Heblu 11 - Chahta Holisso Holitopa 1886

Na yimmika yʋt nana hatuk a̱ anoli, 1; 7 nayimmi isht ai ʋni kʋt ʋbanumpuli ti̱kba ash ot nan im anukfila na otʋni tok a̱ anoli.

¹ Na yimmi kak osh nana il isha he ai ahnit e hoho̱yo ka nan isht pim ai a̱hli yoke; micha nana ke peso ka nan isht ai atokowa yoke.

² Yʋmmak atuk pulla kak o̱ hatak tikba ʋhleha hokʋt nan annoa achukma ka isht ai atokowa tok oka.

³ Na pi yimma pulla kak osh yakni puta kʋt Chihowa im anumpa hak o̱ isht a toba tok a̱ isht il akostininchi hoke; yohmi hatuk o̱ nana puta e pihi̱sa kʋt nana puta otaiyani kak o̱ isht atoba tok keyu.

⁴ Na yimmi pulla kak osh Ebel okʋt ʋba isht aiokpʋchi achukma kʋt Ken immi ya̱ i̱ shahli fehna ho̱ Chihowa hoka ont im issa tok; yʋmmak ash o̱ nana ka ai ʋlhpiesa kʋt isht atokowa kʋt, i̱ na hʋlbina puta ka Chihowa hokʋt atokolit im aiokpanchi tok; micha yʋmmak atuk pulla kak o̱ illi tok kia anumpuli kʋt imomʋshke.

⁵ Na yimmi pulla kak osh Enok ʋt toshowa kʋt nan‐illi ik peso ka chi̱ kak atok; micha Chihowa ak osh tosholi hatuk oka, iksho ki tok: ik toshowo ki̱sha kʋt Chihowa yoka yukpali tok, nan isht atokowa ilʋppak o̱ i̱shi hatok okʋt.

⁶ Amba na yimmi iksho hokʋno kaniohmit yukpala himma keyu hoke; yohmi hoka kʋna hosh Chihowa im onakmʋt, yʋmmak osh ahanta, micha yʋmmak okʋt ilap o̱ achunanchit hoho̱yo puta hokʋno nan im atobbi aiena ka yimmi pullashke.

⁷ Noah yoka Chihowa hʋt nana im anohonli ma, nana ka ik peso ki̱sha ak inli kia, nʋkshopʋt holitobli hokʋt, i̱ yimmi pulla hosh in chuka‐chʋfa yʋt isht ai okchaya hi a̱ peni chito ya̱ ikbi tok; micha yʋmma yʋmohmi kak osh okla puta ai asha tok ash na palʋmmi ʋlhpisa hʋt onʋtula he ʋlhpesa ka isht otʋninchi tok; micha na yimmi isht ai ʋlhpiesa iesha hi ʋlhpesa hosh toba tok.

⁸ Eblaham okʋt yakni inla yʋmma i̱ himmak o̱ immi tobʋt isha hi o̱, iʋt ona chi̱ ho̱ i̱ howa ma, yimmi pulla kak osh im antia tok; micha yʋmmak o̱ ia li, ahni keyu kia, kohchʋt ia tok.

⁹ Na yimma pulla kak osh yakni im issa tok ash ont ahanta kʋt, yakni ʋt immi keyu ho̱ chiyuhmi hosh Aisaak, micha Chekob ita tuklo, yʋmmʋt nan im issa tok mihi ash iesha he im ai ʋlhpesa ak inli ka ai itapehʋt ʋlhtipo anu̱kaka yo̱ aha̱shwa tok:

¹⁰ Tʋmaha chito intolahpi yʋt kʋllo achukma yʋmmak oka Chihowa hak osh apesʋt bohli, micha ikbi yak o̱ hoho̱yo hatok okʋt.

¹¹ Na yimmi pulla kak osh anonti Sela ilap inlit isht hlampko ishi hosh chakali cha, ʋlla sholi tok, ai yʋmohmi chatuk a̱ ont iʋt kʋnia kia, yʋmmak ash ot nan im issa tok a̱ ai a̱hli yoke ahnit i̱ yimmi hatok okʋt.

