Genesis 41 - Chahta Holisso Holitopa 1886

¹ Atuk o̱ yakohmi tok, afʋmmi tuklo ʋlhpiesa kʋt ont taha ma, Falaoh ʋt holhpokna tok: mihmʋt yakeh, okhina ontalaka hikia tok.

² Mihma yakeh, wak tek pisa achukma, micha nipi nia achukma untuklo hosh okhina et kohcha tok; micha okhina ontalaka ya̱ ai impa tok.

³ Atuk o̱ yakeh, wak tek inla pisa ik achukmo, micha nipi chunna untuklo hosh et iakaiyʋt okhina ya̱ et kohcha tok: micha wak tek inla yash bili̱ka okhina ontalaka ya̱ hieli tok.

⁴ Mihmʋt wak tek pisa ik achukmo, micha nipi chunna yash osh wak tek pisa achukma, micha nipi nia achukma yash ʋpʋt tahli tok. Yohmi ma Falaoh ʋt okcha tok.

⁵ Atuk osh nusi mʋt, atukla ma holhpokna tok: mihma yakeh, onush ʋpi achʋfa ka̱ noshkobo untuklo hochito, micha achukma hosh kohcha tok.

⁶ Mihma yakeh, noshkobo chipinta, hʋshi akochaka mahli ishit bʋshshi untuklo hosh et iakaiyʋt kohcha tok.

⁷ Mihmʋt noshkobo chipinta untuklo kash osh noshkobo hochito alota achukma untuklo kash nanʋblit tahli tok. Mihma Falaoh ʋt okcha tok; mihma yakeh, holhpokna hatuk atok.

⁸ Atuk osh onnahinli ma yakohmi tok, chu̱kʋsh ʋt ik im ʋlhpeso fehna tok; mihmʋt natosholi ʋhleha moma micha hatak hopoyuksa ʋhleha moma Echip aiasha ka̱ pit hoyo tok: micha Falaoh ʋt holhpokna tuk ʋt im anoli tok; yohmi kia achʋfa kia Falaoh ya̱ in toshola hinla kʋt iksho tok.

⁹ Yohmi ma aiishko sholi i̱ shahli hʋt Falaoh ha̱ im anumpulit, Nana ashʋchi li tuk ʋt himak nitak fehna ithaiyana lishke:

¹⁰ Falaoh hʋt in tishu ha̱ i̱ nukhobela cha, ai atoni, nan atoni i̱ kʋpitʋni in chuka hikia ka̱, ʋno, micha pʋska ikbi i̱ shahli ya̱ il itatuklo ka̱ pi fohki tok.

¹¹ Atuk o̱ ninak achʋfa ho̱ ʋno, micha yʋmma il itatu̱klot naholhpokna yo̱ pi holhpokna tok: na holhpokna toshowa kʋt ila bi̱ka ho̱ pi holhpokna tok.

¹² Mihma Heblu hatak himita ʋt nanatoni i̱ kʋpitʋni in tishu hosh pibafohka tok; atuk o̱ il im anoli ma, pi holhpokna tuk a̱ pin tosholi tok: ila pi holhpokna bi̱ka tuk mak o̱ tosholi tok.

¹³ Atuk o̱ yakohmi tok, pin tosholi tuk mak o̱ yʋmohmi tok: ʋno ano ahikia li ya̱ falʋmminchit sa hilechi mʋt, yʋmmʋno ʋba takalechi tok, achi tok.

¹⁴ Yohmi ma Falaoh hʋt Chosef a̱ pit hoyo tok; mihma tu̱shpʋt aboha kʋllo ya̱ okla kohchit isht‐ʋla tok: mihma ile sha̱fi mʋt, nafohka inla ishit fohka cha, Falaoh ha̱ ont iba chukowa tok.

¹⁵ Mihma Falaoh hʋt Chosef a̱, Naholhpokna sa holhpokna tuk o̱ kʋna hosh an toshola hinla kʋt ikshoshke: atuk o̱ chishno ak osh naholhpokna ha̱ ithanʋt ish toshola hinla achi ho̱ chi haklo li tuk oke, im achi tok.

¹⁶ Mihma Chosef ʋt Falaoh ha̱ im afalaminchit, Ʋno ak keyu hoke, Chitokaka ak osh Falaoh ha̱ anumpa falama achukma ho̱ ima chi̱ hoke, achi tok.

¹⁷ Mihma Falaoh hʋt Chosef a̱, Sa holhpokna mʋt, yakeh, okhina ontalaka hikia li tuk oke.

¹⁸ Mihma yakeh, wak tek untuklo nipi nia achukma, micha pisa achukma hosh okhina et kohcha tuk: micha okhina ontalaka ai impa tuk oke.

¹⁹ Mihma yakeh, wak tek inla untuklo hliposhi, pisa ik achukmo, nipi chunna hosh okpulo kʋt yʋmma chohmi ka̱ Echip yakni moma ka̱ pisa li chatuk keyu ho̱ et iakaiyʋt kohcha tuk oke.

