Eksotʋs 9 - Chahta Holisso Holitopa 1886

¹ Yohmi ma Chihowah yʋt Moses a̱ Falaoh ha̱ ont iba chukowa cha, im anolit; Heblu in Chitokaka Chihowah yʋt yak achishke, Ʋm okla hʋt ik ia cha ik sʋm antiá.

² Ik iá chik ahno hosh, ish halʋlli kʋt momkama,

³ Yakeh, Chihowah ibbak ʋt chi̱ nan ʋlhpoa osapa aiasha ka̱, issuba puta, issuba nashoba puta, kamel puta, wak toksʋli puta, micha chukfi ʋlhpoa puta aiena ka̱ onʋtoyula chi̱ hoke; issish ililli okpulo fehna hosh a̱sha chi̱ hoke.

⁴ Mikma Chihowah yʋt Islael i̱ nanʋlhpoa, micha Echip okla i̱ nanʋlhpoa iti̱ filʋmmicha chi̱ hoke; mikma nana Islael im ʋlla ʋhleha ha̱ immi hokʋto illa chi̱ keyu hoke, ish im achashke, im achi tok.

⁵ Mihma Chihowah yʋt nitak ʋlhpisa ka̱ apesʋt, Onnakma Chihowah yʋt yakni ya̱ nana ilʋppa a yʋmihcha chi̱ hoke, achi tok.

⁶ Mihmʋt onna ma nana ilʋppa Chihowah yʋt yʋmihchi tok; mihma Echip i̱ nanʋlhpoa moma kʋt illi tok; yohmi kia Islael im ʋlla ʋhleha ha̱ i̱ nanʋlhpoa ʋt achʋfa kia ik illo tok.

⁷ Yohmi ka̱ Falaoh hʋt pit pila tok: mihma yakeh, Islael ʋhleha i̱ nanʋlhpoa ʋt achʋfona kia illi tok keyu. Mihma Falaoh chu̱kʋsh ʋt kʋllo cha, okla ha̱ ik iá, ik ahno tok.

⁸ Mihma Chihowah yʋt Moses, micha Alon a̱, Tʋli abila yo̱ hituk chubbi ya̱ ibbak alota ish eshi cha, Falaoh hʋt pi̱sa ho̱ Moses ʋt ʋba pilla pit fimmashke.

⁹ Mikma Echip yakni moma ka̱ lukfi pushi chipuntasi toba cha, Echip yakni moma ka̱ hatak, micha nanʋlhpoa aiena ka̱ onʋtula cha, hichi hlachowa toba chi̱ hoke, im achi tok.

¹⁰ Mihma tʋli abila ya̱ hituk chubbi ya̱ eshit okla cha, Falaoh ha̱ itikba hieli tok; mihma Moses ʋt ʋba pilla pit fimmi tok; mihma hichi hlachowa toba cha, hatak, micha nanʋlhpoa aiena ka̱ onʋtoyula tok.

¹¹ Mihma yushpakʋmmi ʋhleha hʋt hichi ak atuk mak o̱, Moses itikba ya̱ hiela he keyu tok; hichi ʋt yushpakʋmmi ʋhleha, micha Echip okla moma ka̱ onʋtoyula tok oka.

¹² Mihma Chihowah yʋt Falaoh chu̱kʋsh a̱ kʋllochi na, Chihowah yʋt Moses a̱ im anumpuli tuk mak o̱; ik i̱ haponaklo tok.

¹³ Mihma Chihowah yʋt Moses a̱, Onnahinli fehna wakaya cha, Falaoh itikba hikia cha, Heblu in Chitokaka Chihowah yʋt yak achishke, Ʋm okla hʋt ik ia cha, ik sʋm antiá.

¹⁴ Himak ano a̱ nanililli okpulo puta ka̱ chi chu̱kʋsh, micha chin tishu ʋhleha, micha chim okla ha̱ onochi la chi̱ hoke; yʋmohmi ho̱ yakni moma ka̱ ʋno chohmi kʋt iksho ka̱ ish ithaiyana chi̱ hoke.

¹⁵ Himak ano chishno, micha chim oklá aiena ka̱ ililli okpulo ishit chi fahama la chi̱ hosh, sʋbbak a̱ chi o̱ weli lashke; mihna yakni ya̱ ai ishit chi kʋnia chi̱ hoke.

¹⁶ Micha ilʋppak achi̱ ho̱ mʋhli fehnak o̱, nan isht ʋm aia̱hli yʋt chi ai otʋninchi la chi̱ hosh, chi hilechi li tuk oke; micha sa hohchifo hokʋt yakni moma ka̱ hlopullit ai anno̱ho̱wa hi oke.

¹⁷ Ile chahʋchit ʋm okla ha̱ ish i̱ sanali moma cha, ik iá ish ahna he keyu hoke.

¹⁸ Yakeh, onnaha himak a̱ chohmi fokakma, hata̱fo ik achukmo fehna, Echip ʋt talaia tok mihintit himak ant ʋhli ka̱, a yʋmohmi chatuk keyu ho̱ hʋchi on umbʋche la chi̱ hoke.