¹² Yʋmohmi hoka achʋfa, yʋmmʋt illi ak o̱ chiyuhmi kia, laua kʋt fochik ʋba shutik ai asha ka itilaui, micha shinuk a holhtina iksho okhʋta ontalaka ai asha kak o̱ chiyuhmi hosh a toba tok.

¹³ Ilʋppʋt momʋt yimmi imoma hosh illi tok; nan im ihi̱sa tok a̱ ishi tok keyu; amba yʋmmʋt hopaki fehna moma ho̱ pihi̱sa kʋt, yʋmma yimmi ai a̱hli fehnʋt anukfoyuka hosh, yakni paknaka ai asha kʋt, peh no̱wʋt a̱ya, ai anta na hopaka he ik im iksho yosh il anohonli tok.

¹⁴ Kʋna hosh yʋmma chohmi ka achi hokʋto, ai ahanta he yakni yo̱ hoyo kʋt otʋninchi fehna hoka.

¹⁵ Yohmi ka yakni yʋmma a kohchʋt minti tok ʋt anukfihinli hatok okmʋt, a falama hi ʋt takanli akinli tok mʋhlishke.

¹⁶ Amba himonasi kʋno yakni achukma i̱ shahli, yʋmmʋt ʋba yakni yak o̱ bʋnna hoke: yʋmohmi hoka in Chihowa isht a hohchihi̱fo kʋt, Chihowa hʋt hofahya keyu, yʋmmak oka tʋmaha chito yo̱ im ataiyahli hatok okʋt.

¹⁷ Na yimmi pulla kak osh Eblaham okʋt nana ka imomaka pisa ho̱, Aisaak a̱ im issa tok; micha nana im ihi̱sa puta kash ishi hatuk okʋt ushi yʋmmak i̱ bieka tuk ʋt im issa tok.

¹⁸ Yʋmmak o̱ isht anumpa hosh Aisaak ak o̱ chi unchululi kʋt isht a toba hi oke, achi tok.

¹⁹ Chihowa yokʋt, illi tuk kia, falaminchit tanicha he bano hoka, ai ahni pulla hatuk mak osh yʋmmʋt illi tuk a̱ chiyuhmichit falaminchit ishi tok.

²⁰ Na yimmi pulla kak osh Aisaak okʋt Chekob, Esau ita tuklo kʋt i̱ himmak nana im akaniohma hi oka im anolit yukpali tok.

²¹ Na yimmi pulla kak osh Chekob okʋt illit isht ma̱ha̱ya mʋt, Chosef ushi a̱ ita tuklont yukpali tok; mihmʋt in tʋbi wishakchi ak o̱ on hlipia hosh Chihowa ha̱ aiokpʋchi tok.

²² Na yimmi pulla kak osh Chosef okʋt illi mʋt, Islael im ʋlla ʋhleha hokʋt wihʋt itʋnowa hi oka isht anumpuli tok; micha ilap foni yoka kanimihcha hi oka im apesa tok.

²³ Na yimmi pulla kak osh Moses okʋt ʋttahpi mʋt, ʋlla aiokli fehna ho̱ i̱ki, ishki ita tuklo kʋt pisa hatuk osh, luhu̱mi na hʋshi tuchina ona tok; micha mi̱ko i̱ nan ʋlhpisa ya̱ i̱ nukshopa tok keyu.

²⁴ Na yimmi pulla kak osh Moses okʋt asʋnot taiyaha mʋt, Feleo ushetik ushi isht a hohchifa he ik ai ahno kʋt;

²⁵ Chihowa im okla ʋhleha hak o̱ na palʋmmi isht ibai ilbʋsha kak osh nitak kanomosi takla, nan ai ashʋchika ai isht ilaiyukpʋt ahanta hi atuk ʋt im i̱ shahli tok:

²⁶ Yohmi kʋt Klaist a̱ i̱ yimmit isht a hofahya yak osh nan isht ilaiyukpa chinto kʋt Echip anu̱kaka nan im ila̱yak puta ai asha ka im i̱ shahli tok; nan isht ʋlhtoba nan isht ilaiyukpa yak o̱ hoho̱yo tok okʋt.