²⁰ Mihmʋt wak tek chunna, pisa ik achukmo yash osh wak tek nia achukma untuklo ʋmmona kash ʋpʋt tahli tuk oke.

²¹ Atuk osh ʋpʋt tahli mʋt ʋpʋt tahli tuk a̱ akostinincha he keyu tuk; amba pisa ik achukmo kʋt ʋmmona tuk ʋt imoma tuk oke. Yohmi ho̱ sai okcha tuk oke.

²² Atuk osh sa holhpokna cha, pisa li ma, yakeh, ʋpi achʋfa ka̱ noshkobo untuklo hosh alota, micha achukma hosh kohcha tuk oke.

²³ Mihma yakeh, noshkobo untuklo hosh shila, chipinta, micha hʋshi akochaka mahli ishit bʋshshi yosh iakaiyʋt kohcha tuk oke.

²⁴ Mihma noshkobo chipinta yash osh noshkobo achukma untuklo kash nanʋblit tahli tuk oke: atuk o̱ natosholi ʋhleha ha̱ im anoli li tuk ak o̱, achʋfa kia ʋm anola he keyushke, im achi tok.

²⁵ Mihma Chosef ʋt Falaoh ha, Falaoh holhpokna tuk ʋt achʋfa hoke: Chitokaka yʋt nana kaniohma chi̱ kʋt Falaoh ha̱ im otʋnichi hoke.

²⁶ Wak tek achukma untuklo kash osh afʋmmi untuklo hoke: micha onush noshkobo achukma untuklo kash osh afʋmmi untuklo hoke: naholhpokna hʋt achʋfa hoke.

²⁷ Mikma wak tek untuklo chunna, micha pisa ik achukmo hosh et iakaiyʋt kohcha tuk ash osh afʋmmi untuklo hoke; mikma onush noshkoho chipinta, micha hʋshi akochaka mahli ishit bʋshshi untuklo kash osh afʋmmi untuklo hohchʋfo ha chi̱ hoke.

²⁸ Nana Ilʋppak o̱ Falaoh ha̱ im anumpuli li tuk oke; Chitokaka yʋt nana kaniohma chi̱ kʋt Falaoh ha̱ im otʋnichi hoke.

²⁹ Yakeh, Echip yakni moma ka̱ nana waya chinto fehna afʋmmi untuklo hosh minti hoke.

³⁰ Atukma afʋmmi untuklo hohchʋfo hosh et iakaiya chi̱ hoke: mikma nawaya laua achukma tuk moma ka̱ Echip yakni ya̱ ai im ahaksa chi̱ hoke: mikma hohchʋfo kʋt yakni ya̱ tahla chi̱ hoke.

³¹ Hohchʋfo yʋmmʋt et iakaiya kak o̱ nawaya laua achukma tuk a̱ yakni yʋmma ai ithana chi̱ keyu hoke: palʋmmi fehna chi̱ hoka.

³² Micha hitukla ha̱ Falaoh ha̱ naholhpokna in tuklochi tuk ʋt Chitokaka yʋt nana ka̱ kʋllochit apesa cha chekosikma Chitokaka yʋt aia̱hlichia chi̱ kak atuk oke.

³³ Yʋmohmi hoka himak a̱ Falaoh hʋt hatak ʋt nana ka̱ ahah, ahni cha hopoyuksa yo̱ hoyot ik ahayuchi cha, Echip yakni ya̱ pehlichi ya chi̱ ho̱ hilechashke.

³⁴ Falaoh hʋt ilʋppak o̱ ik yʋmihchi, micha yakni ya̱ apesʋchi ʋhleha atokolit hilechi cha, Echip yakni ya̱ afʋmmi untuklo nawaya laua achukmakma ishit tahlapi ka̱ okla ishashke.

³⁵ Mikma afʋmmi achukma yʋmmʋt ʋlakma, ilhpak moma ka̱ itʋnahlashke, mikmʋt Falaoh ha̱ ibbak fohkit bohli cha, tʋmaha holihta puta ka̱ ilhpak ashachit ieshashke.

³⁶ Mikma ilhpak yʋmmʋt afʋmmi untuklo hohchʋfo ʋt Echip yakni ya̱ a̱sha chi̱ ta̱kla ka̱ yakni ya̱ im ilhpak osh aiashashke; yʋmohmi ho̱ yakni ʋt hohchʋfo kak o̱ ik mosholo kashke, im achi tok.

³⁷ Mihma nana ka̱ Falaoh micha in tishu ʋhleha moma aiena kʋt achukma, ahni tok.

³⁸ Mihmʋt Falaoh hʋt in tishu ʋhleha ha̱, Chitokaka imi shilombish ʋt ibafoyuka hatak ilʋppa chohmi ka̱ il ahayucha hinla cho? im achi tok.

