Genesis 17 - Chahta Holisso Holitopa 1886

¹ Atuk o̱ Eblam ʋt afʋmmi pokoli chakkali akucha chakkali ma, Chihowah yʋt Eblam a̱ i̱ haiaka cha, Chitokaka Nan isht im aia̱hli ataha iksho sia hoke: sa tikba ya ish anoho̱wa cha, ish aia̱hlashke.

² Mikma ʋno ʋt chishno ya̱ nana chitim apesa li pullashke; micha chi apaknʋchit atambliche lashke, im achi tok.

³ Mihma Eblam ʋt hlipiʋt itoyula tok; yohmi ma Chitokaka yʋt im anumpulit,

⁴ Ʋno yokʋto yakeh, nana chitim apesa li ʋt itoyulʋshke; yohmi ka̱ oklushi la̱wa ho̱ i̱ki chia ha chi̱ hoke.

⁵ Micha himak pilla hoka chi hohchifo hʋt Eblam ah he keyu, amba chi hohchifo hʋt Eblaham ah hi oke: oklushi la̱wa ho̱ i̱ki ya chi̱ ho̱ chikbi li hoka.

⁶ Micha chi wayachi li fehnʋt, oklushi puta chi ai ikbi likma, mi̱ko puta kʋt chi ako̱honcha hi oke.

⁷ Micha ʋno ʋt chishno, micha chim ishtatiaka et chiakaiya aiena kʋt ai itishalit mihinti ka̱ nana itim apesa bilia mak o̱, kʋllochit chitim apesa lish, chishno, micha chim ishtatiaka et chiakaiya aiena ka̱ in Chitokaka sia ha chi̱ hoke.

⁸ Mikmʋt Kenan yakni ʋt moma, okla inla yosh ish ai ahanta yakni ya̱ chishno, micha chim ishtatiaka et chiakaiya aiena kʋt hʋchi̱ yakni bilia chi̱ ho̱ hʋch ima la chi̱ hoke: mikmʋt in Chitokaka sia ha hi oke, achi tok.

⁹ Micha Chitokaka yʋt Eblaham a̱, Yʋmohmi hoka a̱ nan itim apesa ya̱ chishno, micha chim ishtatiaka et chiakaiyʋt ai iti shalit mihinti aiena kʋt hʋsh holitoblashke.

¹⁰ Chishno, micha chim ishtatiaka et chiakaiya aiena kʋt hʋsh holitobla he a̱ nan itim apesa pitin takla takali kʋt ilʋppak oke: Ʋlla nakni yosh hʋch iti takla aiasha kʋt momʋt hakshup tʋpashke.

¹¹ Micha hʋchi tikba hakshup nipi ya̱ hʋsh tʋblashke; mikma yʋmmak osh nan itim apesa yash osh ʋno, micha hʋchishno hʋpitin takla ya̱ itoyula ka̱ isht atokowa ya hi oke.

¹² Mikma hʋchim ai itishali puta ka̱ ʋlla nakni yosh nitak untuchina ho̱ hʋchitin takla ya̱ aiasha kʋt momʋt hakshup tʋpashke; chuka ai ʋtta tuk, keyukmʋt okla inla, chim ishtatiaka keyu puta ho̱ chin tʋli holisso ha isht ʋlhtoba tuk.

¹³ Chin chuka ai ʋtta tuk, micha chin tʋli holisso ha̱ isht ʋlhtoba tuk aiena kʋt hakshup tʋpa pullashke: mikma a̱ nan itim apesa yʋt hʋchi nipi ya̱ nana itim apesa bilia mako̱ foyuka hi oke.

¹⁴ Atukma ʋlla nakni hakshup ik tapo, tikba hakshup nipi ʋt ik tapokmʋt, shilombish yʋmmʋt im okla achʋfa ai iti takla ya, fiopa ʋt tʋpa hi oke: a̱ nan itim apesa ya̱ kobʋffi hoke, im achi tok.

¹⁵ Mikma Chitokaka yʋt Eblaham a̱, Chi tekchi Salai ak okʋno Salai ish hochifa he keyu, amba hohchifo hʋt Salah yashke.

¹⁶ Mikmʋt yukpali la chi̱ hoke, micha yʋmmak kia ʋlla nakni yo̱ a chima la hi oke: a̱hli yukpali la chi̱ hoke; mikma oklushi laua ho̱ ishki ya̱ chi̱ hoke: okla i̱ mi̱ko puta kʋt a tohomba hi oke, im achi tok.

¹⁷ Yohmi ma Eblaham ʋt hlipia cha, yukpa mʋt, chu̱kʋsh anu̱ka̱ka, Afʋmmi tahlepa achʋfa kʋt ʋlla im asha chi̱ cho? mikma Salah ʋt afʋmmi pokoli chakkali kʋt ʋlla esha chi̱ cho? achi tok.

¹⁸ Micha Eblaham ʋt, Chitokaka ya̱ Ishmael ʋt chi tikba ya̱ okcha̱yʋt ahantakbano, im achi tok.

¹⁹ Mihma Chitokaka yʋt, Chi tekchi Salah ʋt ʋlla nakni yo̱ chim eshi pulla chi̱ hoke; mikma Aisak ish hochifa chi̱ hoke: mikma nan itim apesa bilia mak o̱ yʋmma, micha im ishtatiaka et iakaiya aiena ka̱ kʋllochit nan itim apesa la hi oke.

²⁰ Ishmael ak okʋno chi̱ haponaklo lishke: yakeh, yukpali lishke, wayʋchit apaknʋchi kʋt atamblichi la chi̱ hoke; mi̱ko auah tuklo ho̱ tobacha chi̱ hoke; micha oklushi chito ho̱ ikbi la chi̱ hoke.

²¹ Yohmi kia Aisak yʋmmak oka afʋmmi inla nitak ʋlhpisa ʋt ont ʋlhpesa himak a̱ chohmikma, chi tekchi Salah ʋt chim esha he ak o̱, kʋllochit nan itim apesa la hi oke, achi tok.

²² Mihmʋt im anumpuli kʋt issa cha, Chitokaka yʋt Eblaham a i̱ filʋmmit ia tok.

²³ Mihma Eblaham ʋt ushi Ishmael ishi cha, in chuka achʋfa ai ʋtta tuk moma, micha in tʋli holisso isht ʋlhtoba tuk moma, micha Eblaham in chuka achʋfa hatak nakni puta moma, Chitokaka yʋt miha tuk mak o̱, mih nitak akinli ho̱ tikba hakshup nipi ya̱ in tʋptuli tok.

²⁴ Micha Eblaham ʋt afʋmmi pokoli chakkali akucha chakkali mʋt, tikba hakshup nipi ʋt in tʋpa tok.

²⁵ Mihma ushi Ishmael ʋt afʋmmi auah tuchina mʋt, tikba hakshup nipi ʋt in tʋpa tok.

²⁶ Mih nitak akinli ho̱, Eblaham ʋt tikba hakshup tʋpa ma, ushi Ishmael ʋt yohmi tok;

²⁷ In chuka achʋfa hatak puta moma chuka ai ʋtta tuk, micha okla inla ai achʋfa tʋli holisso isht ʋlhtoba tuk aiena kʋt tikba hakshup tʋpa tok.