Heblu 12 - Chahta Holisso Holitopa 1886

Chihowa anukfoyukʋt achunanchit nayimmi ka il ai itʋnowa he achi, 1; 22 kʋna hosh nan ʋlhpisa himona aiokpʋchi kʋt isht ai yukpa ahalaia he ʋlhpesa ka anoli.

¹ Yʋmohmi ka nan atokowa anoli puta kʋt hoshonti chinto ka chiyuhmit yakohmi hosh isht a pi apakfoyupa ak inli hokʋt, na weki puta, micha nan ai ashʋchi yʋt nan isht ahomba iksho isht a pi apakfoyupa a moma ka naksika e boyuhli cha, a mʋllela he pit tikba ituyula ka nuktaiyalʋt achunanchit e mʋllihinlashke,

² Chisʋs nan isht a pi yimmi ka pi nukfohkichi, micha atahli, yʋmmak osh nan isht ilaiyukpa yʋt itikba auet takali kak osh ʋlhpesa ahnit, ititaiyukhʋua ya̱ takalit, nan isht a hofahya nan isht ik im ahobo tok osh, Chihowa ai o̱ binili holitompa isht impakimma yak o̱ binili ka hʋsh pihi̱sashke.

³ Yohmi ka hʋchim anukfila hʋt tikambit ʋm ai a̱hla he keyu, ahnit taha yoba hinla kʋt, nan ashʋchi ʋhleha hʋt ilap a̱ i̱ sanahanli kia yʋmmak oka ʋlhpesa ai ahni tok a̱ hʋsh anukfihinlashke.

⁴ Hʋchishno yokʋto nan ai ashʋchika ya̱ i̱ sanali kʋllo fehnʋt hʋsh ilafoa na issish isht ik hlatapo ki̱shʋshke.

⁵ Micha isht a nuktʋla he anumpa hʋt hʋchim anumpuli kʋt ʋlla yo̱ chohmichit, Sʋso ma! Chitokaka i̱ nan isht kostininchi ya̱ chik ahobalo ki ná; micha yʋmmʋt chi kostininchikma, ʋm ai a̱hla he keyu, chik ai ahno kashke, achi ka chimi haksi tok o̱?

⁶ Yohmi ka Chitokaka yʋt kʋna ho̱ i̱ hullo hokʋto kostininchi hoke; micha ushi puta ka ahninchi hokʋto fʋmmi hoke.

⁷ Hʋchi kostininchi ka nuktaiyalʋt ʋlhpesa hʋsh ahni hokma, Chihowa hak osh ushi yo̱ chohmichit hʋchi̱ yʋmihchi hoke; ushi nanta ho̱ iki ʋt kostininchi keyu ka anta hatuk o̱?

⁸ Amba nan isht kostininchi yʋmmak oka moyuma kʋt ibai ishi chatuk bano, yʋmmʋt ik hʋchim iksho hokmʋto, ushi ʋhleha hʋchia keyu, amba i̱ki iksho hʋchia hoke.

⁹ Mihmʋt anonti pi̱ki ʋt haknip a̱sha pishno chohmi hosh pi kostininchi chatuk; mihma yʋmma e holitobli tuk ʋt shilombish puta I̱ki yokak heno i̱ nutakʋt il ai asha cha, pi okcha̱ya he ak osh pim i̱ shahla hinla keyu ho̱?

¹⁰ Yohmi ka yʋmmak okʋto nitak kanomosi ta̱kla ho̱ ilap ai ahni hosh pi kostininchi chatuk mʋhlishke: amba yʋmmʋto nan isht pim ai achukmʋt, ilap nan ai ʋlhpiesa kak o̱ il ibai isha he ak atok oke.

¹¹ Yohmi ka himonasi ka isht a kostininchi hokʋno isht ai yukpa he ik ahobo, amba nukha̱klochi; yohmi ak inli kia yʋmma isht ai yʋmohmi ʋhleha hokʋno i̱ himmak o̱ nan isht ai ʋlhpiesa nan ʋni achukma ka i̱ wayʋchi hoke.

¹² Yohmi hoka hʋch ibbak ʋt aka pit takali ka ho wakelí, micha hʋch iyi̱kalaha ik hlampko ka apissʋlechit ho hilechí;

¹³ Micha hʋch iyi ya̱ hina apissa ho̱ hʋsh im ikbashke, keyukma hanali okpulo yʋto tahlofa hinla hoke; amba yʋmmʋto ik yohmo hosh hlakofi kak o̱ ahni fehna hetuk oke.

¹⁴ Achunanchit hatak puta ka it i̱ nanaiyʋt, nan ai ashʋchi iksho ya̱ hʋsh ieshashke, yʋmmʋt iksho ka hatak nana kia Chitokaka ya̱ pisa he keyu hoke.

