Filippian 2 - Chahta Holisso Holitopa 1886

¹ Yohmi ka Klaist atuk pulla mak o̱ ahopohla yʋt a̱sha hokma, i̱ hullo kʋt a nuktanla yʋt a̱sha hokma, Shilombish ai itiba chʋfa yʋt a̱sha hokma, chu̱kʋsh isht i nukha̱klot hi ahni yʋt a̱sha hokma,

² Hʋchim anukfila hʋt itilauit nana a miha chʋfa holitoblit, chu̱kʋsh achʋfa cha, hʋchim anukfila ai achʋfa hosh nan a sai yukpa ya̱ isht hʋs sʋm alotolashke.

³ Anumpa isht itachowa shahli, keyukmʋt ilefehnʋchi nanasi kʋt ik ʋlhtaho kashke; amba chu̱kʋsh akanlosi hosh moyuma kʋt inla yʋt achukma kʋt ilap a̱ i̱ shahli ho̱ anukfillashke.

⁴ Hatak moma kʋt ilap immi kak o̱ bano keyu, amba hatak moma kʋt inla immi ak kia anukfillashke.

⁵ Klaist Chisʋs anukfoyuka tok akinli nan anukfila ilʋp pʋt hʋchi anukfoyukashke.

⁶ Yʋmmʋt Chihowa hoyulba yatuk osh, Chihowa ya̱ ile itilauechi kʋt na wehpuli ya he ahni tok keyu.

⁷ Yohmi kʋt il a kohchichit yuka ohmi ho̱ il aieshit hatak chohmi hosh toba tok oke.

⁸ Micha hatak ohmi hosh haiaka mʋt, il akanlosechit im antia kʋt, ititaiyukhʋna a takalit illi yoh kia isht illi kak atok.

⁹ Yʋmohmi hatuk o̱ Chihowa hʋt holitoblichi fehna mʋt, hochifo kʋt na hohchifo inla moma ka i̱ shahli ho̱ ima tok oke:

¹⁰ Yʋmohmi ka Chisʋs hohchifo ha̱ ʋba yakni aiasha, micha yakni paknaka aiasha, micha yakni nutaka aiasha puta kʋt i̱ hʋchukbihlepa he;

¹¹ Micha hatak isunlʋsh puta kʋt I̱ki Chihowa yʋt isht a holitopa he mak o̱, Chisʋs Klaist ʋt Chitokaka ya he, achit anohonlashke.

¹² Yʋmohmi ka a̱ holitopa ʋhleha ma! hʋs sʋm antia chatuk ʋt hʋchi takla anta li kak bano keyu, amba himonasi yokak heno ik saksho ka i̱ shahlichit hʋs sʋm antia kʋt, nukshumpʋt wʋnihinchi hosh hʋchishno inli aiokcha̱ya ya̱ hʋsh atahlashke.

¹³ Chihowa ak osh ilap nan isht im ʋlhpesa hosh ai ahni kak o̱ ahnit, hʋsh yʋmihcha chi̱ ka hʋchi a toksahanli hoke.

¹⁴ Nana moma ka ik ahninchot na miha keyu, micha anumpa ita chowa mʋt iksho ho̱ hʋsh yʋmihchashke.

¹⁵ Anumpa nana kia hʋchi onʋtonla keyu, nan okpʋni keyu, na liteha lapanli keyu hosh okla shanaiowa, micha nan ai ashʋchi ai ititakla yo̱ yʋmma i̱ pʋla tohwikeli chohmit yakni paknaka ya̱ hʋsh ai ashʋshke.

¹⁶ Micha anumpa okcha̱ya ya̱ hʋsh otʋninchi na Klaist i̱ nitak a̱ pilla ho̱ chaha̱fa li tok keyu, micha pilla ho̱ toksʋli li keyu kʋt sai yukpashke.

¹⁷ A̱hli, na hʋchi yimmit ʋba isht hʋsh il ai okpʋchi, micha nan isht hʋsh ai ahanta aiena ont aia̱hla chi̱ kak o̱, il imi̱ kanchi li hokmʋt, sai yukpʋt hʋsh moma ka hʋch iba yukpa li hoke.

¹⁸ Yʋmmak inli kak o̱ yukpʋt hʋs sʋbai yukpa mak inlishke.

¹⁹ Yohmi kia chekikma Timohliʋs a̱ hʋchi pila la chi̱, yʋmohmi hosh hʋchi a kaniohmi ka akostininchi lish, sai yukpa chi̱ kʋt, ahnit Chitokaka Chisʋs a̱ anukchieto lishke.

²⁰ Nana a hʋchi a kaniohmi ka anukfihinli fehna kʋt hatak inla im anukfila yʋmmak inli ohmi ho̱ ik sʋm iksho hokʋt.

²¹ Moma kʋt ilap immi ak o̱ hoyo mʋt, nana kʋt Chisʋs Klaist immi hokʋno ik hoyo hokʋt.

²² Amba yʋmma imomaka pisa tuk a̱ hʋsh ithana; yʋmmak okʋt ushi yosh i̱ki iba toksʋli chohmit ʋbanumpa isht sʋb a toksahanli tuk oke.

²³ Yʋmohmi ka yʋmmak o̱ chekosikma sa kaniohma chi̱ ka pisa likmʋt, pila la chi̱ ahni lishke.

²⁴ Yohmi kʋt ʋno yak kia chekosikma ona la chi̱, ahnit Chitokaka ya̱ anukchieto lishke.

²⁵ Yohmi ak inli kia Epaflotitʋs, itibapishi li, itiba toksʋli li, micha tʋshka chipota sʋ bi̱ka, micha hʋchim anumpa shahli, micha nana a sa bʋnna tuk a̱ isht ʋm anta chatuk, yʋmmak o̱ hʋchi̱ pila la he ʋlhpesa ahni li tuk oke.

²⁶ Hʋchi̱ palata fehnʋt, ilap ʋt abeka tuk a̱ hʋsh haklo tuk ak o̱ nan a nukha̱klo kʋt chukʋsh a̱ alota fehna tok.

²⁷ Abeka ho mʋhlit illi naha fehna tuk, yohmi kia Chihowa hʋt i̱ nukhaklo tuk: yohmi kʋt yʋmmak bano keyu, amba ʋno ma a̱ nukha̱klo tuk: yʋmmak keyukma sʋlbʋsha kʋt it ʋlbehkʋcha he atuk oke.

²⁸ Yʋmohmi kak o̱ ahni fehnʋt hʋchi̱ pila li tuk oke; yohmi na anonti hʋchi pisa likmʋt, hʋchi yukpakma, ʋno ʋt a nukha̱klo kʋt ik lauwo ka he ak atuk oke.

²⁹ Yʋmohmi hoka Chitokaka ibafoyuka ka chohmichit chu̱kʋsh yukpa biekʋt hʋsh aiokpʋchashke; mikmʋt yʋmma chohmi kash hʋsh holitohomblashke:

³⁰ Klaist ak o̱ in toksʋli pulla kak osh ilap im ilhfiopak a̱ na fehna ik ahno hosh, illi naha fehna kʋt, isht hʋs si apelacha he tuk ik ono ka ʋm atahla chi̱ kak atuk oke.