Genesis 36 - Chahta Holisso Holitopa 1886

¹ Yohmi ka̱ ilʋppak osh Esau, yʋmmʋt Etom in chuka achʋfa ya̱ anoli holisso yoke.

² Esau ʋt Kenan ushetik ʋhleha ho̱ ohoyo ha̱ ai ishi tok: Hittait hatak Elon ushetik Atah, micha Hifait hatak Sibeon ushetik Anah ya̱ ushetik Aholibamah;

³ Micha Ishmael ushetik, Nebacholh in tek Bashemalh ak atok.

⁴ Mihma Atah ʋt Elifas a̱ Esau im eshi tok; mihma Bashemalh ʋt Luel a̱ im eshi tok.

⁵ Mikma Aholibamah ʋt Cheush, micha Chaalam, micha Kolah ya̱ eshi tok: ilʋppa puta kak osh Esau ushi ʋhleha hosh Kenan yakni ya̱ im aiasha tok.

⁶ Atuk o̱ Esau ʋt tekchi ʋhleha, micha ushi ʋhleha, micha ushetik ʋhleha, micha nana hosh in chuka achʋfa aiasha tu̱k moma, micha i̱ nanʋlhpoa chipinta, micha i̱ nanʋlhpoa hochito, micha imila̱yak moma Kenan yakni ai ahayuchi tuk ʋt ishi cha, itibapishi Chekob itikba ya̱ i̱ filʋmmit yakni inla ya̱ ia tok.

⁷ Imila̱yak laua kak osh itibai ashwa he keyu hokʋt: micha i̱ nanʋlhpoa pulla kak o̱ okla inla yosh yakni ai aha̱shwa tuk ʋt ai impa yʋt taha hinla kak atok.

⁸ Yʋmohmi ho̱ Esau ʋt Sei nʋnih hak o̱ ahanta tok: Esau ʋt Etom oke.

⁹ Micha ilʋppa puta kak osh Etomait ʋhleha ha̱ i̱ki Esau ya̱ in chuka achʋfa yosh Sei nʋnih ha̱ aiasha tok a̱ holisso anoli hoke,

¹⁰ Hohchifo ilʋppa puta kak osh Esau ushi ʋhleha hohchifo hoke: Esau tekchi Atah ya̱ ushi Elifas: Esau tekchi Bashemalh a̱ ushi Luel ak atok.

¹¹ Mikma Elifas ushi ʋhleha hʋt Teman, Oma, Sefo, Katam, micha Kenas ak atok.

¹² Mihma Timna ʋt Esau ushi Elifas a̱ im itaiena atok: atuk osh Elifas a̱ Amalek im eshi tok: ilʋppa puta kak osh Esau tekchi Atah ya̱ ushi ʋhleha hatok.

¹³ Mikma ilʋppa puta kak osh Luel a̱ ushi ʋhleha hatok: Nahalh, micha Selah, Shammah, micha Missah: ilʋppa puta kak osh Esau tekchi Bashemalh a̱ ushi ʋhleha hatok.

¹⁴ Mikma ilʋppa puta kak osh Sibeon ushetik Anah ya̱ ushetik Esau tekchi Aholibamah ya̱ ushi ʋhleha hatok: micha Esau ya̱ Cheush, micha Chaalam, micha Kolah aiena ka̱ im eshi tok.

¹⁵ Ilʋppa puta kak osh Esau ushi hatak pehlichi ʋhleha hatok: Esau ushi ʋttahpi Elifas a̱ ushi ʋhleha hʋt hatak pehlichi Teman, hatak pehlichi Oma, hatak pehlichi Sefo, hatak pehlichi Kenas.

¹⁶ Hatak pehlichi Kolah, hatak pehlichi Katam, micha hatak pehlichi Amalek ak atok; ilʋppa puta kak osh hatak pehlichi ʋhleha hosh Elifas a̱ akohcha tok osh Etom yakni ya̱ aiasha tok: ilʋppa puta kak osh Atah ya̱ ushi ʋhleha hatok.

¹⁷ Mikma ilʋppa puta kak osh Esau ushi Leuel a̱ ushi ʋhleha hatok: hatak pehlichi Nahalh, hatak pehlichi Selah, hatak pehlichi Shammah, hatak pehlichi Missah, ak atok: ilʋppa puta kak osh hatak pehlichi ʋhleha hosh Leuel a̱ akohcha tuk osh Etom yakni ya̱ aiasha tok: ilʋppa puta kak osh Esau tekchi Bashemalh a̱ ushi ʋhleha hatok.

¹⁸ Mikma ilʋppa puta kak osh Esau tekchi Aholibamah ya̱ ushi ʋhleha hatok; hatak pehlichi Cheush, hatak pehlichi Chaalam, hatak pehlichi Kolah ak atok: ilʋppa puta kak osh hatak pehlichi ʋhleha hosh Anah ushetik Esau tekchi Aholibamah ya̱ akohcha tok.

¹⁹ Ilʋppa puta kak osh Esau (yʋmmʋt Etom oka) ushi ʋhleha hatok: micha ilʋppa puta kak osh i̱ hatak pehlichi ʋhleha hatok.

