Genesis 34 - Chahta Holisso Holitopa 1886

¹ Mihma Leah ushetik Tinah Chekob a̱ im eshi tok ʋt yakni yʋmma ohoyo ʋhleha ha̱ kohchʋt pisʋt ia tok.

² Atuk o̱ yakni yʋmma i̱ mi̱ko Hifait Hamo ya̱ ushi Shekem ʋt pisa mʋt, hokli cha iba tʋshkit litehli tok.

³ Atuk osh Chekob ushetik Tinah ya̱ chu̱kʋsh ʋt asitia tok; micha ohoyo himita ya̱ anushkunna mʋt, ohoyo himita yash i̱ kanʋt im anumpuli tok.

⁴ Micha Shekem ʋt i̱ki Hamo ya̱ im anumpulit, Ohoyo himita ilʋppa sa tekchi ya chi̱ ho̱ ishit is sʋmashke, achi tok.

⁵ Atuk o̱ Chekob ʋt, ushetik Tinah ya̱ litehli tuk a̱ haklo tok: (yohmi ka̱ ushi ʋhleha hʋt i̱ nanʋlhpoa pehlichit yakni haiaka ya̱ a̱sha tok: mihmʋt ik lo ki̱sha ka̱, Chekob ʋt nana ik acho tok.)

⁶ Mihma Shekem i̱ki Hamo ʋt kohchʋt iʋt Chekob a̱ ont itim anumpuli tok.

⁷ Atuk o̱ Chekob ushi ʋhleha hʋt haklo mʋt, yakni haiaka ya̱ kohchʋt ʋla tok: micha Chekob ushetik a̱ iba tʋshkit, Islael a̱ nana ik achukmo, yʋmmʋt yʋmohma he ʋlhpesa keyu ho̱ yʋmohmi tuk ak o̱, hatak ʋhleha hash osh nukha̱klo mʋt, okla nukhobela fehna tok.

⁸ Mihma Hamo ʋt itim anumpulit, Sʋso Shekem chu̱kʋsh ʋt hʋch isotek a̱ ahni fehnʋshke: tekchi ya chi̱ ho̱ hʋsh i̱ bohlashke, hʋchim asilhha lishke.

⁹ Micha hʋsh pim itauwaya cha, hʋch isotek ʋhleha ha̱ hʋsh pimakmʋt, pisotek ʋhleha ha̱ hʋsh ishashke.

¹⁰ Micha pi takla hʋsh aiashashke: mikma yakni ʋt hʋchi tikba talaia chi̱ hoke; ai itatobʋt hʋsh aiasha cha, hʋch imila̱yak a̱ hʋsh ai ikbashke, achi tok.

¹¹ Mikma Shekem ʋt ohoyo himita hash i̱ki ya̱, micha i̱ nakfi ʋhleha ha̱, Isht i̱ kana ya̱ hʋchi tikba ya̱ ai ahayuchi lashke; mikma nana ho̱ hʋs sa̱ mihakma, bohli lashke.

¹² Ohoyo isht ʋlhtoba, micha nahʋlbina laua kʋt kaniohmi kia hʋs sʋm apesashke; mikma nana ho̱ hʋs sa̱ mihakma bohli lashke: ik kaniohmi kia satekchi ya chi ho̱ ohoyo himita yash hʋs sʋmashke, im achi tok.

¹³ Mihma Chekob ushi ʋhleha hʋt, in tek Tinah ya̱ litehli tuk ak o̱, Shekem, micha i̱ki Hamo itatuklo ka̱ haksichi hosh afalaminchit,

¹⁴ Nana ilʋppa e yʋmihcha he keyu, kʋna hosh hakshup tʋpa keyu ka̱ pin tek a̱ il ima he keyu hoke: yʋmmak okʋt ishit pi hofahya hinla hoka.

¹⁵ Amba ilʋppak okmʋno ʋlhpesa e chim ahna hinla; Pishno akinli chohmit, nakni hʋchia moma kʋt hakshup hʋchi tʋpa hokma,

¹⁶ Yohmikma pisotek ʋhleha ha̱ e hʋch ima cha, hʋch isotek ʋhleha ha̱ il isha hi oke; yohmi kʋt hʋchi takla il ai asha cha, okla achʋfa eho tobashke.

