Heblu 13 - Chahta Holisso Holitopa 1886

Nana ka a yʋmihcha he ʋlhpisa kaniohmi ka anoli, 1: 7 im ʋbanumpa isht anumpuli ʋhleha ha̱ holitobla he i̱ miha: 9 nan ithʋnanchi inla hokʋno ik i̱ haponaklo he, 16 ʋbanumpa hʋt holitopa, hi ahnit nan isht apelʋchi: 17 nan ʋlhpisa ya̱ im antia he aiena ka i̱ miha: mihmʋt isht aiyopichi kʋt ʋba isht anumpuli.

¹ Itibapishi it i̱ hullo kʋt ma̱ha̱ya pullashke.

² Hatak ik ithano ya̱ i̱ kanʋt apelʋcha he tuk ʋt ik hʋchimi hakso kashke; yʋmma ai yʋmohmi kak osh kaniohmi kʋt ik ithano kia, enchil a̱ aboha ya̱ ik chukowá im ahni cha apelʋchi tok oka.

³ Talakchi puta ka ibai achʋfa ho̱ chiyuhmit, micha na palʋmmi isht ilbʋsha yʋmma puta ka hʋsh ithaiyanashke; hʋchishno yak kia hʋchi haknip ʋt hʋchi shilombish ai itifo̱ka moma hokʋt.

⁴ Nan itauwaya yokʋt hatak moma ka isht im ai ʋlhpiesa, micha topa yʋt okpulo keyu kʋt isht a holitopa hoke; amba itauwaya yʋt ik it im ai a̱hlo puta, micha haui puta aiena kʋno Chihowa hʋt nan im apesa hi oke.

⁵ Nana hʋsh it i̱ kakiohmi kʋt nana it im anushkunna kʋt ik hʋchim iksho kashke; micha nana kaniohmi hosh hʋchim a̱sha hokmʋt isht hʋchim ʋlhpiesashke; yʋmmʋt, Chissʋt ia la himma keyu, micha hʋchi kanchi la himma keyu, ahanchi tok oka.

⁶ Yʋmohmi hoka Chitokaka yak osh na si apela yoke, micha hatak ʋt nana ho̱ sa kanimihcha hinla hokʋno i̱ sa nʋkshopa he keyu, pi nukwa̱ya iksho hosh il acha he bano hoke.

⁷ Hʋchi pehlichi yʋmmak oka hʋsh itaiyanashke; yʋmmak osh Chihowa im anumpa hoka isht hʋchim anumpohonli tok; yʋmmʋt na yimmi tok ak o hʋsh hobachi cha, nana a kaniohmi tuk ash ai ʋhli ka hʋsh anukfihinlashke.

⁸ Chisʋs Klaist okʋt pilashash kaniohmi tuk ʋt, himak nitak a̱ mih ash inli, micha peh bilia yoke.

⁹ Nan isht ʋlbʋchi ilapissa, micha ilaiyuka ka isht hʋchi filemoa ná; Chihowa hʋt isht i̱ kana hak o̱ chu̱kʋsh ʋt isht ai a̱hli ka nana achukma hoke: nan ilhpak ak keyu, yʋmmak okʋto yʋmma isht ai ahanta kia nana im achukmali tok keyu hoke.

¹⁰ Pishno ʋto alta yʋt pi̱ hikia; yʋmohmi ka ʋlhtipo chash o̱ nan isht ai ahanta yʋmmak okʋto ai impa im ai ʋlhpesa keyu hoke,

¹¹ Yʋmohmi ka anonti nan ʋlhpoba yʋmmak o̱ issish o̱ isht nan ai ashʋchika ak pulla kak o̱ na holitompa isht ʋtta chinto yʋt a holitopa ya̱ ishit chukowa ho̱, nipi ash ot abinanchi ka misha yo̱ a hulukmi beka tok.

¹² Yʋmohmi ka Chisʋs ak kia ilap im issish ak o̱ okla isht kashofa chi̱ kak osh, holihta isht ʋlhkʋma misha yo̱ ai ilbʋshʋt illi tok.

¹³ Yohmi hoka ilap ʋt nan isht hofahya tok chiyuhmi ho̱ ieshi hosh, abinanchi yak o̱ kiloh ia cha kiloh im oná.

¹⁴ Ilʋppak okʋno tʋmaha chito talaia bilia hi ʋt ik pim iksho, amba himmak ʋla he achʋfa kak o̱ e hoyo hokʋt.

¹⁵ Yohmi ka yʋmmak atuk pulla kak o̱ Chihowa isht a holitopa he pitiʋlbi isht a waya ka yʋmmak o̱ pit il im ihi̱sʋt bilia cha, ilap hohchifo ha̱ yak oke ai ahnit, il aiokpahanchashke.

¹⁶ Micha nana achukma isht ahanta cha, ʋbanumpa nan isht apelʋcha he aiena tuk ʋt hʋchimi haksi ná: nana isht it i̱ hullo yʋmma chohmi kak o̱ Chihowa yokʋt isht im ʋlhpesa fehna hoke.

¹⁷ Hʋchi pehliechi ka holitoblit hʋsh im antia pullashke; hʋchimi shilombish isht im anukfihinla kʋt, nana il anohonli pulla chi̱ ho̱ chiyuhmit, na yukpa hosh yʋmohmi hokbano, nan isht a nukha̱klo keyu, yʋmmak okma nan isht a hʋchi yukpa he keyu hoka.

¹⁸ Anumpa ilbʋsha isht hʋsh pi anumpohonlashke; yohmi kʋt nan oklu̱ha ka ai isht il akostininchi achukma ho̱ il ieshit ai ʋlhpiesa kak bano hosh il ahanta he il ai ahnishke.

¹⁹ Yohmi kia ilʋppak o̱ yohmik bano hʋchim ahni li i̱ shahli hokʋto, chekosi a̱ holhtofa cha, falamʋt hʋchim ona li hok bano, ai ahni lishke.

²⁰ Yohmi na nan it i̱ nanaiyʋchi Chihowa yʋmmak osh nan it im ʋlhpisa bilia issish ak atuk pulla kak o̱ Chukfʋlhpoba apesʋchi chinto, pin Chitokaka Chisʋs okʋt illi tuk a̱ falaminchit tanichi tok okʋt,

²¹ Ilap nan ai ahni ka hʋsh yʋmihcha chi̱ ka nan toksʋli achukma puta ka hʋchi anukfohkihinchit isht hʋchim ai a̱hlichi ho̱, ilap nan isht im ʋlhpiesa fehna ka Chisʋs Klaist ak atuk pulla kak o̱ hʋsh yʋmihinchashke; yʋmmak pulla kak o̱ isht a holitopa yokʋt immi biliʋt peh biliashke. Amen.

²² Mikmʋt itibapishi li ʋhleha ha̱ nan isht atohnochi anumpa achukma ka ʋlhpesa ahnit hʋsh aiokpʋchi hokbano hʋchim ai ahni lishke: anumpa kanomosi hʋchi̱ holissochi li tuk okʋt.

²³ Yohmi ka il itibapishi Timohli ʋt ik iá im ahni na ia tuk oka hʋsh ithanashke; yʋmmʋt chekosikma ʋla hokma, awant ont hʋchi pisa la chi̱ oke.

²⁴ Hʋchi pehliechi puta, micha ʋbanumpuli moyuma ka hʋsh aiokpʋchashke. Itali okla hʋt hʋchi aiokpʋchishke.

²⁵ Isht i̱ kana yokʋt hʋsh moyuma ka hʋchi anukfoyukashke. Amen.