Genesis 42 - Chahta Holisso Holitopa 1886

¹ Atuk o̱ Echip a̱ onush ʋt a̱sha ho̱ Chekob ʋt akostininchi mʋt, Chekob ʋt ushi ʋhleha ha̱, Nanta katiohmi ho̱ filemoʋt hʋsh iti pisa cho? im achi tok.

² Micha yakeh, Echip o̱ onush ʋt a̱sha ho̱ haklolishke: yʋmmak o̱ hʋsh ona cha, yʋmmak o̱ ont hʋsh pim a chumpashke; yʋmohmi ho̱ pi okcha̱ya cha, ik pillo ka chi̱ hoke, achi tok.

³ Mihma Chosef itibapishi pokoli kʋt Echip a̱ onush a̱ chumpa chi̱ hosh ilhkoli tok.

⁴ Amba Chosef itibapishi Benchamin ano Chekob ʋt, Nan ik achukmo nana kia onʋtola yoba ná, achi hatuk osh itibapishi ʋhleha ta̱kla ik pelo tok.

⁵ Islael ushi ʋhleha hʋt onush chumpʋt ai ona ka̱ ta̱kla ona tok: Kenan yakni ya̱ hohchʋfo kʋt a̱sha hatuk oka.

⁶ Mihma Chosef ʋt yakni ya̱ pehlichi atok; micha yʋmmak osh yakni yʋmma okla moma ka̱ i̱ kanchi tok: atuk o̱ Chosef itibapishi ʋhleha hʋt ona mʋt, itikba ya̱ im akachunolit aka hlipkʋchi tok.

⁷ Mihma Chosef ʋt itibapishi ʋhleha ha̱ pisa mʋt ithana tok; yohmi kia inla im il ahobit, ilhpa̱sh ikshot im anumpuli tok; micha, Katima hʋsh minti cho? im achi tok. Mihma Kenan yakni e minti hosh ilhpak chumpʋt il a̱ya hoke, okla achi tok.

⁸ Mihma Chosef ʋt itibapishi ʋhleha ha̱ ithana tok, yohmi kia Chosef ano okla ik ithano tok.

⁹ Mihma Chosef ʋt naholhpokna ishit holhpokna tok ʋt ithaiyana tok; micha, Yakni pisʋt a̱ya hʋchia hoke; yakni ʋt ashaiyahbi ka̱ pisʋt hʋsh a̱ya hoke, im achi tok.

¹⁰ Mihma, Keyú, a̱ shahli ma, peh ilhpak chumpʋt a̱ya hosh chin tishu ʋhleha hʋt ʋla hoke.

¹¹ E moma kʋt hatak achʋfa ushi ʋhleha pia hoke: hatak aia̱hli ʋhleha pia hoke; chin tishu ʋhleha hʋt yakni pisʋt a̱ya keyu hoke, okla im achi tok.

¹² Mihma, Keyú, peh yakni ʋt ashaiyahbi ka̱ pisʋt a̱ya hosh hʋsh la hoke, im achi tok.

¹³ Mihma, Hatak achʋfa Kenan yakni ya̱ ʋtta ho̱ ushi ʋhleha hosh chin tishu ʋhleha hʋt itibapishi auahtuklo hoke: atuk o̱ yakeh, nakfish ishtaiyopi ʋt himak nitak a̱ pi̱ki takla ahantakma, achʋfa kʋt iksho hoke, achi tok.

¹⁴ Mihma Chosef ʋt, Yakni pisʋt a̱ya hʋchia hoke, anumpulit achi li tuk ʋt yʋmmak oke.

¹⁵ Ilʋppak o̱ isht hʋsh otʋna chi̱ hoke: Falaoh hʋt okcha̱ya pulla ka̱ hʋchi nakfish ishtaiyopi ʋt ilʋppa ik lo ka̱ ilʋppa kohchʋt hʋsh ilhkola he keyu hoke.

¹⁶ Hʋsh achʋfa kanima ka̱ hʋsh pila na hʋch itibapishi ha̱ ont ishtʋlashke, mikma talakchit aboha kʋllo hʋsh aiashashke, yohmi ho̱ nana kia hʋsh a̱hlikma hʋch im anumpa hʋt isht otʋnashke: keyukmʋt Falaoh hʋt okcha̱ya pulla ka̱ yakni pisʋt a̱ya hʋchia hoke, im achi tok.

¹⁷ Mihmʋt mominchit itiba fohkit nitak tuchina ho̱ aboha kʋllo apitta tok.

¹⁸ Mihmʋt Chosef ʋt nitak ont atuchina ma, Ilʋppak o̱ hʋsh yʋmihchi cha, hʋsh okcha̱yashke: Chitokaka ya̱ i̱ sa nukshopa hoka.

¹⁹ Hatak aia̱hli hʋchia hokma, hʋch itibapishi achʋfa hosh talakchit hʋchim aboha kʋllo yash fo̱kashke: mikma iʋt hʋchin chuka achʋfa hohchʋfo ka̱ onush isht hʋsh im onashke.

²⁰ Yohmi kia hʋchi nakfish ishtaiyopi ya̱ ont ishit hʋs sʋm ʋlashke; yohmi ho̱ hʋchim anumpa hʋt a̱hla chi̱ hoke, mikma ik hʋch illo ka chi̱ hoke, im achi tok. Mihma okla yʋmohmi tok.

²¹ Mihmʋt ilap bi̱ka, Pitibapishi pulla ka̱ chu̱kʋsh komunta ka̱ e pi̱sa, micha pim ilbʋsha ma e hakla he keyu kʋt nana il im ashʋchi fehna tok ʋt pi onʋtoyula mʋhli hoke: yʋmohmi kak o̱ nan ik achukmo ilʋppʋt pi onʋtola hoka, itim achit hieli tok.

²² Mihma Luben ʋt afalaminchit, Hʋchim anumpulit, Ʋlla ya̱ hʋsh i̱ yoshuba ná, achi li tok keyu cho? mihma hʋsh haponakla he keyu tok: yʋmohmi tok ak o̱ yakeh, im issish a̱ pi a hoyo akinlishke, im achi tok.

²³ Micha Chosef ʋt ha̱klo ka̱ okla ik ithano tok: anumpa tosholi yo̱ isht itim anumpuli hatuk oka.

²⁴ Mihmʋt i̱ filʋmmi cha, nishkin okchi mihinti tok; atuk osh anonti falamʋt im ona cha, itim anumpuli mʋt, Simeon a̱ im ishi cha, okla pi̱sa ho̱ takchi tok.

²⁵ Yohmi mʋt i̱ bahta ya̱ onush alotoli cha, hatak in tʋli holisso aiyukali falʋmminchit i̱ bahta ya̱ apittakmʋt, hina takla pinak ima chi̱ ka̱ Chosef ʋt apesa tok: micha yʋmmak o̱ yʋmihchi tok.

²⁶ Mihma im issuba haksobish falaia ya̱ onush ash shapolichi mʋt, ilhkoli tok.

²⁷ Atuk o̱ anusi aboha ya̱ okla ona ma, achʋfa kʋt im issuba haksobish falaia ya nanʋpa ipeta chi̱ hosh i̱ bahta ya̱ hotofi mʋt in tʋli holisso ya̱ pisa tok: yakeh, i̱ bahta ya̱ fo̱ka tuk oka.

²⁸ Mihma itibapishi ʋhleha ha̱, An tʋli holisso hʋt a̱ falamʋshke; micha yakeh, a̱ bahta fehna ka̱ fo̱kʋshke, im achi tok: mihma chu̱kʋsh kʋnia cha, nukshopʋt okla wʋnihinchi mʋt, Ilʋppak osh nanta mak o̱ Chitokaka yʋt pi yʋmihchi cho? itim achi tok.

²⁹ Atuk osh Kenan yakni ya̱ onʋt, i̱ki Chekob a̱ im ona mʋt, nana im a kaniohmi tuk ʋt moma im anolit,

³⁰ Hatak ʋt yakni yʋmma i̱ shahli yosh ahanta kʋt ilhpa̱sh ikshot pim anumpuli cha, yakni pisʋt a̱ya pi ahni tuk oke.

³¹ Mihma, Hatak aia̱hli pia hoke: yakni pisʋt a̱ya pia keyu hoke.

³² Hatak achʋfa pi̱ki ushi ʋhleha pia hosh itibapishi auahtuklo pia hoke: achʋfa kʋt iksho, mikma nakfish ishtaiyopi ʋt himak nitak a pi̱ki takla Kenan yakni ya̱ anta hoke, il im achi tuk oke.

³³ Mihma hatak yakni yʋmma i̱ shahli yash osh, Ilʋppak o̱ hatak aia̱hli hʋchia ka̱ isht ithʋna la chi̱ hoke: hʋch itibapishi achʋfa ka̱ hʋs sa̱ kanchi cha, hʋchin chuka achʋfa hohchʋfo aiasha ka̱ ilhpak oh im ishi cha oh ilhkolí:

³⁴ Micha hʋchi nakfish ishtaiyopi ya̱ ishit hʋs sʋm ʋlashke: yohmikmak o̱ yakni pisʋt a̱ya keyu, amba hatak aia̱hli hʋchia ka̱ ithʋna la chi̱ hoke: yohmikma hʋch itibapishi ha hʋch ima likma, yakni ya̱ hʋsh ai itatobashke, pim achi tuk oke, im ahanchi tok.

³⁵ Atuk o̱ yakohmi tok, i̱ bahta ya̱ okla tosholi ma, yakeh, in tʋli holisso bonunta aiyukali kʋt i̱ bahta ya̱ fo̱ka bano tok: mihma yʋmmʋt micha i̱ki aiena kʋt tʋli holisso bonunta ya okla pisa mʋt, nukshopa tok.

³⁶ Mihma i̱ki Chekob ʋt, Ʋno ya̱ ʋlla hʋs sa wehpulishke: Chosef ʋt iksho, Simeon ʋt iksho, mihma Benchamin a̱ ishit hʋsh ia chi̱shke: ilʋppa puta kʋt si onʋtonla hoke, im achi tok.

³⁷ Mihma Luben ʋt i̱ki ya̱ im anumpulit, Ishit ak chim ʋlokma, sʋso tuklo ka̱ ish bashke: sʋbbak a̱ ish fohki tukma, anonti ishit chim ʋla la chi̱ hoke, achi tok.

³⁸ Mihma, Sʋso hʋt hʋchi awant ia he keyu; itibapishi hʋt illi tok o̱, ilap bano hosh anta hoke: hina yʋmma hʋsh ia ka̱ nana ik achukmo kia onʋtolakma, yohmikma sa pa̱shi tohbi ya̱ ilbʋshalit ahollohpi ya̱ hʋs sʋsht ona chi̱ hoke, achi tok.