²⁷ Na yimmi pulla kak osh yʋmmak ash ot Echip a̱ issa kʋt, mi̱ko yokʋt isht i̱ nukkilli ya̱ i̱ nukshopa tok keyu yohmi kʋt nishkin ʋt pisa he keyu yʋmmak okʋno pi̱sa kash chiyuhmit nuktaiyalʋt achunanchit ahanta tok.

²⁸ Na yimmi pulla kak osh yʋmmak ash ot ʋbanʋblit ont ai, micha issish isht o̱ fimmi aiena ka holitobli na, ʋttahpi ahambi yʋmmʋt ik halelo ka chi̱ hatok

²⁹ Na yimmi pulla kak osh okla hʋt okhʋta humma yʋt yakni shila chiyuhmi ho̱ a hlopulli tok; yʋmma Echip okla hokʋt hobachi hosh okai illit taiyaha tok.

³⁰ Na yimmi pulla kak o̱ Cheliko tʋli isht a holihta yokʋt okla apakfohompa na nitak untuklo ma aka itula tok.

³¹ Na yimmi pulla kak osh Lehab ohoyo haui yatuk ʋt, yimma he keyu ʋhleha hoka ibafo̱kʋt illi tok keyu, na ti̱kba pisa ʋhleha hoka i̱ kanʋt ilap in chuka yoka ik chukowá, im ahni hatok okʋt.

³² Micha himmakma nanta hak o̱ achi la chi̱? Yohmi kʋt Keteon, Balak, Samson, Chefhli, Lewi aiena, micha Samuel, micha hopaii ʋhleha aiena ka isht anolit ont taiyahli la he keyu hoke:

³³ Yʋmmak okʋto na yimmi pulla kak osh apehlichika puta imaiyachi, nan ai ʋlhpiesa ka yʋmihinchi, nana im ihi̱sa tok a̱ ihi̱shi, koi hochito itakha ya̱ akʋmmi aiena tok;

³⁴ Luak libbi isht lua mosholihinchi, bʋshpo falaia halupa ai i̱ hlakoho̱fi, tikambi tuk ʋi hlampko, itibi kʋt kʋllot isht i̱ shahlit ma̱ha̱ya, oklushi inla in tʋshka chipota ya̱ falaminchit tihlihinli aiena tok.

³⁵ Ohoyo ʋhleha ha̱ im illi tuk ʋt anonti falamʋt okcha̱ya na ihi̱shi tok; mihma inla yʋt a hlakofa he im issa kia, ʋlhpesa ik ahno hosh nan isht a hotopa; issikkopa pihi̱sa, yohmi kʋt falamʋt tani achukma i̱ shahli ho̱ isha he ak atok:

³⁶ Mihma inla yʋt isht ik ahobalo anumpa okpulo fehna, micha fʋma isht a hotopa fehna puta, mihmʋt anonti talakchit aboha kʋllo foho̱ka aiena ka isht ai imomaka pihi̱sa tok:

³⁷ Okla tʋli isht boho̱wa, bʋshʋt ita hokoho̱fa, isht ai imomaka pihi̱sa, bʋshpo falaia isht ai ihinli: chukfi ʋlhpoba hakshup, micha issi kosoma hakshup aiena ho̱ foyukʋt yakni haiaka ai itʋnowa, nana ik im iksho kamohmi hosh, nan ilbʋshʋt issikkopa aiena tok;

³⁸ Yʋmmak oka yakni yʋt immi ha he ik ono hatok; yakni haiaka nʋnih anu̱ka, micha tʋli chiluk, micha yakni chiluk anu̱ka aiena ka okla a̱shʋt itʋnowa tok.

³⁹ Mihmʋt ilʋppʋt moyumʋt na yimmi pulla kak osh nana annoa achukma ka isht ai atokowa kia, nana im ihi̱sa tok a̱ ik isho ki tok.

⁴⁰ Chihowa hak osh nana inla achukma ho̱ pim ataiyahli ka, okla pibai acha̱fa keyu kʋt ai a̱hlit im ʋlhtaha hi atok keyu hoke.