¹⁵ Nana ka ahah! hʋsh ai ahnashke, keyukma hatak kanima kʋt Chihowa yʋt isht i̱ kana ya̱ i̱ hlakofi yoba ná; mikmʋt na homi okpulo hakshish kia offot kohcha cha, hʋchi ataklʋmmi na la̱wa kʋt isht ai okpula hinla hoke.

¹⁶ Anonti hatak haui, micha ʋbanumpa ik ahobalo kanima kʋt, Esau yokʋt ilhpak himonna ʋpa yokak o̱ ʋttahpi nana kʋt ilap ai immi hatuk ʋt kanchi tok a̱, chohma hinla kʋt anta yoba ká.

¹⁷ Yohmi ka kaniohmit i̱ himmak okʋno nana isht ai yukpa he anumpa tok a̱ isha he ai ahni kia, ʋlhpesa ik im ahno tok a̱ hʋsh ithana; yohmi ka im anukfila ha̱ inlʋcha he yʋmmak o̱ achunanchit nishkin okchi mihinti hosh asihi̱hla ak inli kia, ik ahayucho ki tok.

¹⁸ Yohmi ka nʋnih yʋmma potola hinla, micha luak isht luhu̱wa, hoshonti lusa, micha okhlilika, micha apeli chinto aiena ho̱ hʋsh ona keyu,

¹⁹ Yohmi kʋt isht‐pu̱fa yʋt ohonla, micha anumpa ʋlhpisa puta isht anumpohonli ma, yʋmma okla hʋt haiyaklo mʋt, anumpa yʋmmʋt himmakma ilap a̱ isht ik im anumpo ka chi̱ ka asilhha tok:

²⁰ Yohmi kʋt nana im anuhumpa kʋt kaniohmit ʋlhpesa ahnit okla haponakla he keyu hatok; yohmi ka nan ʋlhpoba yak oh kia nʋnih ha̱ haleli hokmʋt, yʋmmʋt tʋli isht boʋt illa hi atok, keyukmʋt iti falaia tʋli halupa achaka yo̱ isht bahʋt hlopulla hi atok:

²¹ Micha na pisa yʋmmʋt isht a nukshopa fehna he ʋlhpiesa hatuk o̱, Moses ʋt, Sa nukshopa fehna hosh sa wʋnihinchishke, achi tok:

²² Amba hʋchishno yʋto nʋnih Saion, micha Chihowa okcha̱ya in tʋmaha chinto, Chelusalem ʋba talaia, micha enchil ʋhleha, a holhtina iksho kamohmi, itahoba chinto ai asha,

²³ Micha ʋttahpi im iksa hohchifo hʋt ʋba a holitopa yak o̱ a holihi̱so, micha Chihowa moyuma ka nan im apesa, micha hatak ʋlhpiesa puta imi shilombish ʋt ai a̱hli toba tok,

²⁴ Micha Chisʋs nan it im ʋlhpisa himona ya̱ ai‐a̱hlichi, micha issish nan isht o̱ fimmi, yʋmmak osh Ebel ʋt a yʋmohmi tok a̱ nana achukma i̱ shahli ho̱ isht anumpuli aiena ho̱ hʋsh ona hoke.

²⁵ Ahah! ahnit yʋmmʋt anumpuli ka hʋch ik i̱ haponaklo ki ná. Yohmi ka yakni paknaka ai anumpuli ka ik i̱ haponaklo mʋt hlakofi tok keyu ka, yʋmmʋt ʋba a holitopa yak o̱ auet anumpohonli ho̱ il i̱ filʋmmi hokak heto, pi hlakofa he keyu fehna hoke:

²⁶ Yʋmmak o̱ im anumpa hosh nitak yʋmmak ash yakni ya̱ winalihinchi tok; amba himonasi kʋno yʋmmʋt nana anoli kʋt, Anonti himonna ha yo̱ yakni ak bano keyu, amba ʋba yakni yak kia winalihinchi li mak inli, achishke.

²⁷ Mikma, Anonti himonna ha yo̱ achi, anumpa ilʋppʋt nana puta kʋt winakahancha hinla kʋto, toba hatuk osh, ont akshot taha chi̱ ho̱ isht otʋni na nana puta kʋt winakahancha he keyu kak osh a̱sha moma chi̱ hatok.

²⁸ Yʋmohmi ka apehlichika yʋmmʋt aksha he keyu mak o̱ il ishi hokʋt, Chihowa yʋt isht i̱ kana yoka il ieshi pulla hosh, holitoblit i̱ nukshopa ai a̱hli ai ʋlhpiesa hosh Chihowa yoka nan isht il im ahantashke.

²⁹ Pin Chihowa yokʋt luak nan okpʋnit kahanchi yoka.