Genesis 45 - Chahta Holisso Holitopa 1886

¹ Yohmi ma Chosef ʋt bili̱ka hieli tuk ash moma itikba ya̱ il oktambla he keyu tok; mihmʋt chitoli hosh, Hatak moma ka̱ a̱ filʋmmichit hʋsh kocha wehlashke, achi tok: mihma Chosef ʋt itibapishi ʋhleha im il anoli ta̱kla ka̱ hatak nana kia apehʋt hinli kʋt iksho tok.

² Mihma Chosef ʋt chitolit yaiya tok; mihma Echip okla, micha Falaoh in chuka achʋfa aiena kʋt ha̱klo tok.

³ Mihma Chosef ʋt itibapishi ʋhleha ha̱, Chosef sia hoke; a̱ki ʋt okcha̱ya moma cho? im achi tok. Mihma itibapishi ʋhleha hʋt im afalamicha he keyu tok; nashuka pisa kʋt nukhlakancha hatuk okʋt.

⁴ Mihma Chosef ʋt itibapishi ʋhleha ha̱, A̱ bili̱ka ho mintí, hʋchim asilhha lishke, im achi tok: mihma bili̱ka okla ona tok: Mihma, Hʋch itibapishi Echip et hʋsh kanchi tok Chosef sia hoke, achi tok.

⁵ Yʋmohmi hoka himak a̱ ilʋppa et hʋs sa kanchi tok ʋt ik hʋchi nukha̱klo cha, hʋch ik il i̱ nukkillo kashke: Chitokaka ak osh hatak okchalinchi la chi̱ ho̱ hʋchi tikba et sa pila tok oka.

⁶ Ilʋppʋt afʋmmi tuklo mak o̱ hohchʋfo yʋt yakni ya̱ itoyula tuk oke: mikma yohmi hokak o̱ afʋmmi tahlapi moma ho̱ yakni patʋffi, micha nan ʋmo nana kia iksho ka chi̱ hoke.

⁷ Yohmi ka̱ hʋchim ishtatiaka okchalinchi li̱, yakni paknaka aiasha chi̱ ho̱, micha ahlakofi chinto ho̱ isht hʋchi okchalinchi la chi̱ ho̱, hʋch itikba Chitokaka yʋt sa pila tuk oke.

⁸ Yohmi ka̱ hʋchishno ak osh ilʋppa et hʋs sa pila tuk keyu, amba Chitokaka ak atok oke: micha Falaoh ha̱ i̱ki, micha in chuka achʋfa ya̱ i̱ shahli, micha Echip yakni moma ka̱ pehlichi ya̱ sa hilechi tuk oke.

⁹ Hʋsh tu̱shpashke, micha a̱ki ya̱ hʋsh im ona cha, Chiso Chosef ʋt yak achishke, Chitokaka yʋt Echip moma ka̱ i̱ shahli ha̱ sa hilechi tuk oke: is sʋm ʋlashke, ish sʋlaha ná;

¹⁰ Micha Koshen yakni ak o̱, is sa̱ bili̱ka chi̱, chishno, micha chim ʋlla ʋhleha, micha chim ʋlla ʋhleha ha̱ im ʋlla ʋhleha, micha chi̱ nanʋlhpoa chipinta, micha chi̱ nanʋlhpoa hochito, micha nana chim a̱sha moma kʋt ish aiashashke.

¹¹ Mikma yʋmmak o̱ a hʋchi ipeta la chi̱ hoke, (hohchʋfo hʋt afʋmmi tahlapi kʋt a̱sha moma hoka;) yohmi ho̱ chishno, micha chin chuka achʋfa, micha nana chim a̱sha moma kʋt hohchʋfot chi taha yoba ná, achishke, hʋsh im achashke;

¹² Micha hʋchi nishkin, micha itibapishi li Benchamin nishkin ʋt pi̱sa ka̱ sʋtih hak osh hʋchim anumpulelishke.

¹³ Micha Echip a̱ nana sa holitopa moma, micha nana hʋsh pi̱sa tuk a̱ mominchit hʋsh im anolashke: micha tu̱shpʋt a̱ki ya̱ ilʋppa isht hʋsh lashke, im achi tok.

