Filippian 3 - Chahta Holisso Holitopa 1886

¹ Ishtaiyopi ka itibapishi li ʋhleha ma! Chitokaka ya̱ hʋsh ai yukpashke. Nana kʋt mihi yo̱ ash inli ho̱ hʋchi̱ holissochi li kʋt, ʋm ahchiba keyu mʋhli, amba hʋchishno yak osh isht hʋchi a hlampka chi̱ kak oke.

² Ofi ya̱ ahah! hʋsh im ahnashke, nan ik ʋlhpeso yʋmohmi ya̱ ahah! hʋsh im ahnashke, tʋblit kanchi ya̱ ahah! hʋsh im ahnashke.

³ Pishno ak okʋto hakshup tʋpa shilombish anukfoyukʋt Chihowa holitoblichi, micha Chisʋs Klaist ai yukpa pia, yohmi kʋt haknip a̱ ai anukchieto keyu pia hoke.

⁴ Ʋno ak kia haknip a̱ ai anukchieto la hinla tuk ak inli hoke. Kʋna kia haknip a̱ ai anukchieta hinla kʋt i̱shi ka ahnikma, ʋno ʋt i̱ shahli li hoke.

⁵ Nitak ont isht untuchina ma hakshup sa tʋpa tok, Islael isht ai unchululi, Benchamin apelhichi, Heblu ai a̱hli sia hoke: ʋba nan ʋlhpisa yak okmʋno Falisi yo̱ sia hoke.

⁶ Amosholi hosh chʋch a̱ i̱ palʋmmichit, ʋba nan ʋlhpisa isht ai ʋlhpiesa yʋmmak okmʋno anumpa nana kia si onʋtula he keyu ki tok.

⁷ Yohmi tok kia nana isht ahayuchi li yatuk ʋt, yʋmmʋt Klaist pulla kak o̱ a̱ kʋnia, ahni li tuk oke.

⁸ A̱hli mʋhlishke, yohmi kʋt Klaist Chisʋs an Chitokaka ithana achukma fehna kak o̱ nana puta kʋt peh ik ahobo ahni lishke; yʋmma pulla kak o̱ nana puta kʋt isht a̱ kʋnia, mikmʋt yʋmmak ash o̱ chopilhkʋsh a̱ chohmichi li, yʋmohmit Klaist a̱ asitʋbi li,

⁹ Mikmʋt yʋmma ibafoyuka la he, micha ʋno ak inli kʋt ʋba nan ʋlhpisa yʋmmak o̱ isht ai ʋlhpiesʋt il ai eshi li keyu, amba yʋmmʋt Klaist a̱ i̱ yimmi kʋt nan ai ʋlhpiesa na yimmi pulla kak o̱ Chihowa a minti yak oke:

¹⁰ Yʋmohmi ka Klaist, micha yʋmmʋt illit tani tok nan isht im ai a̱hli, micha yʋmmʋt ai ilbʋsha tok a̱ iba ta̱kla kʋt kaniohmi aiena ka ithana lish, yʋmmʋt illi tok a̱ hoyulba la chi̱ kak a hetuk oke.

¹¹ Ik kaniohmi kia illit tani ka ona li yoba ná, ahni li hatuk osh.

¹² Himak okʋno ona li ma̱shko ahni li keyu, micha himak ak kia ai a̱hlit sa taha ahni li keyu; amba achunanchit iakaiya li, yʋmohmi hosh yʋmmak a he ak o̱ Klaist Chisʋs ʋt si atokoli tok yʋmmak ash ieshi la he ak atuk oke.

¹³ Itibapishi li ʋhleha ma! ont ishi li tuk il ahni li keyu hoke; yohmi kia nana achʋfa ilʋppak o̱ yohmi li, nana puta olbʋl ai asha ka ʋmi haksi cha, nan tikba a̱sha kak o̱ sʋbbak a̱ pit wielit,

¹⁴ Achunanchit ai ʋlbi ya̱ ma̱ha̱ya li, nan ʋlbi yʋmmʋt Klaist Chisʋs pulla kak o̱ Chihowa yʋt ʋba et a hoho̱yo kak oke.

¹⁵ Yohmi ka ai a̱hli aiyuka pia hokʋto, yakohmit pim anukfilashke; yohmi ka nana ka kaniohmit hʋchim anukfila kʋt inla tuk okma, Chihowa yʋt ilʋppak oh kia hʋchim otʋnincha chi̱ koke.

¹⁶ Yohmi kia iloh ai ona ma̱shko hatuk okʋto, yʋmmak ash inli ho̱ kiloh ai itʋnowa cha, nana yʋmmak ash inli ho̱ iloh anukfihinlashke.

¹⁷ Itibapishi li ʋhleha ma! it apehʋt na sa hobachi hʋsh tobashke, micha pishno a̱ hobachi hʋsh ahni kʋt yakohmit a̱ya ʋhleha ha̱ hʋsh holitoblashke.

¹⁸ Lauʋt a̱ya kʋt yʋmma himonna̱ hʋchim anohonli li chatuk osh, anonti himak a̱ nishkin okchi mihinti hosh, yʋmmʋt Klaist im ititaiyukhʋna in tʋnʋp ʋhleha hoka, hʋchim anoli lishke.

¹⁹ Yʋmma ont im ishtayopi kʋt aiokpuloka he, yʋmma i̱ shahli yʋt ilap takoba ak inli, micha nan isht hofahya isht ile holitobli, yʋmmʋt yakni paknaka nana a halaia kak o̱ asitia yoke.

²⁰ Ʋba yakni okla ai achʋfa pia hoka; yʋmmak o̱ a minta hi o̱ pi Okchalinchi Chitokaka Chisʋs Klaist a̱ e hoho̱yo hoke.

²¹ Yʋmmʋt imi̱ hlampko ho̱ isht yʋmihchit nana puta ka imaiyachit il aiesha hinla hokʋt, ilap haknip holitopa ya̱ hoyulba chi̱ ka yʋmmak ash ot pi haknip akanlosi ya̱ inlʋcha hi oke.