Eksotʋs 8 - Chahta Holisso Holitopa 1886

¹ Mihma Chihowah yʋt Moses a̱ im anumpulit, Falaoh ha̱ ish im ona cha, Chihowah yʋt yak achishke, Ʋm okla hʋt ik ia cha, ik sʋm antia, achishke.

² Atuk o̱, ʋlhpesa chik sʋm ahnokma, yakeh, chim aiʋhli moma ka̱ shukʋtti yo̱ ishit fahama la chi̱ hoke.

³ Mihma okhina hʋt shukʋtti a̱ lauachit ikbi na, yʋmmʋt oiyʋt chim aboha, micha ish a nusi aboha iba chukowʋt, chin topa oiyʋt, chin tishu ʋhleha im aboha iba chukowʋt, chim okla ha̱ atuyʋt, micha chim apalʋska micha ta̱ pushi chim ayamʋska puta ka̱ chukowa chi̱ hoke.

⁴ Mihma shukʋtti ʋt chishno, micha chim okla, micha chin tishu moma aiena ka̱ atuya chi̱ hoke, ish im achashke, achi tok.

⁵ Micha Chihowah yʋt Moses a̱ im anumpulit, Alon a̱, Chin tʋbi ya̱ ishit oka yanʋlli puta, okhina puta, micha haiyip puta ka̱ chibbak a̱ ish o̱ wieli cha, shukʋtti ya̱ kohchichit Echip yakni ya̱ ish onochashke, ish im achashka, achi tok.

⁶ Mihma Alon ʋt Echip oka puta ka̱ ibbak a̱ o̱ wieli tok: mihma shukʋtti ʋt kohcha cha, Echip yakni ya̱ ompohomo tok.

⁷ Mihma yushpakʋmmi ʋhleha hʋt i̱ nan isht yushpakʋmmi ya̱ yʋmihchi cha, Echip yakni ya̱ shakʋtti i̱ kohchi tok.

⁸ Yohmi ma, Falaoh hʋt Moses micha Alon a̱ hoyo cha, Chihowah ya̱ ish im asilhha na, shukʋtti ya̱, Ʋno, micha ʋm okla aiena ka̱ i̱ kanʋllichit ishit kanchashke: mikma okla ha̱ ik iá ahni li̱, