Genesis 44 - Chahta Holisso Holitopa 1886

¹ Atuk o̱ Chosef ʋt in chuka achʋfa pehlichi ya̱ i̱ mihʋt, Isht a̱ya he ʋlhpesa ho̱ hatak ʋhleha hash i̱ bahta ya̱ ilhpak hʋsh aluli cha, hatak moma ka̱ in tʋli holisso aiyukali ka̱ i̱ bahta ya̱ hʋsh apittashke.

² Micha ʋm ishtishko, ishtishko tʋli hʋta ya̱, micha im onush aiilli tʋli holisso ya̱ nakfish ishtaiyopi i̱ bahta ya̱ ish fohkashke achi tok: mihma anumpa Chosef ʋt anumpuli tuk mak o̱ yʋmihchi tok.

³ Onnahinli kʋt tohwikeli makinli ho̱ hatak ʋhleha hash, micha im issuba haksobish falaia aiena ka̱ pit tihleli tok.

⁴ Atuk osh tʋmaha holihta ya̱ kohchʋt ik hopakecho ki̱sha ho̱ Chosef ʋt in chuka achʋfa pehlichi ya̱, Wakayá, hatak ʋhleha hash hliolí; atuk osh ont ish sakkikmʋt, Nanta katiohmi ho̱ nan achukma ka̱ nan ik achukmo ho̱ hʋsh atobbi cho?

⁵ A̱ shahli hʋt ai ishko chatuk, micha nan isht ithʋna chatuk mʋhli ilʋppak keyu cho? ilʋppa hʋsh yʋmihchi kʋt ik achukmo ho̱ hʋsh yʋmihchishke, ish im achashke, im achi tok.

⁶ Atuk o̱ ont sakki cha, anumpa ilʋppak inli ho̱ im anumpuli tok.

⁷ Mihma, Nanta katiohmi ho̱ anumpa ilʋppa a̱ shahli hʋt achi cho? chin tishu ʋhleha hʋt nana ilʋppa chohmi ka̱ yʋmihchi ka̱ Chitokaka yʋt im olʋbashke.

⁸ Yakeh, tʋli holisso hʋt pi̱ bahta ya̱ fo̱ka na il ahayuchi tuk ʋto anonti Kenan yakni ya̱ ai isht e la tuk oke: yohmi tuk ʋt katiohmi kak o̱ tʋli hʋta, keyukmʋt tʋli holisso lakna kia hu̱kopʋt a̱ shahli in chuka ya̱ isht e kohcha hinla cho?

⁹ Chin tishu ʋhleha kanima kak osh i̱shi tuk o̱ haiakakma, yʋmmʋt illashke, mikma pishno ak kia a̱ shahli ha̱ i̱ yuka ʋhleha pia hashke, im achi tok.

¹⁰ Mihma, Himak akinli ka̱ hʋchim anumpa pulla hatuk mak o̱ yʋmohmashke: kʋna hosh i̱shi tuk o̱ haiakma, yʋmmak osh an tishu ha chi̱ hoke; mikma hʋchishno ʋto nana ik hʋchi̱ kaniohmo ka chi̱ hoke, achi tok.

¹¹ Yohmi ma tu̱shpʋt hatak i̱ bahta aiyukali kʋt akʋchit aka bohli tok: micha hatak i̱ bahta aiyukali kʋt hotofi tok.

¹² Mihma hoyo tok, micha akni fehna ak o̱ ʋttʋt ai ishtia hosh nakfish ishtaiyopi ya̱ isht ona tok: mihma isht ishko ʋt Benchamin i̱ bahta ak o̱ fo̱kʋt haiaka tok.

¹³ Yohmi ma i̱ nafohka ya̱ okla hlilʋffi cha, hatak im issuba haksobish falaia aiyukali kʋt shapolechi mʋt, falamʋt tʋmaha holihta yash ona tok.

¹⁴ Mihma Chutah, micha itibapishi ʋhleha aiena kʋt Chosef in chuka ya̱ ona tok; (yʋmma anta moma hatuk oka,) micha itikba ya̱ okla hlipkʋchi tok.

¹⁵ Mihma Chosef ʋt, Ilʋppʋt nanta mak o̱ hʋsh yʋmihchi tuk oh cho? hatak ʋno chohmi kʋt nan ithʋna la hinla pulla ka̱ hʋch ik ithano tuk oh cho? im achi tok.

¹⁶ Mihma Chutah ʋt, A̱ shahli ha̱ nanta ho̱ il im acha chi̱ cho? nanta ho̱ il im anumpula chi̱ cho? e katiohmi kak osh il il aiʋlhpiesʋcha chi̱ cho? Chitokaka yʋt chin tishu ʋhleha nanashʋchi yo̱ ahayuchishke: yakeh, a̱ shahli in tishu ʋhleha pia hoke, pishno, micha isht ishko ya̱ i̱shi tuk o̱ haiaka tuk aiena kʋt, achi tok.