¹⁹ Yʋmohmi hoka himak a̱ chi̱ nanʋlhpoa, micha nana hosh osapa chim aiasha moma ka̱ hoyot ish itʋnahlashke; hatak, micha nanʋlhpoa chuka isht ik lo tuk a̱ osapa a̱sha moma hata̱fo ʋt onʋtola na, illa chin tuk, achishke, ish im achashke, achi tok.

²⁰ Falaoh in tishu ʋhleha hʋt Chihowah im anumpa ha̱ nukwia kʋt, in tishu ʋhleha, micha i̱ nanʋlhpoa ya̱ tihlelit aboha ha̱ apitta tok.

²¹ Mihma Chihowah im anumpa ha̱ ik yimmo hokʋto in tishu ʋhleha, micha i̱ nanʋlhpoa osapa ya̱ ashachi tok.

²² Mihma Chihowah yʋt Moses a̱ chibbak a̱ ʋba pit ish wielashke, yʋmohmi na, hata̱fo ʋt Echip yakni moma ka̱ itolʋt, hatak, micha nanʋlhpoa, micha haiyu̱kpulo puta osapa a̱sha ka̱ Echi̱p yakni hlopulli ka̱ onʋtoyulashke.

²³ Mihma Moses ʋt in tʋbi a̱ ʋba pit wieli tok; mihma Chihowah yʋt hiloha, micha hata̱fo aiena ka̱ et pila ma, luak ʋt yakni paknaka ya̱ a̱ya tok: micha Chihowah yʋt Echip yakni ya̱ hata̱fo et on umbʋchi tok.

²⁴ Yohmi ho̱ hata̱fo, micha luak ʋt hata̱fo ya̱sh itai okoma hosh ik achukmo fehna, Echip ʋt okla toba tok itin takla yakni moma ka̱ yohmi chatuk keyu ha tok.

²⁵ Mihma hata̱fo ʋt Echip yakni moma ka̱ osapa a̱sha tuk moma, hatak, nanʋlhpoa aiena ka̱ issot kanchi tok; micha hata̱fo ʋt haiyu̱kpulo puta osapa aiasha issot kanchi mʋt, iti puta osapa aiasha ka̱ kobalichit tahli tok.

²⁶ Koshen yakni, Islael im ʋlla ʋhleha hʋt aiasha ak illa ho̱ hata̱fo ʋt iksho tok.

²⁷ Mihma Falaoh hʋt Moses, micha Alon a̱ pit hoyo cha, Himak a̱ sa yoshubʋshke, Chihowah yʋt ai ʋlhpiesakma, ʋno, micha ʋm okla aiena kʋt yoshoba pia hoke.

²⁸ Ʋlhpesa hoke, Chihowah ya̱ ish im asilhhashke, mihma himakma hiloha, micha hata̱fo ʋt iksho kashke; mikma ik iá hʋchim ahni likma, himakma hʋchik asho kashke, im achi tok.

²⁹ Mihma Moses ʋt, Tʋmaha holihta ya̱ kohcha li makinli hosh, Chihowah ya̱ sʋbbak a̱ pit isht im ashatʋpa la chi̱ hoke; mikma hiloha kʋt issa chi̱ hoke, micha himakma hata̱fo ʋt a̱sha chi̱ keyu hoke; Yohmi ma yakni ʋt Chihowah ak o̱ immi ka̱ ish ithaiyana chi̱ hoke.

³⁰ Yohmi kia chishno, micha chin tishu ʋhleha hʋto Chihowah Chitokaka ya̱ hʋsh i̱ nukwia chi̱ keyu moma ka̱ ithana lishke.

³¹ Micha nuchi, micha bali aiena ka̱ issot kanchi tok; bali ʋt nihi tobakma, micha nuchi ʋt yushkobolichi hatuk oka.

³² Yohmi kia onush micha onush issuba ʋpa ano issot ik kancho tok, chahʋt ik taho ki̱sha hatuk oka.

³³ Mihma Moses ʋt Falaoh ha̱ i̱ filʋmmit tʋmaha holihta ya̱ kohcha mʋt, Chihowah ya̱ ibbak isht im ashatʋpa tok; mihma hiloha, micha hata̱fo aiena kʋt issa ma, umba kʋt yakni ya̱ et ik o̱ fohopo tok.

³⁴ Atuk o̱ umba, micha hata̱fo, micha hiloha aiena kʋt issa na, Falaoh hʋt pisa mʋt, himakma yoshuba cha, yʋmma, micha in tishu ʋhleha aiena kʋt chu̱kʋsh a̱ kʋllochi tok.

³⁵ Mihma Chihowah yʋt Moses a̱ tohnot anumpuli tuk mak o̱ Falaoh chu̱kʋsh ʋt kʋllo cha, Islael im ʋlla ʋhleha ha̱ ik iá, ik ahno tok.