Genesis 46 - Chahta Holisso Holitopa 1886

¹ Mihma Islael ʋt nana im a̱sha tuk ʋt moma ishi cha ia mʋt Bee‐sheba ona cha i̱ki Aisak in Chitokaka ya̱ nanʋbit isht aiokpʋchit im issa tok.

² Atuk o̱ ninak a̱ Islael ʋt na pisa ho̱, Chitokaka yʋt (Islael a̱) il im otʋnichit im anumpuli cha, Chekob ma, Chekob ma, ahanchi tok. Mihma, Yak itonla lishke, achi tok.

³ Mihma, Ʋno ʋt Chitokaka, chi̱ki in Chitokaka sia hoke: Echip ia ka̱ ik chi nukshopo kashke; yʋmmak o̱ okla chito a̱ chihi̱kbi la chi̱ hoka.

⁴ Chi awant Echip a̱ ona la chi̱ hoke: atuk osh anonti ishit chi kohchi li pulla hi oke; mikma Chosef ʋt chi nishkin a̱ ibbak isht umbitepa hi oke, achi tok.

⁵ Mihma Chekob ʋt Bee‐sheba ya̱ ʋttʋt wakaya tok: mihma Islael ushi ʋhleha hʋt i̱ki Chekob, micha im ʋlla ʋhleha, micha tekchi ʋhleha ai ʋlbeha chi̱ ho̱ itichanʋlli puta Falaoh hʋt i̱ pila tuk a̱ apitta cha, ishtia tok.

⁶ Micha i̱ nanʋlhpoa, micha im ila̱yak puta Kenan yakni ai ahayuchi tuk ʋt ishi cha, Chekob, micha im aiunchololi moma kʋt api̱ha ho̱ Echip a̱ ona tok.

⁷ Ushi ʋhleha, micha ushi ʋhleha ha̱ ushi ʋhleha hʋt api̱ha ho̱, micha ushetik ʋhleha, micha ushi ʋhleha ha̱ ushetik ʋhleha hʋt api̱ha ho, im aiunchololi moma ka̱ pehliechit Echip a̱ isht ona tok.

⁸ Hohchifo ilʋppa puta kak osh Islael im ʋlla ʋhleha, Chekob, micha ushi ʋhleha aiena hosh Echip a̱ ona tok: Chekob ushi ʋttahpi Luben ak atok.

⁹ Mihma Luben ushi ʋhleha hʋt Hanok micha Fallu, micha Heslon, micha Kami ak atok.

¹⁰ Mikma Simeon ushi ʋhleha hʋt Chemuel, micha Chamin, micha Ohat, micha Chakin, micha Soha, micha Kenan ohoyo ho̱ ushi Shaul aiena kak atok.

¹¹ Mikma Lefai ushi ʋhleha hʋt Keshon Kohalh, micha Melali ak atok.

¹² Mikma Chutah ushi ʋhleha hʋt El, micha Onan, micha Shelah, micha Fales, micha Salah ak atok: yohmi kia El, micha Onan itatuklo kʋt Kenan yakni ya̱ ai illi tok. Mihma Fales ushi ʋhleha hʋt Heslon, micha Hamul ak atok.

¹³ Mikma Issaka ushi ʋhleha hʋt, Tola, micha Fufah, micha Chob, micha Shimlon ak atok.

¹⁴ Mikma Sebulun ushi ʋhleha hʋt Selet, micha Elon, micha Chahleel ak atok.

¹⁵ Ilʋppa puta kak osh Leah ushi ʋhleha ha̱ yʋmma, micha ushetik Tinah aiena ka̱ Chekob a̱ Patan‐alam a̱ ai im eshi tok: ushi ʋhleha, micha ushetik ʋhleha imi shilombish moma kʋt pokoli tuchina akucha tuchina tok.

¹⁶ Mikma Kat ushi ʋhleha hʋt Sifion, micha Hakki, Shuni, micha Esbon, Eli, micha Aloti, micha Aleli ak atok.

¹⁷ Mikma Asha ushi ʋhleha hʋt Chimnah, micha Ishuah, micha Isui, micha Beliah, micha in tek Selah ak atok. Mikma Beliah ushi ʋhleha hʋt Hebe, micha Malkiel ak atok.

