Genesis 47 - Chahta Holisso Holitopa 1886

¹ Yohmi mʋt Chosef ʋt iʋt Falaoh ha̱ ont im anolit, A̱ki, micha itibapishi li ʋhleha, micha i̱ nanʋlhpoa chipinta, micha i̱ nanʋlhpoa hochito, micha nana im a̱sha tuk moma kʋt Kenan yakni ya̱ kohchʋt ʋlʋshke; atuk osh yakeh, Koshen yakni ya̱ aiashʋshke, achi tok.

² Mihmʋt itibapishi kanimi, hatak tahlapi ho̱ ishi cha Falaoh itikba ya̱ hilechi tok.

³ Mihma itibapishi ʋhleha ha̱ Falaoh hʋt, Nanta ho̱ ishit hʋsh asha chatuk o̱? im achi tok. Mihma Falaoh ha̱, Pishno, micha pi̱ki ʋhleha il aiena, chin tishu ʋhleha hʋt nanʋlhpoa apesʋchi pia hoke, im achi tok.

⁴ Micha Falaoh ha̱, Cheki itin takla ya̱ yakni ya̱ il aiasha chi̱ hosh e la hoke: Kenan yakni ya̱ hohchʋfo hʋt palʋmmi fehna hatuk o̱ chin tishu ʋhleha hʋt i̱ nanʋlhpoa ai impa yʋt ik im iksho hoka: yʋmohmi hoka inta, chin tishu ʋhleha hʋt Koshen yakni ak o̱ aiashashke, e chim asilhhʋshke, im achi tok.

⁵ Mihma Falaoh hʋt Chosef a̱ im anumpulit, Chi̱ki, micha chitibapishi ʋhleha hʋt chim ʋlʋshke:

⁶ Echip yakni ʋt chi tikba talaiʋshke; yakni ai achukma i̱ shahli kak o̱ chi̱ki, micha chitibapishi ʋhleha ha̱ ish a̱ binohlechashke, Koshen yakni ak o̱ aiashashke; mikma hatak kʋna hosh tu̱shpa achukma kʋt iba foka ho̱ ish ithanakmʋt, a̱ nanʋlhpoa pehlichi ish hiohlechashke, im achi tok.

⁷ Mihma Chosef ʋt i̱ki Chekob a̱ ishit chukowa cha, Falaoh itikba ya̱ hilechi tok; mihma Chekob ʋt Falaoh ha̱ yukpali tok.

⁸ Mihma Falaoh hʋt Chekob a̱, Nitak okcha̱yʋt ish ahanta afʋmmi moma kʋt katohmi cho? im achi tok.

⁹ Mihma Chekob ʋt Falaoh ha̱, Nitak okcha̱yʋt ahanta li tuk ʋt afʋmmi tahlepa achʋfa cha pokoli tuchina hoke: nitak okcha̱yʋt ahanta li̱ afʋmmi puta kʋt kanomosi cha, ik achukmo tuk oke; micha a̱ki ʋhleha hʋt nitak okcha̱yʋt ahanta tok afʋmmi puta ka̱ ik ono hoke, im achi tok.

¹⁰ Mihma Chekob ʋt Falaoh ha̱ yukpali cha, Falaoh itikba ya̱ ʋttʋt kohchʋt ia tok.

¹¹ Mihma Chosef ʋt i̱ki, micha itibapishi ʋhleha aiena ka̱ Echip yakni binohlechi cha, Falaoh hʋt miha tuk mak o̱, yakni ai achukma i̱ shahli Lameses yakni ya̱ aiasha chi̱ ho̱ ima tok.

¹² Micha Chosef ʋt i̱ki ya̱, micha itibapishi ʋhleha ha̱, micha i̱ki in chuka achʋfa moma ka̱ chuka achʋfa ʋlhpi̱sa ho̱ pʋska ipeta tok.

¹³ Mihma yakni yʋmma moma ka̱ pʋska ʋt iksho tok: hohchʋfo hʋt palʋmmi hatuk oka; yohmi ma Echip yakni, micha Kenan yakni moma kʋt hohchʋfo kak osh kotʋt taha tok.

¹⁴ Atuk o̱ Chosef ʋt onush ishit chumpa ka̱ Echip yakni, micha Kenan yakni ya̱ tʋli holisso ʋt a̱sha tuk a̱ moma itʋnahlit ishit tahli tok: mihma Chosef ʋt tʋli holisso yash Falaoh ha̱ in chuka ya̱ isht ona tok.

¹⁵ Atuk o̱ Echip yakni, micha Kenan yakni aiena ka̱ tʋli holisso ʋt taha ma, Echip okla moma kʋt Chosef a̱ im ona cha, Pʋska pi ipetá; nanta katiohmi ho̱ chi tikba a pilla chi̱ cho? tʋli holisso ʋt taha hoka, achi tok.

¹⁶ Mihma Chosef ʋt, Hʋchi̱ nanʋlhpoa ak o̱ hʋsh imashke; micha tʋli holisso hʋt taha hokma, nanʋlhpoa yak okmʋno hʋch ima la chi̱ hoke, achi tok.

¹⁷ Mihma Echip okla hʋt i̱ nanʋlhpoa ya̱ Chosef a̱ isht im ona tok: mihma Chosef ʋt issuba, micha nanʋlhpoa chipinta, micha nanʋlhpoa hochito, micha issuba haksobish falaia aiena a puta kak o̱ itatobʋt pʋska ima tok; micha afʋmmi yʋmma i̱ nanʋlhpoa moma ak atuk mak o̱ pʋska ipeta tok.