³⁹ Micha Falaoh ʋt Chosef a̱, Chitokaka yʋt ilʋppa moma ka̱ chim otʋnichi tuk oka, achʋfa kia nana ka̱ ahah, ahni, micha hopoyuksa kʋt chishno chohmi kʋt ikshoshke:

⁴⁰ An chuka achʋfa ya̱ ish pehliecha chi̱ hoke: micha chim anumpa pulla ho̱ ʋm okla moma kʋt iakaiya chi̱ hoke: mi̱ko im aiombinili holitompa ak illa ho̱ chi̱ shahli la chi̱ hoke, im achi tok.

⁴¹ Micha Falaoh hʋt Chosef a̱, Yakeh, Echip yakni moma ka̱ pehlichi ya chi̱ ho̱ chi atokoli lishke, im achi tok.

⁴² Micha Falaoh hʋt ibbak ushi fohka ya̱ shu̱fi cha, Chosef ibbak a̱ fohki mʋt, linen tapʋski nafohkʋchi mʋt, tʋli lakna itatakʋli ikunla afohommi tok.

⁴³ Micha itichanʋlli atukla i̱ hikia tuk ʋt ombinilichi tok: mihma tikba okla pa̱yʋt a̱yʋt, Hʋsh hʋchukbihlepashke, ahanchi tok: micha Echip yakni moma ka̱ pehlichi ikbi tok.

⁴⁴ Micha Falaoh hʋt Chosef a̱, Falaoh sia hoke, chishno ak o̱ keyu ka̱ Echip yakni moma ka̱ hatak nana kia ibbak okmá, iyi yokmá, nana ka̱ ʋba wiela he keyushke, im achi tok.

⁴⁵ Micha Falaoh hʋt Chosef hohchifo ha̱ Safnalh‐paaneah achi tok; micha naholitompa isht ʋtta On ʋtta Poti‐felah ya̱ ushetik Asenalh, tekchi ya chi̱ ho̱ ima tok: mihma Chosef ʋt Echip yakni moma ka̱ hlopullit a̱ya tok.

⁴⁶ Micha Chosef ʋt Echip i̱ mi̱ko ya̱ itikba hikia mʋt, afʋmmi pokoli tuchina tok: mihmʋt Chosef ʋt Falaoh itikba hikia tuk ʋt kohcha mʋt, Echip yakni moma ka̱ hlopullit a̱ya tok.

⁴⁷ Atuk o̱ afʋmmi untuklo nana waya achukma yʋt ʋla na, yakni ʋt ibbak alota ho̱ waya tok.

⁴⁸ Mihma afʋmmi untuklo ilhpak moma Echip yakni aiasha tuk a̱ itʋnahli cha, tʋmaha holihta puta ilhpak a̱ ai ashachi tok: tʋmaha holihta puta apakfoyupa ka̱ ilhpak osapa aiasha tuk a̱ mih makinli ho̱ ai ashachi tok.

⁴⁹ Micha Chosef ʋt onush itʋnahli ka̱ laua fehna kʋt okhʋta shinuk aiasha kak o̱ choyumichit hotihna kʋt issa tok: a holhtina iksho hatuk oka.

⁵⁰ Afʋmmi hohchʋfo ʋt ik lo ki̱sha ho̱ Chosef ʋt ushi tuklot asha tok: yʋmma On naholitompa isht ʋtta ushetik Asenalh ʋt im eshi tuk atok.

⁵¹ Mihma Chosef ʋt ʋttahpi hohchifo ha̱ Manasseh achi tok; nan‐isht‐sʋlbʋsha moma, micha a̱ki in chuka achʋfa moma ka̱ Chitokaka yʋt ʋmi haksichi hoka, achi tok.

⁵² Micha atukla hohchifo ha̱ Eflaim achi tok: yakni a sʋlbʋsha ya̱ Chitokaka yʋt sa wayʋchi hoka, achi tok.

⁵³ Atuk o̱ Echip yakni ya̱ afʋmmi untuklo nawaya laua yʋt ont taha tok.

⁵⁴ Mihma Chosef ʋt achi tok mak o̱ afʋmmi untuklo hohchʋfo ʋlʋt ishtia tok: micha hohchʋfo kʋt yakni moma tok: yohmi kia Echip yakni moma ka̱ pʋska ʋt a̱sha tok.

⁵⁵ Atuk o̱ Echip yakni moma ka̱ hohchʋfo mʋt, okla hʋt Falaoh ha̱ pʋska im asilhha ma, Falaoh hʋt Echip okla moma ka̱ Chosef ak o̱ oh im oná; nana ho̱ hʋchim achikma, hʋsh yʋmohmashke, im achi tok.

⁵⁶ Mihma hohchʋfo kʋt yakni paknaka moma ka̱ palʋmmi fehna tok: mihma Chosef ʋt ilhpak ai itola moma ka̱ tiwi cha, Echip okla ha̱ i̱ kanchi tok: mihma Echip yakni ya̱ hohchʋfo palʋmmi kʋt i̱ shahlit ma̱ha̱ya tok.

⁵⁷ Mihma yakni inla moma kʋt onush chumpa chi̱ hosh Echip a̱ onʋt Chosef a̱ im ona beka tok: yakni moma ka̱ hohchʋfo kʋt palʋmmi hatuk oka.