wʋt chi aiokpahanchi la chi̱ hoke, ahanchishke.

¹³ Mikmʋt anonti, Yʋmmak o̱ anukchieto la chi̱ hoke, achishke. Anonti, Ʋno, micha ʋlla ʋhleha ha̱ Chihowa hʋt ahama tok oka pisá, achishke.

¹⁴ Yohmi hoka ʋlla ʋhleha hash osh haknip, issish aiena ka ibai i̱shi hatuk o̱, ilap ak kia anonti yʋmmak ash ibai ishi tok ak inli hoke: yohmi na ʋlhtobʋt illi pulla hosh nan‐illi i̱shi, yʋmmʋt nan isht ahullo okpulo ak atuk a̱ imaiyachi cha;

¹⁵ Yʋmmʋt nan‐illi i̱ nukshopa kak osh, okcha̱ya ta̱kla kʋt yuka tobʋt kʋnia chatuk a̱ mominchit hlakoficha hi atok.

¹⁶ Yohmi ka a̱hlishke, yʋmmʋt enchil ʋhleha ha̱ halanli tok keyu; amba Eblaham isht ai unchululi hak o̱ halanli tok.

¹⁷ Yʋmohmi ka nan oklu̱ha ka ai yʋmohma he ai ʋlhpiesa hosh itibapishi ʋhleha ak inli ho̱ chiyuhmit toba hi atok; yʋmohmi hosh i̱ kana fehnʋt na‐holitompa isht ʋtta chinto ai a̱hli fehna hosh Chihowa nan isht im ahanta kʋt, okla puta nan ai ashahanchi tok isht ʋlhtohomba he ikbi mak osh isht ahanta hi atok.

¹⁸ Yohmi ka ilap ak kia imomaka pisa kʋt, na‐palʋmmi pihi̱sa hatuk okʋt, kʋna hosh imomaka pisa hokʋno apelʋcha hi ʋt ithana hoke.