Filemon 1 - Chahta Holisso Holitopa 1886

Filemon a̱ pit aiokpʋchi, mihmʋt na yimmi, micha nan isht i̱ hullo aiena kʋt anukfoyuka ka haklo mʋt, na yukpa; yohmi hosh in tishu Onesimʋs a̱ nana ka i̱ kashofi cha, atuklanchit i̱ hullot aiokpʋcha chi̱ ka ahni fehnʋt miha.

¹ Pal, Chisʋs Klaist ak atuk pulla mak o̱ yuka, micha il itibapishi Timohli yʋt pi̱ holitopa, il itiba toksʋli Filemon,

² Mikmʋt pi̱ holitopa Affia, micha tʋshka il itilaui Achippʋs, micha chʋch chin chuka a̱sha aiena ka pit hʋchi aiokpʋchishke:

³ Nan isht i̱ kana, micha isht it i̱ nanaiya ita tuklo Pi̱ki Chihowa, micha Chitokaka Chisʋs Klaist aiena ka a mihinti kʋt hʋchi anukfoyukashke.

⁴ Anumpa ilbʋsha anumpohonli likmʋt, chithaiyana li kʋt,

⁵ Chitokaka Chisʋs Klaist oka ish i̱ yimmi, micha ʋbanumpuli ʋhleha ha̱ ish i̱ hullo aiena ka haha̱klo li kak osh, Chihowa ya̱ yak oke im ai ahni lishke.

⁶ Na yimmi chi anukfoyuka kʋt ai a̱hli fehnʋt otaha̱ni na Chisʋs Klaist isht a holitopa he mak o̱, nana achukma puta kʋt chi anukfoyuka ka ai ithaiyana hokbano, ai ahnit asilhha lishke.

⁷ Yohmi ka chishno ak atuk pulla mak o̱ ʋbanumpuli ʋhleha chu̱kʋsh ʋt yuhu̱kpa hoka, isht ish i̱ hullo ka isht a pi nuktʋla, micha isht a pi yukpa chintoshke, itibapishili ma!

⁸ Yohmi ka Klaist immi sia hokʋt nana ka nukwa̱ya iksho kamohmi hosh a chim ai ʋlhpiesa ka chim apesa la he ʋlhpiesa kia,

⁹ Pal sipokni, micha Chisʋs Klaist ak atuk pulla mak o̱ yuka ma aiena mih sia hash osh, isht i̱ hullo li pulla atuk mak osh chim asilhha li kak osh ʋm i̱ shahlishke.

¹⁰ Yuka hosh anta li mʋt, tobachi li tok sʋso, Onesimʋs ak atuk pulla mak o̱ chim asilhha lishke.

¹¹ Yʋmmak okʋt tikba hokʋno nan isht chim ai achukma iksho ki tok kia, himonasi kʋno chishno, micha ʋno il ita tu̱klo ka isht pim ai achukma fehnʋshke.

¹² Yʋmmak oka falaminchit pila lishke; sa chu̱kʋsh chiyuhmi hoka i̱ kanʋt ish ishashke.

¹³ Yʋmmak okʋt si awant antʋt, ʋbanumpa ak atuk pulla mak o̱ yuka hosh anta li ka, chishno ak a he tuk mak o̱ chi ʋlhtoba hosh nana kia isht ʋm ahanta he im ai ahni la he ʋlhpesa kia;

¹⁴ Yohmi kia chishno chim anukfila keyu ka, nana kia yʋmohmi la he ak ai ahno: yohmi na nana achukma ish yʋmohmi kʋt ik kaniohmi kia ish yʋmohma hi atuk o̱ keyu, amba chishno inli chim anukfila kak ashke.

¹⁵ Yohmi ka yʋmmak okʋt hʋshi kanʋlli achʋfa chohmi itin takla ho̱ chi̱ filʋmmi na yʋmmak ash ish i̱shi na bilia hi atuk yoba ká;

¹⁶ Yohmi ka yuka keyu, yuka kano i̱ shahli, ʋno yʋt itibapishi li a̱ holitopa ho̱ fehna, amba chishno yokak heno a chimmi, micha Chitokaka ibai achʋfa hokʋt chi̱ holitopa kʋt i̱ shahli fehna hinla keyu̱?

¹⁷ Yohmi ka chibai achʋfa li ka is si ahni hokmʋt, ʋno ak a he tuk ma chiyuhmichit i̱ kanʋt ish ishashke.

¹⁸ Nana kia chim okpʋni tok, micha aheka kia chin takanli hokma, ʋno ak o̱ aheka is sʋm ikbashke.

¹⁹ Pal sia hʋt ʋno sʋbbak ak inli ho̱ isht holissochi li kʋt, atobbi la he mak oke; yohmi kia is sʋm aheka kʋt chishno yak fehna kak kia is san takanli ak inli ak chim achoshke.

²⁰ A̱hlishke, itibapishi li ma! Chitokaka ish ibai achʋfa hoka nana isht chi a sai yukpashke; Chitokaka ish ibai achʋfa hokʋt is sa nuktalalashke.

²¹ Is sʋm antia hinla ka chi̱ yimmi li, micha nana achi li ka i̱ shahli ak inli ish yʋmihcha chi̱ ka ithana li aiena hatuk osh, chi̱ holissochi li tuk oke.

²² Yohmi kia ai‐ʋtta la chi̱kma, aieninchit is sʋm atahlashke: yohmi kʋt anumpa ilbʋsha ish anumpohonli hatuk mak o̱ chim ona la he ai ahni lishke.

²³ Chisʋs Klaist ak atuk mak o̱ yuka sa bi̱ka Epaflas ʋt pit chi aiokpʋchishke.

²⁴ Makʋs, Alistachʋs, Temas, Lukas it ibai toksʋli li ʋhleha aiena kʋt pit chi aiokpʋchishke.

²⁵ Pin Chitokaka Chisʋs Klaist isht i̱ kana yʋt chi Shilombish a̱ ibafoyukashke. Amen.