²⁰ Ilʋppa puta kak osh Holait hatak Sei ya̱ ushi ʋhleha hosh yakni yʋmma a̱sha tok: Lotan, micha Shobal, micha Sibeon, micha Anah,

²¹ Micha Tishon, micha Ese, micha Tishan: ilʋppa puta kak osh Holait okla hatak pehlichi ʋhleha hosh Sei im ʋlla ʋhleha hosh Etom yakni ya̱ aiasha tok.

²² Mikma Lotan im ʋlla ʋhleha hʋt Holi, micha Heman ak atok: mikma Lotan in tek ʋt Timna ak atok.

²³ Mikma Shobal im ʋlla ʋhleha hʋt ilʋppa puta kak atok: Alfan, micha Manahalh, micha Ebal, Shefo, micha Onam ak atok.

²⁴ Mikma ilʋppa puta kak osh Sibeon im ʋlla ʋhleha hatok: Akah, micha Anah itatuklo tok: Anah ilʋppak osh i̱ki Sibeon im issuba haksobish falaia impʋchi hosh yakni haiaka anta mʋt, kʋli lʋshpa ka̱ ai ahayuchi tok.

²⁵ Mikma Anah im ʋlla ʋhleha hʋt ilʋppa puta kak atok: Tishon, micha Anah ushetik Aholibamah ak atok.

²⁶ Mikma ilʋppa puta kak osh Tishon im ʋlla ʋhleha hatok; Hemtan, micha Eshban, micha Ilhlan, micha Chelan ak atok.

²⁷ Ese im ʋlla ʋhleha hʋt ilʋppa puta kak atok: Bilhan, micha Saafan, micha Akan ak atok.

²⁸ Tishan im ʋlla ʋhleha hʋt ilʋppa puta kak atok: Us, micha Alan ak atok.

²⁹ Hatak pehlichi ilʋppa puta kak osh Holait okla a kohcha tok; hatak pehlichi Lotan, hatak pehlichi Shobal, hatak pehlichi Sibeon, micha hatak pehlichi Anah.

³⁰ Hatak pehlichi Tishon, hatak pehlichi Ese, hatak pehlichi Tishan: ilʋppa puta kak osh hatak pehlichi ʋhleha hʋt Holi ya̱ a kohchʋt, hatak i̱ pehlichi ʋhleha ha̱ iba holhtina yosh Sei yakni ya̱ aiasha tok.

³¹ Mi̱ko ilʋppa puta kak osh, Islael ushi ʋhleha ha̱ i̱ mi̱ko ʋt ik i̱ mi̱ko ki̱sha ma, Etom yakni ya̱ a mi̱ko tok.

³² Mikma Beo ushi Bela ʋt Etom a̱ a mi̱ko tok: micha in tʋmaha holihta hohchifo hʋt Tinhabah atok.

³³ Atuk osh Bela ʋt illi tok; mihma Boslah ʋtta Selah ushi Chobab ak osh ʋlhtobʋt mi̱ko tok.

³⁴ Atuk osh Chobab ʋt illi tok: mihma Temani yakni aiʋtta Husham ak osh ʋlhtobʋt mi̱ko tok.

³⁵ Atuk osh Husham ʋt illi tok; mihma Betat ushi Hatat (yʋmmak osh Mitian okla ha̱ Moab i̱ yakni ya̱ ai issot kanchi tok ak osh,) ʋlhtobʋt mi̱ko tok: micha in tʋmaha holihta hohchifo hʋt Afilh atok.

³⁶ Atuk osh Hatat ʋt illi tok: mihma Maslekah aiʋtta Samlah ak osh ʋlhtobʋt mi̱ko tok.

³⁷ Atuk osh Samlah ʋt illi tok; mihma okhina bili̱ka talaia Lehobolh aiʋtta Sal ak osh ʋlhtobʋt mi̱ko tok.

³⁸ Atuk osh Sal ʋt illi tok: mihma Akbo ushi Baal‐hanan ak osh ʋlhtobʋt mi̱ko tok.

³⁹ Atuk osh Akbo ushi Baal‐hanan ʋt illi tok; mihma Hatat ak osh ʋlhtobʋt mi̱ko tok: micha in tʋmaha holihta hohchifo hʋt Pau atok; micha tekchi hohchifo kʋt Mehetabel osh Matlet ushetik a̱ Mesahab ushetik atok.

⁴⁰ Mikma hohchifo ilʋppa puta kak osh hatak pehlichi ʋhleha Esau a kohcha tok ʋt in chuka achʋfa ʋlhpi̱sʋt, i̱ yakni ya̱ ʋlhpi̱sʋt hohchifo hatok: hatak pehlichi Timnah, hatak pehlichi Alfah, hatak pehlichi Chehlelo,

⁴¹ Hatak pehlichi Aholibamah, hatak pehlichi Elah, hatak pehlichi Pinon,

⁴² Hatak pehlichi Kenas, hatak pehlichi Teman, hatak pehlichi Mibsa,

⁴³ Hatak pehlichi Maktiel, hatak pehlichi Ilam, ilʋppa puta kak osh i̱ yakni aiyukali aiasha kʋt ʋlhpi̱sa hosh hatak pehlichi ʋhleha hosh Etom a̱ aiasha tok: yʋmmʋt Esau Etomait ʋhleha ha̱ i̱ki atok.