¹⁷ Amba hʋchi tʋpa hi ʋt hʋsh pi̱ haponakla he keyukma, yohmikma pisotek a̱ il ishikmʋt, il ia chi̱ hoke, im achi tok.

¹⁸ Mihma im anumpa ha̱ Hamo, micha Hamo ushi Shekem itatuklo kʋt im aiokpanchi tok.

¹⁹ Mihma hatak himita yash osh Chekob ushetik a̱ anushkunna hatuk osh nana ka̱ ik ahchibalo hosh yʋmihchi tok: micha holitopa kʋt i̱ki in chuka achʋfa ya̱ moma i̱ shahli hatok.

²⁰ Mihma Hamo, micha ushi Shekem itatuklo kʋt in tʋmaha holihta okhissa ya̱ ona cha, in tʋmaha holihta hatak ʋhleha ha̱ itim anumpulit,

²¹ Hatak ilʋppa puta kʋt pit i̱ kana achukmʋshke; yʋmohmi hokʋt yakni ya̱ aiasha cha, ai itatobashke; yakeh, yakni ʋt chito kʋt im ʋlhpesa hoka: ushetik ʋhleha ha̱ ishit il itauwayakmʋt, pisotek ʋhleha ha̱ il imashke.

²² Peh yʋmmʋt hakshup tʋpa ka̱ chohmit nakni hʋpia moma iloh aiasha kʋt hakshup hʋpi tʋpa hok mak o̱, ilʋppak okmʋno hatak ʋhleha hash osh ʋlhpesa pim ahni cha, pi takla aiasha na okla achʋfa eho toba hinla hoke.

²³ I̱ nanʋlhpoa chipinta, micha imila̱yak, micha i̱ nanʋlhpoa hochito puta moma kʋt pimmi ha chi̱ keyu cho? peh ʋlhpesa il im ahni hok mak o̱, pi takla aiasha hinla hoke, achit okla tok.

²⁴ Mihma in tʋmaha holihta kohchʋt ia puta moma kʋt Hamo, micha Hamo ushi Shekem a̱ i̱ haponaklo tok: micha in tʋmaha holihta ya̱ kohchʋt ia moma nakni puta moma kʋt hakshup tʋpa tok.

²⁵ Atuk o̱ nitak ont atuchina ma yakohmi tok, hotopʋt taha ma, Chekob ushi tuklo, Simeon micha Lefai, Tinah i̱ nakfi ʋt nukshopa iksho hosh i̱ bʋshpo falaia ieshi bi̱ka cha, tʋmaha holihta ya̱ ʋla cha, nakni moma ka̱ ʋbit tahlit okla tok.

²⁶ Micha Hamo, micha Hamo ushi Shekem itatuklo ka̱ bʋshpo falaia halupa isht ʋbi tok; mihmʋt Tinah ya̱ Shekem in chuka ai ishit kohchi cha, kohchʋt ia tok.

²⁷ In tek a̱ litehli tuk ak o̱, Chekob ushi ʋhleha hʋt illi aiasha ka̱ ont iba chukowa cha, tʋmaha holihta ya̱ wehpuli tok.

²⁸ In chukfʋlhpoa, micha i̱ wak, micha im issuba haksobish falaia, micha nana tʋmaha holihta ya̱ a̱sha tuk, micha osapa ya̱ a̱sha tuk a̱ ishi tok.

²⁹ Micha imila̱yak moma ka̱ ishi cha, im ʋlla chipunta moma, micha ohoyo ʋhleha aiena ka̱ yukachit ishi tok: micha aboha nana aiasha tuk aiena ka̱ wehpuli tok.

³⁰ Mihma Chekob ʋt Simeon micha Lefai ya̱, Hʋs si ataklʋmmi cha, yakni ya̱ okla Kenanait, micha Pelissait a̱ im itin takla ya̱ hʋs sa shuwʋchishke: holhtina kʋt ik sa lauwo hatuk o̱, iti hoyot itʋnaha cha, a̱ sanali cha, sʋba chi̱ hoke, mikma ʋno, micha an chuka achʋfa aiena kʋt illit sʋ taha chi̱ hoke, im achi tok.

³¹ Mihma, Pin tek a̱ ohoyo haui yo̱ chohmicha hinla cho? achi tok.