Filippian 4 - Chahta Holisso Holitopa 1886

¹ Yʋmohmi ka itibapishi li a̱ holitopa, micha i̱ palata li, isht sai yukpa, micha isht sa holitopa hʋchia ma! kʋllot hikiʋt Chitokaka ya̱ hʋsh ibai achʋfashke, holitopa fehna ʋhleha ma!

² Yuotias a̱ ilbʋshʋt im asilhha li, micha Sintichi ma ilbʋshʋt im asilhha li ka, yʋmmʋt im anukfila it ibai achʋfa hosh Chitokaka ya̱ ibafoyukashke.

³ Mikmʋt chishno itiba toksʋli li a̱hli ak kia chim asilhha lishke, ohoyo yʋmmʋt ʋbanumpa ha̱ isht sʋba toksʋli tuk, micha Klement, micha sʋba toksʋli ʋhleha inla aiena, yʋmma hohchifo hʋt holisso okcha̱ya a takali ka, ish apelahanchashke.

⁴ Chitokaka ya̱ hʋsh ai yukpa na biliashke; micha anonti, Na hʋchi yukpashke, achi lishke.

⁵ Nana ka isht hʋsh il oktampli yʋt hatak moma ka im otaiyanashke. Chitokaka yʋt ʋla̱ hosi hoke.

⁶ Nana kia isht ik hʋchi ataklaiyamo kashke; amba nana puta ka anumpa ilbʋsha anumpulit asihi̱hlʋt aiokpahanchi hosh nana a hʋchi bʋnna kʋt Chihowa ya̱ im annoho̱washke.

⁷ Micha Chihowa im isht it i̱ nanaiya, yʋmmʋt im anukfila moma i̱ shahli yʋt hʋchi chu̱kʋsh, micha hʋchim anukfila aiena ka Klaist Chisʋs pulla hatuk mak o̱ atoho̱na chi̱ hoke.

⁸ Ishtaiyopi ka itibapishi li ʋhleha ma! nana hosh a̱hlikma, nana hosh holitopakma, nana hosh ai ʋlhpiesakma, nana hosh kashofakma, nana hosh aioklikma, nana hosh annoa achukmakma, nan ai ʋlhpesa inla yʋt a̱shakma, anonti aiokpancha he ʋlhpesa kʋt a̱shakma, ilʋppa puta kash hʋsh anukfihinlashke.

⁹ Nana puta yʋmma hʋs sʋm ai ithʋna, micha hʋsh ishi, micha hʋsh ha̱klo, micha hʋs si a pi̱sa aiena tuk ʋt hʋsh yʋmohmashke; yohmikma Chihowa im isht it i̱ nanaiya yʋt hʋch ibafoyuka chi̱ hoke.

¹⁰ Yohmi kia himak ano pola̱ka hʋs si anukfilli tuk ʋt anonti okcha i̱ shahli ka Chitokaka ya̱ isht a sai yukpa fehnʋshke; yʋmmak a hi o̱ isht hʋs si anukfilli tuk kia, hʋsh ai yʋmihcha hinla kak osh ik hʋchim iksho ki tok oke.

¹¹ Nana kʋt ik sʋm ono kak osh ilʋppa achi li ho̱ keyu: kaniohmi ho̱ a hikia li hoh kia, yʋmmak oka si a nuktaiyala he ʋt ithʋnʋt tahli li tuk okʋt.

¹² Kaniohmit nana ka ik sʋm iksho hosh a̱ya li kʋt ithana li, micha kaniohmit nana an laua hosh a̱ya li kʋt ithana li hoke; kanima moma, micha nana puta ka sa kaiya, micha sa hohchʋfo, micha nan an laua, micha nana ik sʋm ono aiena hosh a̱ya li kʋt ithana li hoke.

¹³ Klaist pulla hosh sa hlampkohonchi kak o̱, nana moma ka yʋmihchi la hinla hoke.

¹⁴ Yohmi ak inli kia ai ʋlhpiesa ho̱ yʋmohmit nana ʋm a palʋmmi ka hʋs sʋb anukha̱klot hʋs si apela tok oke.

¹⁵ Yʋmohmi ka Filippian ʋhleha hʋchia ma! ʋbanumpa hʋt anumpa ʋmmona ka Masetonia ya̱ akohchʋt ia li ma, chʋch nana kia nana isht apela he ʋma na ishi la hetuk ash imma ka yʋmohmi keyu ma, amba hʋchishno ak illa tuk ʋt hʋsh ithaiyanashke.

¹⁶ Hlessalonika ya̱ anta li ma, himonna ka pit hʋs sa̱ pila tuk osh, anonti nana ka a sa bʋnna tuk a̱ pit hʋs sa̱ pila tuk oke.

¹⁷ Na hʋlbina sa bʋnna kak o̱ keyu; amba nana achukma hʋsh yʋmohmi tuk isht ai ʋni kʋt hʋchin laua he kak o̱ ahni lishke.

¹⁸ Yohmi kia nana moma ka i̱shi lish, nan an laua hoke; si alotowa hoke, Epaflotitʋs ibbak fohkit nana balama ʋba nan isht aiokpʋchi Chihowa hʋt ʋlhpesa ahni ya̱ et hʋs sa̱ pila tuk a̱, ʋm ʋla tuk oke.

¹⁹ Yohmi ka an Chihowa holitopa fehna kʋt Chisʋs Klaist pulla kak o̱ nana a hʋchi bʋnna moma ka hʋchim atahla hi oke.

²⁰ Yohmi ka Chihowa, micha Pi̱ki yak osh holitopa na biliʋt biliashke. Amen.

²¹ Ʋbanumpa yimmi Klaist Chisʋs ibai achʋfa ʋhleha ha̱ hʋsh aiokpʋchashke. Itibapishi li ʋhleha hʋt si api̱hʋt ma̱ya kʋt hʋchi aiokpʋchishke.

²² Ʋbanumpa yimmi moma kʋt pit hʋchi aiokpʋchi; mihma Sesa in chuka chʋfa yokak heto pit hʋchi aiokpʋchi fehnʋshke.

²³ Pin Chitokaka Chisʋs Klaist isht i̱ kana yʋt hʋsh moyuma ka hʋchi anukfoyukashke. Amen.