Heblu 10 - Chahta Holisso Holitopa 1886

Ʋba nan‐ʋlhpisa ho̱ na nipi ʋba isht aiokpʋchi hokʋno nan ashʋchi isht kancha he keyu, 1: 10 amba Klaist haknip osh himonna ha nan ʋlhtoba hosh illi ha yokʋto nan ashʋchi ya̱ isht kanchi; 19 achunanchit nan ai yimmika ya̱ kʋllot ieshit Chihowa ya̱ aiokpahancha he i̱ miha.

¹ Yohmi ka ʋba nan ʋlhpisa yokʋt nana achukma puta ʋla he ak o̱ isht ʋlhpisa hatok; yohmi kʋt nana yʋmmak o̱ isht a holba ai a̱hli keyu hokʋt, nan ai ashʋchi isht ʋlhtoba puta yʋmma afʋmmi aiyuka ka pit im ihi̱sa na bilia mak o̱ isht ahanta ʋhleha hoka nuktalalit ai a̱hlicha himma keyu hoke.

² Yohmi tok okma, ilʋppak oka pit im issa kʋt issa hi atok keyu̱? yohmi ka aiokpʋchi yakohmi ʋhleha hokʋt himonna kashofa ha yokʋt, nan ai ashʋchi puta isht il akostininchi yʋt ik im iksho ka hi atok oka,

³ Amba nan ai ashʋchi isht ʋlhtoba yʋmmak ash o̱ afʋmmikma anonti nan ai ashʋchi isht ai otaiyani beka tok.

⁴ Yohmi ka wak‐nakni, micha issi kosomushi issish aiena kʋt nan ai ashʋchi puta ka isht kancha he keyu kamohmi hoka.

⁵ Yʋmohmi hoka yakni ilʋppa ʋla mʋt, Nan ai ashʋchi isht ʋlhtoba, micha ʋba isht aiokpʋchi aiena hokʋno chik ahno tok; amba haknip o̱ is sʋm ikbi tok, achi tok:

⁶ Nan ai ashʋchi isht ʋlhtoba lua yokʋno isht a chi yukpa tok keyu hoke.

⁷ Yohmi hatuk oka, yakeh! nan isht si annoho̱wa holisso a foyuka hoka nan ish ai ahni tok a̱ ataiyahli la chi̱ hosh ʋla li hoke, Chihowa ma! achi li tok.

⁸ Ti̱kba kash nan ai ashʋchi isht ʋlhtoba, micha ʋba isht aiokpʋchi, micha nan ai ashʋchi isht ʋlhtoba lua aiena ilʋppa ʋba nan ʋlhpisa yak atuk pulla kak o̱ isht ahanta hoka, chik ahno mʋt, anonti yʋmma isht a chi yukpa keyu ki tok, achi tok.

⁹ Yohmi mʋt, Yakeh! nan ish ai ahni tok a̱ ataiyahli la chi̱ hosh ʋla li hoke, Chihowa ma! achi kʋt, nana ʋmmona kash o̱ isht kanchi hosh nan atukla kash o̱ ai a̱hlicha chi̱ hatok.

¹⁰ Nan ai ahni tok yʋmmak atuk pulla kak o̱ Chisʋs Klaist ʋt himonna achʋfa ma, haknip a̱ im issa tok ak o̱ isht a pi kashofa hoke.

¹¹ Yohmi ka na holitompa isht ʋtta puta kʋt nitak moma ka hikiʋt nan isht ahanta kʋt, nan ai ashʋchi isht ʋlhtoba mih ash inli, yʋmmʋt nan ai ashʋchi isht kancha himma keyu ka, himonna̱ pit im ihi̱sa chatuk:

¹² Amba hatak ilʋppʋt o nan ai ashʋchi isht ʋlhtoba achʋfa ka, im issa ha ya tok ʋt, Chihowa ibbak isht impak imma ak o̱ binilit bilia hoke:

¹³ Himak a pilla ma̱ha̱ya hokʋno in tʋnʋp ʋhleha hokʋt ilap iyi ai o̱ hikia yo̱ toba he, ai ahnit ahanta hoke.

¹⁴ Yohmi ka nan ai ashʋchi isht ʋlhtoba achʋfa ho̱ kashofa ʋhleha yʋmmak okʋno isht nuktalalit ai a̱hlichit bilia hatok.

¹⁵ Yʋmmak oka anonti Shilombish Holitopa yak kia nan atokowa pim anoli hoke; yohmi kʋt anonti tikba ka achi ha yak osh,

¹⁶ Nan it im ʋlhpisa ilʋppak o̱ nitak yʋmma i̱ himmak okʋno it im apihi̱sa likmʋt, chu̱kʋsh fehna ka a̱ nan ʋlhpisa yoka nukfohkihinchi la he, micha im anukfila fehna ka ai o̱ holissohonchi la he;

¹⁷ Mikmʋt nan im ai ashʋchi, micha ʋba nan ʋlhpisa kobaha̱fi tok puta ka himak a pilla ma ak ithaiyano ka hi oke, Chitokaka yʋt achishke, achi tok.

¹⁸ Yohmi ka ilʋppa isht a kashofa kʋt a̱sha hokʋno, anonti nan ai ashʋchi isht ʋlhtoba himmakma im issa he iksho hoke.

¹⁹ Yʋmohmi hoka itibapishi li ʋhleha ma! Chisʋs im issish ak atuk pulla kak o̱ nukwa̱ya iksho hosh aholitopa fehna ka e chukowa hoke:

²⁰ Yohmi kʋt aholitopa isht ompoholmo takali yʋmma achi kʋt haknip ak oke, yʋmmak atuk pulla kak o̱ hina himona, micha okcha̱ya holitoblichit pim apesa tok o̱ e chukowa hoke.