¹⁸ Ilʋppa puta kak osh Laban ʋt ushetik Leah ima tok Silpah ya̱ ushi ʋhleha hatok: mihma ilʋppa puta kak o̱ Chekob a̱ im eshi tok, shilombish auahhannali hatok.

¹⁹ Chekob tekchi Lechel ushi ʋhleha hʋt Chosef, micha Benchamin ak atok.

²⁰ Mikma Chosef a̱ On a̱ naholitompa isht ʋtta Potifelah ushetik Asenalh im eshi tok a̱ Manasseh, micha Eflaim ak osh Echip yakni ya̱ im ai ashwa tok.

²¹ Mikma Benchamin ushi ʋhleha hʋt Belah, micha Beke, micha Ashbel, Kela, micha Naaman, Ehi, micha Losh, Muppim, micha Huppim, micha Alt ak atok.

²² Ilʋppa puta kak osh Lechel a̱ ushi ʋhleha hosh Chekob a̱ im ashwa tok, shilombish moma kʋt auah ushtahatok.

²³ Mikma Tan ushi ʋhleha hʋt Hushim ak atok.

²⁴ Mikma Naftali ushi ʋhleha hʋt Chaseel, micha Kuni, micha Chese, micha Shillim ak atok.

²⁵ Ilʋppa puta kak osh Laban ʋt ushetik Lechel ima tok Bilhah ya̱ ushi ʋhleha hatok; micha ilʋppa puta kak o̱ Chekob a̱ im eshi tok: shilombish moma kʋt untuklo tok.

²⁶ Chekob ushi ʋhleha ha̱ tekchi ʋhleha hʋto asha na haknip a toba tok shilombish moma hosh, Chekob a̱ api̱hʋt Echip a̱ ona kʋt, shilombish moma kʋt pokoli hannali akucha hannali tok.

²⁷ Mikma Chosef ushi ʋhleha Echip a̱ im ai ashwa tok ʋt shilombish tuklo tok: Chekob in chuka achʋfa shilombish moma kʋt Echip a̱ ona tok ʋt pokoli untuklo tok.

²⁸ Mihma Chosef ʋt Koshen ak o̱ apissalit ont ai afama chi̱ ho̱, Chutah ya̱ itikba pit i̱ pila tok: mihmʋt Koshen yakni ya̱ okla ona tok.

²⁹ Mihma Chosef ʋt im itichanʋlli ya̱ atahli cha, i̱ki Islael a̱ Koshen a̱ ai afamʋt ia tuk osh itikba ont im ile haiakʋchi tok: micha ikunla on hlipia cha, ikunla ya̱ onʋtoyulʋt ya̱ha̱ya na hopaki tok.

³⁰ Mihma Islael ʋt Chosef a̱, Inta, ik sʋlli, chi nashuka ya̱ pisa li hokʋt, chi okcha̱ya moma hoka, im achi tok.

³¹ Mihma Chosef ʋt itibapishi ʋhleha, micha i̱ki in chuka achʋfa ya̱, Ia lish, Falaoh ha̱ ont im anolit, Itibapishi li ʋhleha, micha a̱ki in chuka achʋfa Kenan yakni aiasha tuk ʋt ʋm ʋlʋshke:

³² Micha hatak okʋt nanʋlhpoa apesʋchi ʋhleha hoke, nan isht aiasha yʋt nanʋlhpoa impʋchi ak oh chatuk okʋt: atuk osh i̱ nanʋlhpoa chipinta, micha i̱ nanʋlhpoa hochito, micha nana im a̱sha tuk ʋt moma i̱sht ʋlʋshke, im achi lashke.

³³ Atukma yakohma chi̱ hoke, Falaoh hʋt hʋchi hoyo cha, Nanta ho̱ ishit hʋshai asha chatuk oh cho? achikma,

³⁴ Yohmikma, Chin tishu ʋhleha nan isht aiasha yʋt ʋlla pi moma hakinli tok osh himak a̱ ant ʋhli kʋt, pishno, micha pi̱ki ʋhleha aiena kʋt nanʋlhpoa apesʋchi ak oh chatuk oke, hʋsh achashke: yohmi hosh Koshen yakni ak o̱ hʋsh aiashashke; nanʋlhpoa apesʋchi ʋt Echip okla hʋt nana isht ayuwala yoka, im achi tok.