¹⁴ Micha itibapishi Benchamin ikunla ya̱ on hlipia cha yaha̱ya tok: mihma Benchamin ʋt yʋmma ikunla ya̱ on hlipia cha yaha̱ya tok.

¹⁵ Micha itibapishi ʋhleha moma ka̱ i̱ su̱ksowa cha, on hlipiʋt ya̱ha̱ya tok: mihma yohmi ha yak o̱, itibapishi ʋhleha hʋt itim anumpuli tok.

¹⁶ Atuk o̱ Chosef itibapishi ʋhleha hʋt ʋlʋshke, achi na annoa ka̱ Falaoh in chuka achʋfa yʋt haklo tok: mihma Falaoh, micha in tishu ʋhleha aiena kʋt im achukma fehna tok.

¹⁷ Micha Falaoh hʋt Chosef a̱, Chitibapishi ʋhleha ha̱ ilʋppa ish im achashke, Ilʋppak o̱ hʋsh yʋmihchashke; hʋchim issuba haksobish falaia ya̱ hʋsh shapolechi cha, iʋt Kenan yakni ya̱ hʋsh onashke;

¹⁸ Micha hʋch i̱ki, micha hʋchin chuka achʋfa ya̱ hʋsh ishi cha, hʋs sʋm ʋlashke: mikma Echip yakni ai achukma kak o̱ hʋch ima likma, yakni nia kak o̱ hʋsh ai ʋpashke, ish im achashke.

¹⁹ Himak a̱ chi̱ miha lishke, ilʋppak o̱ hʋsh yʋmohmashke; hʋchim ʋlla ʋhleha, micha hʋchi tekchi ʋhleha aiena kʋt ai ʋlbeha chi̱ ka, Echip yakni ya̱ itichanʋlli puta ai ishit hʋsh ona cha, hʋch i̱ki ya̱ isht hʋsh minti cha, hʋsh lashke.

²⁰ Micha hʋchi̱ nachukushpa ya̱ hʋch ik anukfillo kashke: Echip yakni ai achukma moma kʋt hʋch immi hokʋt, im achi tok.

²¹ Mihma Islael im ʋlla ʋhleha hʋt yʋmihchi tok: mihma Falaoh hʋt miha tuk mak o̱, Chosef ʋt itichanʋlli puta ima cha, hina takla pinak aiena ka̱ ima tok.

²² Moma ka̱ nafohka fohka tuklo aiyukali ho̱ ima tok: amba Benchamin ano tʋli hʋta tushahli tahlepa tuchina ho̱, micha nafohka fohka tahlapi ho̱ ima tok.

²³ Micha i̱ki ya̱ yʋmmak inli chohmi ho̱ pit i̱ pila tok; micha issuba haksobish falaia yʋt Echip nana achukma puta shali pokoli, micha issuba haksobish falaia tek pokoli hosh, hina takla i̱ki ʋt ʋpa chi̱ ho̱ onush, micha pʋska, micha pinak shali ho̱ pila tok.

²⁴ Yohmi mʋt itibapishi ʋhleha ha̱ pila na ilhkoli tok: mihma, Ahah, hʋsh ahni cha, hina takla hʋch ik itim okpulo kashke, im achi tok.

²⁵ Mihma Echip a̱ kohchʋt ia mʋt, Kenan yakni ya̱ onʋt, i̱ki Chekob a̱ im ona tok;

²⁶ Micha im anolit, Chosef ʋt okcha̱ya moma cha, Echip yakni moma ka̱ pehlichi yoke, achi tok. Mihma Chekob chu̱kʋsh ʋt shimoha tok, ik yimmo hatuk okʋt.

²⁷ Mihma Chosef im anumpa nana im achi tuk a̱ moma im anoli tok: micha fohkit ishtia chi̱ ka̱ itichanʋlli puta Chosef ʋt et i̱ pila tuk a̱ pisa mʋt, i̱ki Chekob imi shilombish ʋt okchʋt taha tok:

²⁸ Mihma Islael ʋt, Ʋlhpesʋshke, sʋso Chosef ʋt okcha̱ya momʋshke; ik sʋllo ta̱kla kak osh iʋt ont pisa lashke, achi tok.