Genesis 15 - Chahta Holisso Holitopa 1886

¹ Ilʋppa puta kʋt yʋmohmi ha ya̱, Eblam ʋt na pisa ho̱ Chihowah im anumpa hʋt im a̱ya cha, Chi nukshopa ná, Eblam ma, chin telihpa, micha nan isht chim ʋlhtoba chito atampa fehna sia hoke, im achi tok.

² Mihma Eblam ʋt, Nanta ho̱ is sʋma chi̱ cho? Chihowah Chitokaka ma, ʋlla ik im iksho yosh a̱ya li hoka, mikma an chuka achʋfa apesʋchi ʋt Tamaskʋs hatak Eliese ilʋppak oke, achi tok.

³ Mihmʋt Eblam ʋt, Yakeh, ʋno ya̱ ʋlla nana kia chik samoshke: yohmi ka̱ an chuka ai ʋtta tuk achʋfa hosh ʋmmi hash ai isha he ʋlhpesa kak oke, achi tok.

⁴ Mihma yakeh, Chihowah im anumpa hʋt im a̱ya mʋt, Ilʋppʋto chimmi ha̱ ai isha he ʋlhpesa ya he keyu; amba chikfoka akinli a kohcha he ak osh chimmi ha̱ ai isha he ʋlhpesa ya hi oke.

⁵ Mihmʋt ilauelit kocha isht ona mʋt, Ʋba pilla ha̱ pit ish hopo̱koyo cha, fochik puta ka̱ ish hotihna hinlakmʋt, ish anolashke, achi tok: Chim isht aiunchololi hʋt yʋmmak o̱ chiyuhma hi oke, im achi tok.

⁶ Mihma Chihowah ya̱ i̱ yimmi tok: mihma yʋmmʋt aiʋlhpiesa im ai itilauechi tok.

⁷ Mihma, Ʋno ak osh yakni ilʋppʋt chimmi hachi̱ mak o̱, chima la chi̱ kʋt, Kaltea yakni talaia Uh ha̱ ai ishit chi kohchi li tok ʋt Chihowah sia hoke, im achi tok.

⁸ Mihma, Chihowah Chitokaka ma, yʋmma ishi la hi ʋt nanta ho̱ isht ithana la chi̱ cho? achi tok.

⁹ Mihma, Wak tek afʋmmi tuchina, micha issi kosoma tek afʋmmi tuchina, micha chukfʋlhpoa nakni afʋmmi tuchina, micha pʋchi yoshuba achʋfa, micha pʋchi himita achʋfa aiena ka̱ is sa̱ hoyashke, im achi tok.

¹⁰ Mihma ilʋppa moma kash ishit im ona cha, iklʋnna ita pahlʋlli mʋt, pahlata aiyukali ka̱ iti chablit kahpuli tok: yohmi kia hushi ano ik ita pahlalo tok.

¹¹ Atuk o̱ hushi puta kʋt nipi yash ant o̱ fohopa ma, Eblam ʋt heli̱hinchi tok.

¹² Atuk o̱ hʋshi ʋt okatulʋt ishtia ma, nusi kʋllo kʋt Eblam a̱ onʋtola tok; mihma yakeh, okhlili chito nukshoblichi fehna hosh onʋtola tok.

¹³ Mihma Eblam a̱, Chim ishtatiaka yʋt okla inla yosh i̱ yakni keyu ka̱ aiasha cha, i̱ yuka hosh a̱ha̱shwa he ya̱ ish ithana pullashke: mikma afʋmmi tahlepa ushta ho̱ ilbʋsha̱hancha hi oke.

¹⁴ Atukma i̱ yuka hosh a̱ha̱shwa he oklushi yʋmma nana im apesa la hi oke: atukma i̱ himmakma ʋlhpoyak chito fehna ho̱ i̱sht kohcha hi oke.

¹⁵ Micha chishno yokʋto nuktaiyalʋt chi̱ki ʋhleha hash o̱ ish im ona hi oke: chi sipoknit taiyaha hosh chi hollohpa hi oke.

¹⁶ Yohmi kia aiitishali ont aiushta kʋto anonti ilʋppa ai ʋla hi oke: Amolait okla nan ai asha̱hanchi kʋt ik aloto ki̱sha hoka, im achi tok.

¹⁷ Atuk o̱ yakohmi tok, hʋshi ʋt okatula na okhlili ma, yakeh, shuti shobulli, micha pʋla libbi aiena kʋt nipi pahlahli, kanohmi kash iti takla ya̱ ant ia tok.

¹⁸ Mih nitak fehna Chihowah yʋt Eblam a̱ nana itim apesʋt, Echip okhina yak o̱ aiʋhlit ia hosh okhina chito Euflates okhina ont ʋhli;

¹⁹ Kenait okla, micha Kenissait okla, micha Katmonait okla,

²⁰ Micha Hittait okla, micha Pelissait okla, micha Lefaim okla,

²¹ Micha Amolait okla, micha Kenanait okla, micha Kikashait okla, micha Chebusait okla aputa aiasha yakni ilʋppa chim ishtatiaka ya̱ ima lashke; achi tok.