Heblu 1 - Chahta Holisso Holitopa 1886

Klaist ʋt I̱ki Chihowa ya̱ itilaui kʋt annoa, 1: 4 enchil puta i̱ shahli fehna; 14 enchil ʋhleha hʋt nan isht ai ʋtta ka anoli.

¹ Chihowa hʋt nitak cha̱shpo ilaiyuka, micha a kaniohmi mʋt ilaiyuka hosh pin tikba ʋhleha hopaii ʋhleha ak o̱ isht ai im anumpohonli kʋt,

² Pola̱ka ilʋppʋt ai ishtaiyopi mak o̱ ilap Ushi yo̱ isht a pim anumpohonli kʋt, yʋmmak osh nana moma ka iesha he im ai ʋlhpiesa mak o̱ atokoli tok; micha ʋba yakni, micha yakni ilʋppa a moyuma ka yʋmmak ash o̱ isht ai ikbi ak inli tok:

³ Yʋmmak ash osh Chihowa isht a holitopa shohmalali, micha Chihowa mih fehna yatuk, micha nan oklu̱ha ka im anumpa kʋllo ai a̱hli kak o̱ isht ieshi hosh ai ashʋchika isht a pi̱ kashofa hi a̱ ataiyahli tok osh, Nan oklu̱ha imaiya ʋba chaha moma i̱ shahli ka a binili im isht impak imma ak o̱ binili tok.

⁴ Nan iesha he im ai ʋlhpiesa hatuk ʋt ieshi hatuk osh, ilap hohchifo isht a holitopa kak osh enchil ʋhleha ha̱ i̱ shahli fehna hatuk osh kaniohmit holitopa kʋt yʋmma i̱ shahli fehna hoke.

⁵ Nitak nanta kash o̱ enchil ʋhleha ha̱ achʋfona kia, Chishno yʋt sʋso chia mak o̱ himak nitak a̱ chi tobachi lishke; micha anonti ilap ʋt, Ʋno yak o̱ Sʋso hachi̱, mikmʋt, ʋno yʋt I̱ki sia hachi̱ hoke, im achi tok o̱?

⁶ Micha anonti, Tobahpi yash o̱ yakni paknaka ya̱ isht ʋla mʋt, Chihowa im enchil ʋhleha hʋt moyumʋt aiokpahanchashke, ahanchishke.

⁷ Mikmʋt enchil ʋhleha hano isht anumpuli kʋt ilʋppak o̱ achishke, Yʋmmʋt im ehchil ʋhleha hokʋno mahli chiyuhmichit, mikmʋt in tishu hano luak libbi chiyumichi hoke.

⁸ Amba Ushi yokʋno ilʋppak o̱ im achishke, Chihowa ma! ish ai o̱ binili holitompa kʋt hikia biliʋt peh biliʋshke: nan ai ʋlhpiesa tʋbi yak osh ish apehlichika yoka in tʋbi yoke:

⁹ Chishno yokʋt nan ai ʋlhpiesa kak o̱ ish i̱ hullo cha, nan ik ʋlhpeso yokʋno ish i̱ nukkillishke; yohmi ka Chihowa, chin Chihowa yak osh nan isht ai yukpa bilia ya̱ laua i̱ shahli ho̱ isht chi ahʋmmi kʋt, ish ai itilaui tuk a̱ i̱ shahli chikbi tok.

¹⁰ Micha Chitokaka chishno yak osh ʋmmona kash inli ho̱ yakni ilʋppa intolahpi ka ish boyuhli tok; mihmʋt nana moma ʋba shutik ai asha ka, chibbak ak osh ihi̱kbi tok.

¹¹ Yʋmmak okʋto ont ai okpulo kʋt taha kia, Chishno yokʋto ish ahanta he; mikma yʋmmak okʋto moyumʋt sipokni kʋt na fohka yo̱ chiyuhma hi oke:

¹² Mikma anchi yak inli ho̱ chohmichit ish pohla he; mikma yʋmmak ash ot inlʋt toba he: yohmi kia Chishno yokʋto mih yash inli chia, micha chim afʋmmi hokʋt ont ataha he iiksho hoke.

¹³ Yohmi kia nitak nanta kash o̱ enchil ʋhleha achʋfona kia, Sʋbbak isht impak‐imma ak o̱ ish a binili na chin tʋnʋp ʋhleha hoka chiyi ai o̱ hikia yo̱ ikbi li hayashke, im achi tok o̱?

¹⁴ Yʋmmak ash ot moyuma kʋt nan isht ahanta shilombish osh ai okcha̱ya pisa he im ai ʋlhpiesa ʋhleha yʋmmak o̱ nan isht im ahanta chi̱ ʋlhtoka yo̱ keyu̱?