Filippian 1 - Chahta Holisso Holitopa 1886

Filippi chʋch hikia ka pit aiokpʋchi, 1, 6 Na toksʋli achukma isht wakaya tok ʋt Chihowa hʋt isht ai a̱hlichit im atahla chi̱ ka yimmi. 12 Lom aboha kʋllo afoyuka ka nan isht im anukfila he nana hosh akaniohmi tuk a̱ anoli. 22 Klaist pulla kak o̱ okcha̱ya kak okma, keyukmʋt illi kak okma nana hi ʋt im ʋhltaiahʋt anta tok ʋt anoli.

¹ Pal, micha Timohliʋs, ita tuklo Chisʋs Klaist in tishu hʋt ʋbanumpa yimmi a̱hli ʋhleha Chisʋs Klaist ibafoyuka Filippi ai asha, bishop puta, micha chʋch nan isht im ʋtta puta aiena ka pit aiokpʋchi kʋt,

² Pi̱ki Chihowa, micha Chitokaka Chisʋs Klaist ita tuklo nan isht i̱ kana, micha isht it i̱ nanaiya aiena kʋt hʋchi anukfoyukashke, hʋchim ahnishke.

³ Hʋchi anukfilli li aiyuka kʋt an Chihowa ya̱ yak oke im aiahnit,

^4-5 Nitak na hʋchi yimmi tok ʋhlit mintit ant himak ak o̱ hʋchim ila̱yak iti hopinhinlʋt, ʋbanumpa isht hʋsh apelʋchi kak o̱, anumpa ilbʋsha isht hʋchi anumpuli li puta kʋt chu̱kʋsh yukpʋt isht hʋchi asihi̱hla li̱ biliʋshke.

⁶ Ilʋppa fehna ka sai yimmi hatuk osh, Nan toksʋli achukma isht a hʋchi wakaya kʋt, ai a̱hlichit Chisʋs Klaist i̱ nitak a̱ hʋch isht ona he, ilʋppa fehna ka sai yimmi hatuk oke.

⁷ Yʋmohmit hʋsh moma ka ilʋppa hʋchi anukfilli la he ʋlhpesa, sa chu̱kʋsh isht hʋch ithaiyana li hokʋt; ʋbanumpa isht anumpuli li, micha ai a̱hlichi li hosh sa talakchi aiena ka nan isht i̱ kana hʋs sʋb ai ishi hoka.

⁸ Chisʋs Klaist hiahnit isht i̱ hullo chohmit hʋchi̱ sa palata fehna ka, Chihowa yʋt atokolit si anoli yoka.

⁹ Micha ilʋppa asihi̱hla lishke; yʋmmʋt Chihowa im anumpa ithanʋt, hʋsh akostininchi puta kak osh hʋsh it i̱ hullo kʋt, chitot isht i̱ shahlit hʋsh ma̱ha̱yashke.

¹⁰ Yʋmohmi hosh nana kʋt it im inla ka imoma ka pisʋt, achukmaka ʋlhpesa ahnit, ai a̱hli, isht im ai ibetʋbla he iksho hosh Klaist i̱ nitak a̱ hʋsh onashke.

¹¹ Yʋmohmit Chisʋs Klaist ak atuk mak o̱ nan ai ʋlhpiesa isht ai ʋni isht a hʋchi alotowa na, Chihowa yʋt isht a holitopʋt isht anumpa he yak oke.

¹² Yohmi ka itibapishi li ʋhleha ma! nana ʋm a kaniohmi tuk a̱ ʋbanumpa hʋt isht i̱ shahlit isht atoba tuk a̱ hʋsh ithana he, hʋchim ai ahni lishke.

¹³ Yʋmohmi ka Klaist pulla ho̱ sai yuka kʋt mi̱ko atoni tʋshka chipota i̱ holihta, micha kanima moma ka ai otʋnishke.

¹⁴ Mihma itibapishi li ʋhleha laua kʋt sai yuka kak o̱ Chitokaka anukchieto kʋt, isht i̱ shahlit nukwa̱ya keyu fehnʋt, nukshopa mʋt iksho hosh ʋbanumpa ha̱ isht anumpohonlishke.

¹⁵ Kanimi kʋt isht a̱ potʋnno, micha nan isht an chowa aiena ka bʋnna hosh Klaist a̱ isht anumpulikma; anonti kanimi kʋto a̱ kana he ahni hosh yohmi hoke.