¹⁸ Afʋmmi yʋmmʋt ont taha ma, afʋmmi atukla ka̱ im onʋt, Pin tʋli holisso hʋt taha ka̱ a̱ shahli ha̱ il in luhma he keyu hoke; a̱ shahli hʋt pi̱ nanʋlhpoa hochito ya̱ i̱shi akinli hoke: a̱ shahli itikba ya̱ nana hlako̱fi kʋt ikshoshke, amba pi haknip, micha pi̱ yakni ak illʋshke.

¹⁹ Nanta katiohmi ho̱ chi tikba ya̱ pishno, micha pi̱ yakni aiena kʋt pilla chi̱ cho? pishno, micha pi̱ yakni aiena ka̱ pʋska isht ish pi chumpashke, mikma pishno, micha pi̱ yakni aiena kʋt Falaoh ha̱ in tishu ʋhleha pia hashke: micha pehna ya̱ ish pima na pi okcha̱ya cha, ik pillo kashke, yʋmohmi ho̱ yakni ʋt ik chukilisso kashke, im achi tok.

²⁰ Mihma Chosef ʋt Echip yakni moma ka̱ Falaoh ha̱ im in chumpa tok; Echip okla hʋt hohchʋfo kʋt i̱ palʋmmi hatuk o̱ im osapa aiyukali ka̱ kanchi tok: yohmi ho̱ yakni ʋt Falaoh immi toba tok.

²¹ Mihma okla hano Echip aiʋhli ʋttʋt ia hosh in tʋnnʋp fullota ont ʋhli ka̱ kanʋllichit tʋmaha holihta inla puta ka̱ ai ashachi tok.

²² Naholitompa isht asha i̱ yakni ak illa ho̱ ik chumpo tok; naholitompa isht asha hano Falaoh hak osh kʋshkoa im apesa na, Falaoh hʋt ima tuk mak o̱ i̱ kʋshkoa ya̱ ʋpa hatuk oka; yʋmohmi hatuk osh i̱ yakni ya̱ ik kancho tok.

²³ Yohmi ma Chosef ʋt okla ha̱, Yakeh, himak nitak a̱ Falaoh ha̱ hʋchishno, micha hʋchi̱ yakni aiena ka̱ i̱ hʋchi chumpa lishke: yakeh, pehna hʋt yak hʋchim aiashʋshke; yohmi ka̱ yakni ya̱ hʋsh a hokchashke.

²⁴ Atukma yakohma hi oke, wayakma kʋshkoa ishit tahlapi kak o̱ Falaoh ha̱ hʋsh imashke, mikma kʋshkoa ushta kak osh hʋch immi ya chi̱ hoke, micha osapa a hollokcha chi̱ pehna, micha hʋchishno, micha hʋchin chuka achʋfa im ilhpak, micha im ʋlla ʋhleha im ilhpak achi̱ hoke, im achi tok.

²⁵ Mihma, Ish pi okchalinchi tuk oke: a̱ shahli itikba ya̱ holhponayo hanta ya̱ il ai ahayuchashke; mikma Falaoh in tishu ʋhleha pia hashke, okla achi tok.

²⁶ Yʋmohmi ho̱ Chosef ʋt Echip yakni ya̱ nana im apesa ka̱, Falaoh hʋt kʋshkoa ishit tahlapi kak o̱ isha hi atok osh himak nitak a̱ yʋmohmi hoke; amba naholitompa isht asha i̱ yakni ak illa hosh Falaoh immi ik tobo tok.

²⁷ Mikma Islael ʋt Echip yakni, Koshen yakni ak o̱ ahanta tok; micha yʋmma osapa, micha im ila̱yak ʋt im aiasha cha, okla apakna kʋt atampa fehna tok.

²⁸ Mihma Chekob ʋt afʋmmi auahuntuklo ho̱ Echip yakni ya̱ ahanta tok: yʋmohmi hokʋt Chekob ʋt okcha̱yʋt ahanta nitak puta moma kʋt afʋmmi tahlepa achʋfa cha, pokoli ushta akucha untuklo tok.

²⁹ Atuk o Islael ʋt ai illa he nitak ʋlhpisa kʋt atikonofʋt mihinti tok: mihmʋt ushi Chosef a̱ hoyo cha, Himak a̱ chi tikba holhponayo hanta ya̱ ai ahayuchi likma, saiyubi nuta ya̱ chibbak isht ish potolashke, chim asilhha lishke; micha a̱ kana cha, is sʋm a̱hli achukmashke: Echip a̱ chik si a hohpokashke, chim asilhha lishke:

³⁰ Amba a̱ki ʋhleha hak o̱ ta̱kla itoyula la hi oke: yohmi ka̱ Echip a̱ sʋshit ish kohcha cha, im ahollohpi ak o̱ ont is sa hohpa hi oke, im achi tok. Mihma, Ish achi tuk mak o̱ yʋmihchi la hi oke, im achi tok.

³¹ Mihma Islael ʋt, Anumpa kʋllo ʋm il onochí, achi tok: mihma anumpa kʋllo im il onochi tok: Mihma Islael ʋt in topa noshkobo ya̱ on hlipia cha, Chihowa ya̱ aiokpʋchi tok.