²¹ Yohmikmʋt na holitompa isht ʋtta chinto Chihowa im aboha i̱ shahli hosh pim ahanta hokʋt;

²² Chu̱kʋsh ai a̱hli, micha i̱ yimmi ai a̱hli fehna, pi chu̱kʋsh mʋt issish o̱ fimmʋt, isht il il‐akostininchi ik achukmo ka ai i̱ filʋmmit, pi haknip okʋt oka kashofa achukma isht ʋlhchifa tuk aiena ho̱ isht i bili̱kasi il onashke.

²³ Nana pim ihi̱sa tok ʋt ai a̱hli yoka, nana pi yimmi il il apihi̱sa tok ʋt shanaia iksho hosh il ai a̱hlashke:

²⁴ Micha nana ka isht it anukfilli hosh iloh it i̱ hullot, micha nan isht ʋtta achukma puta ka e yʋmohma chi̱ kʋt, il itaiyimitachashke:

²⁵ Kaniohmi kʋt ai yʋmohmi chatuk a̱ chiyuhmit il itʋnaha he tuk ʋt kil isso kashke: amba nana ka it i̱ mihʋt, nitak yʋmmʋt ʋla̱ hosi ka hʋsh pisa kak osh, i̱ shahlichi fehnʋt hʋsh yʋmohmashke.

²⁶ Yohmi ka nan ai a̱hli ka il ithaiyana ha yokʋt, pishno inli pim anukfila hosh il ashʋchi hokmʋno, nan ai ashʋchi isht ʋlhtoba yʋt himmakma takanli keyu hoke;

²⁷ Amba isht a nukshobla he na palʋmmi ʋlhpisa, micha isht i̱ nukkilli luak aiena ka hoho̱yot ahanta he; yʋmmʋt ʋbanumpa ai ahli i̱ sanali ʋhleha hoka okpʋnit tʋmola he ak osh takanli hoke.

²⁸ Moses i̱ nan ʋlhpisa yoka ik holitoblo hatuk ʋt nan atokowa anoli tuklo, tuchina, kanima kʋt pi̱sa ho̱ isht i̱ nukha̱klo kia iksho ho̱, illi hatok oke.

²⁹ Yohmi ka kʋna hosh Chihowa Ushi yoka iyi nuta bohlit a hʋhlihinchi, micha nan it im ʋlhpisa issish yʋmmak o̱ isht a kashofa tok ash osh nana ik holitopo isht ahobʋchi micha nan isht i̱ kana Shilombish Holitopa ya̱ nan isht ik ahobalo hatuk okʋto, nan isht ilbʋsha yʋt i̱ shahli katiohmi ho̱ isht ilbʋsha he, hʋchim ahoba ho̱?

³⁰ Yohmi ka, Ai ʋlhpiesa isht atobba hi okʋt ʋmmi hoke, ilʋppak ash achi tok yʋmmak okʋno il ithana; falaminchit atobbi la he, Chitokaka yʋt achishke. Mikma anonti, Chitokaka yʋt im okla ʋhleha hoka nan im apesa hi oke, achi kʋt takanlishke.

³¹ Chihowa okcha̱ya yoka nan im ʋlhpisa chi̱ hosh ibbak a foyuka kʋt nana ka isht a nʋkshopa he ʋlhpesa hoke.

³² Yohmi kia nitak tok ash o̱ hʋsh ithaiyanashke, yʋmmak amo nana ka hʋsh ithaiyana ha yokʋto, na palʋmmi chinto puta ka it i̱ kahanlot isht hʋch ilbaha̱sha tok:

³³ Yohmi kʋt isht a hofahya, micha na palʋmmi puta hʋchi onʋtuyula hosh okla a yopissa mak o̱ hʋsh tohomba kʋt hʋchi yʋmohmi; micha kanimikma yʋmma yʋmohmi puta kash o̱ ibai achʋfa hʋsh tohomba kʋt chiyuhmi mak inli tok oke.

³⁴ Yohmi ka yuka talakchi yosh ahanta li ma, hʋs sʋba nukha̱klo tok; micha hʋchim ila̱yak puta ka hʋchi̱ wehpohonli kia, ʋlhpesa ahnit hʋchi yukpa kʋt nana okpula he keyu, micha achukma i̱ shahli hosh ʋba aholitopa yoka hʋchin tuyula kʋt, hʋsh il ithana hatuk okʋt.

³⁵ Yʋmohmi hoka na yimmi hʋchi anukfoyuka kash osh hʋch ik kancho kashke: yʋmmak osh nan isht ʋlhtoba nan isht il aiyukpa chinto ho̱ ieshi hoke.

³⁶ Yohmi ka nuktaiyalʋt achunancha he hʋchim ʋlhpiesa; yohmi hosh Chihowa nan ai ahni tok a̱ hʋsh ataiyahli ha yosh, nana auet hʋchim ihi̱sa tok ash hʋsh iesha hi atok.

³⁷ Himak a pilla chekosi fehnakma ʋla hi atok ʋt, ʋla chi̱ kʋt sʋlaha hosh ʋla chi̱ keyu hoke.

³⁸ Yohmi ka ai ʋlhpiesa yokʋto na yimmi pulla kak osh okcha̱ya chi̱; amba hatak nana hosh falama hok mʋno, sa shilombish ʋt isht im ai yukpa hi ʋt iksho hoke.

³⁹ Amba pishno ʋto falama cha, nan isht ai ilbʋsha bilia pihi̱sa he ʋhleha yʋmmak okʋno il ibai achʋfa keyu, amba na yimmi cha, shilombish okʋt okcha̱yʋt bilia yʋmmak o̱ il ibai achʋfa hoke.