¹⁶ Achʋfa kʋt nan isht an chowa kak o̱ ahni hosh Klaist a̱ isht anumpulit, chu̱kʋsh a̱hli keyu hosh, sai yuka ka ai ʋbechit sʋlbʋshali bʋnna hosh:

¹⁷ Amba achʋfa kʋto holitobli hosh, ʋbanumpa afoʋt isht anumpuli la he si ʋlhtoka tuk a̱ ithana hatuk osh, yohmi hoke.

¹⁸ Yohmi kʋno ik kaniohmi hoh kia peh ilahobi hokmá a̱hli hokmá, nana kia Klaist ʋt isht anumpa hoke; yohmi na yʋmma a sai yukpa a̱hli hosh, a sai yuhu̱kpa chi̱ hoke.

¹⁹ Anumpa ilbʋsha isht hʋs si anumpohonli; micha Chisʋs Klaist imi Shilombish ʋt si apelahanchi aiena, ilʋppak osh isht si okcha̱ya hi a̱ ithana li hokʋt,

²⁰ Yʋmmak a he ahni li fehna kʋt, nana kia isht sa hofahya he keyu, amba nukwa̱ya iksho kʋmohmit ai yʋmohmi chatuk ʋt, a moyuma chi̱ ho̱ si okcha̱ya hokmá, sʋlli hokmá, nana kia Klaist ʋt sa haknip a̱ isht a holitopa hi a̱ ahni li hoke.

²¹ Ʋno yak okʋto si okcha̱ya kʋt Klaist ak okmʋt, anonti sʋlli hoh kia nan isht ʋm ai achukma hoke.

²² Yohmi kia haknip ak o̱ ai anta li hokmʋto, a toksʋli li nan ai ʋni kʋt ilʋppak oke; yohmi kia kanimampo ahni la hinla kʋt ak ithanoshke.

²³ Yakni issʋt ia lish, Klaist a̱ ont ai ibachʋfa li, yʋmmak ok mak o̱ i̱ shahli fehna hoka sa bʋnna hatuk osh, nan a mia tuklo isht a sʋb bikeli hoka:

²⁴ Yohmi kia haknip ai anta li kak o̱ achukma kʋt isht hʋchim i̱ shahli hoke.

²⁵ Micha ilʋppa sai yimmi a̱hli hatuk osh, nana a hʋchi yimmi kʋt i̱ shahlit a hʋchi yukpa kʋt isht i̱ shahla hi ak o̱ hʋsh moyuma ka hʋchi takla ahanta la chi̱ kʋt, ithana lishke.

²⁶ Yohmi ka ʋno pulla, micha hʋchim ona li kak o̱ Chisʋs Klaist a̱ isht hʋsh il ai yukpa kʋt i̱ shahla he ak oke.

²⁷ Nana hʋsh a kaniohmi kʋt Klaist im anumpa ak o̱ isht ai ʋlhpesa kak banashke: yohmi na onʋt hʋchi pesa li hokmá, keyukmʋt kanima a̱ya li ik saksho hokmá nana kia na hʋchim a kaniohmi puta yʋmmʋt shilombish achʋfa, im anukfila achʋfa hosh ʋbanumpa ai yimmi ka hʋsh it iba foho̱ʋt kʋllot hʋsh hieli ho̱ haha̱klo lashke.

²⁸ Micha nana hoh kia hʋchim i̱ sanali puta ka ik hʋchi nukhlakancho kashke: yohmikmʋno yʋmmak okʋto ai okpuloka hi yosh isht ai im atokowa, amba hʋchishno ano isht ai okcha̱ya he Chihowa a minti mak osh isht hʋchim atokowa hoke.

²⁹ Hʋchishno ʋto Klaist pulla kak o̱ yʋmma hʋsh i̱ yimmi kak bano keyu, amba yʋmma pulla kak o̱ nan isht hʋsh im ilbʋsha he hʋchim ʋlhpisa hoka:

³⁰ Yohmi kʋt anumpulit iti̱ kahanlot isht sʋlbʋsha yʋmma hʋs sa pi̱sa tok, anonti himak a si onʋtuyula ka hʋs sa haha̱klo ka yʋmmak inli hosh hʋchi onʋtuyula hoke.