Genesis 40 - Chahta Holisso Holitopa 1886

¹ Atuk o̱ ilʋppa puta kʋt yʋmohmi ha ya̱ yakohmi tok, Echip i̱ mi̱ko aiishko sholi, micha pʋska ikbi itatuklo kʋt i̱ shahli Echip i̱ mi̱ko ya̱ nan im ashʋchi tok.

² Atuk o̱ Falaoh ʋt in tishu tuklo, aiishko sholi i̱ shahli, micha pʋska ikbi i̱ shahli ya̱ i̱ nukhobela tok.

³ Micha aboha kʋllo ya̱, nan atoni i̱ kʋpitʋni in chuka, aboha kʋllo Chosef ʋt a talakchi tuk a̱ apitta tok.

⁴ Mihma nan atoni i̱ kʋpitʋni ʋt Chosef ibbak fohki na, apesʋchit nana hoyot ima tok: mihma nitak hopaki ho̱ aboha kʋllo ya̱ ai a̱lhto tok.

⁵ Atuk o̱ itatu̱klot naholhpokna ho̱ holhpokna mʋt, hatak achʋfa ila bi̱ka ninak achʋfa holhpokna tok; Echip i̱ mi̱ko aiishko i̱ sholi, micha pʋska im ikbi talakchit aboha kʋllo a̱lhto tuk ʋt naholhpokna toshowa inla bi̱ka ho̱ holhpokna tok.

⁶ Atuk o̱ Chosef ʋt onnahinli ma ont iba chukowa cha, pisa ma, Yakeh, ilapissa tok.

⁷ Mihma Falaoh in tishu tuklo kʋt i̱ shahli in chuka aboha kʋllo ya̱ apehʋt a̱sha tuk a̱ i̱ ponaklot, Nanta katiohmi ho̱ himak nitak a̱ hʋsh ilapissa cho? achi tok.

⁸ Naholhpokna ho̱ pi holhpokna tuk o̱, tosholi ʋt ikshoshke, im achit okla tok. Mihma Chosef ʋt, Tosholi kʋt Chitokaka ak osh immi keyu cho? Ʋm anolí, hʋchim asilhha lishke, im achi tok.

⁹ Mihma mi̱ko aiishko sholi i̱ shahli ʋt holhpokna tuk ʋt Chosef a̱ im anoli mʋt, Sa holhpokna ma pa̱kʋpi ʋt sa tikba ya̱ hikia tuk oke.

¹⁰ Mihma pa̱kʋpi ya̱ naksish tuchina hosh hieli tuk oke: micha bokubli ahoba mʋt, pakanlit kohcha tuk oke: mihmʋt lukussa yash osh pa̱ki nuna yo̱ toba tuk oke.

¹¹ Mihma Falaoh im isht‐ishko ʋt sʋbbak foka tuk osh pa̱ki yash ishi li mʋt, bushlit Falaoh im isht‐ishko ya̱ ʋni li mʋt, isht‐ishko yash Falaoh ibbak a̱ fohki li tuk oke, im achi tok.

¹² Mihma Chosef ʋt, Toshowa kʋt ilʋppak oke: Naksish tuchina kʋt nitak tuchina hoke:

¹³ Nitak tuchina takla ma Falaoh ʋt chi noshkobo ha̱ akachakalichi cha, ish ahikia ya̱ falʋmminchit chi hilecha chi̱ hoke: mikma Falaoh im isht‐ishko ya̱ aiishko sholi chia moma mʋt, ish yʋmihchi beka tok ʋt chohmit Falaoh ibbak a̱ ish fohka chi̱ hoke.

¹⁴ Yohmi kia chim achukmakmʋt, is sʋthanʋt is sa̱ kanashke, chim asilhha lishke; micha Falaoh ya̱ is si anoli cha, aboha kʋllo ilʋppa is sa kohchichashke;

¹⁵ Heblu yakni ya̱ a hu̱kopʋt sʋsht ʋla tok o̱ mʋhli hoka: micha ilʋppak kia nana ho̱ yʋmihchi li tuk o̱ aboha kʋllo ilʋppa sa fohka he ʋlhpesa kʋt iksho akinli hoke, im achi tok.

¹⁶ Mihma pʋska ikbi i̱ shahli hʋt toshowa kʋt achukma na pisa mʋt, Chosef a̱, Ʋno ak kia sa holhpokna tuk oke; mihma yakeh, sa noshkobo ha̱ tʋpak yauwahʋt tʋnna tuchina hosh on taloha tuk oke.

¹⁷ Mihma tʋpak paknaka fehna talaia ka̱ napalʋska ilaiyukali hosh Falaoh im a̱lhto tuk oke: mihma hushi puta kʋt tʋpak ʋt sa noshkobo on talaia ka̱ ai ʋpa tuk oke, im achi tok.

¹⁸ Mihma Chosef ʋt afalaminchit, Toshowa kʋt ilʋppak oke: Tʋpak tuchina kʋt nitak tuchina hoke:

¹⁹ Nitak tuchina taklakma, Falaoh ʋt chi noshkobo ha̱ akachakalichit chim ai ishi cha, iti yo̱ on chi takalicha chi̱ hoke: mikma hushi puta kʋt chi nipi ya̱ chim ai ishit ʋpa chi̱ hoke, achi tok.

²⁰ Atuk o̱ nitak ont atuchina, yʋmmʋt Falaoh ʋt aiʋtta tok nitak atuk o̱ yakohmi tok, in tishu ʋhleha moma ka̱ impʋchi im ikbi tok: mihmʋt aiishko sholi i̱ shahli, micha pʋska ikbi i̱ shahli ya̱ noshkobo ha̱ akachakalichit in tishu ʋhleha ta̱kla hiohlichi tok.

²¹ Micha aiishko sholi i̱ shahli yash falʋmminchit aiishko sholi ya̱ anonti hilechi tok: mihma isht‐ishko ya̱ Falaoh ibbak a̱ fohki beka tok.

²² Amba Chosef ʋt in tosholi tuk mak o̱, pʋska ikbi i̱ shahli ya̱ iti yo̱ on takalichi tok oke.

²³ Yohmi tuk kia aiishko sholi i̱ shahli hʋt Chosef a̱ ik ithano hosh, amba im ahaksi tok.