¹⁷ Mihma, Yohmi la he ya̱ Chitokaka yʋt olʋbashke: amba isht ishko ʋt ibbak fo̱kʋt haiaka tuk hatak yʋmmak osh an tishu ha chi̱ hoke: amba hʋchishno ʋto hʋch i̱ki ya̱ achukma̱kʋt hʋsh im onashke, achi tok.

¹⁸ Yohmi ma Chutah ʋt i̱ bili̱ka ona cha, A̱ shahli ma! chim asilhha lishke, a̱ shahli hʋt ha̱klo ho̱, chin tishu hʋt anumpa achʋfa anumpuli lashke; mikma chim ai i̱ nukkilli hʋt chin tishu ha̱ i̱ sanalit ik libbo kashke: Falaoh hak o̱ ish chohmi hokʋt.

¹⁹ A̱ shahli hʋt in tishu ʋhleha ha̱ i̱ ponaklot, Hʋch i̱ki ʋt a̱sha? keyukmʋt hʋch itibapishi hʋt anta hoh cho? achi tok.

²⁰ Mihma a̱ shahli ha̱, Pi̱ki ʋt anta, hatak sipokni, micha sipoknit taha ho̱ ʋlla im ʋtta tok osh, iskitini yosh anta: mikma itibapishi hʋt illi tok, ishki achʋfa yʋt yʋmmak illa hosh okcha̱ya ho̱, i̱ki ʋt holitobli hoke, il im achi tok oke.

²¹ Mihma chin tishu ʋhleha ha̱, Isht hʋs sʋm ʋla na a̱ holhponayo onochit pisa lashke, ish im achi tok oke.

²² Mihma pishno ʋt a̱ shahli ha̱, Ʋlla yʋt i̱ki a̱ i̱ filʋmmit a̱ya he keyu; i̱ki a̱ i̱ filʋmmit a̱ya hokma, i̱ki ʋt illa hi oka il im achi tok oke.

²³ Mihma chin tishu ʋhleha ha̱, Hʋchi nakfish ishtaiyopi ʋt hʋchi awant ʋla keyukma, himakma sa nashuka ya̱ hʋsh pisa chi̱ keyu hoke, ish im achi tok oke.

²⁴ Atuk o̱ yakohmi tok, pi̱ki chin tishu ha̱ il im ona mʋt, a̱ shahli im anumpa ha̱ il im anoli tok oke.

²⁵ Atuk o̱ pi̱ki ʋt, Anonti hʋsh ia cha, ilhpak kanomosi ont hʋsh pin chumpashke, achi tuk oke.

²⁶ Mihma, Il ia he keyu hoke; pi nakfish ishtaiyopi ʋt pi takla ia hokmʋno, il ia hinla hoke: pi nakfish ishtaiyopi ʋt pi ta̱kla a̱ya keyukma, hatak ash nashuka̱ ya̱ e pisa he keyu hokʋt, il achi tuk oke.

²⁷ Mihma chin tishu pi̱ki ʋt, Sa tekchi ʋt ʋlla nakni tuklo ho̱ ʋm eshi tok a̱ hʋsh ithanʋshke:

²⁸ Atuk o̱ achʋfa kʋt a̱ filʋmmit kohchʋt ia tuk o̱, Nipʋt taha tuk pullʋshke, achi li tok; yʋmmak atok itin takla ma ak peso chatuk oke.

²⁹ Atuk o̱ ilʋppak kia isht hʋsh ia tuk o̱; nana ik achukmo kia onʋtolakma, sa pa̱shi tohbi ya̱ ilbʋshalit ahollohpi ya̱ hʋsh sʋsht ona chi̱ hoke, pim achi tuk oke.

³⁰ Yʋmohmi hoka himak a̱ chin tishu a̱ki ya̱ im ona likma, ʋlla yʋt ik piba fo̱kokma, (im ilhfiopak ʋt ʋlla im ilhfiopak ak o̱ ita talakchi hatuk okʋt;)

³¹ Yakohma chi̱ hoke; ʋlla yʋt pi takla ik a̱yo ho̱ pisakmʋt, illa chi̱ hoke: mikma pi̱ki pa̱shi tohbi ya̱ hʋchin tishu pia hʋt ilbʋshalit ahollohpi ya̱ isht il ona chi̱ hoke.

³² Chin tishu hʋt ʋlla yash i̱ki ya̱ isht im ona la hi ʋt aia̱hlichi tobʋt, Isht ak chim ʋlokma, a̱ki ʋt anumpa si onochi na biliashke, achi li tuk oke.

³³ Yʋmohmi hoka himak a̱ chin tishu hak osh ʋlla yash ʋlhtobʋt a̱ shahli ha̱ i̱ yuka tobʋt antashke, chim asilhha lishke: mikma ʋlla yʋt itibapishi ʋhleha ha̱ ta̱kla iashke.

³⁴ Katiohmi kak osh ʋlla yʋt sa takla a̱ya keyu ka̱ a̱ki ya̱ im ona la hinla cho? keyukma nana ik achukmo kʋt a̱ki ya̱ onʋtola chi̱ ka̱ pisa la chi̱ yoba ká, achi tok.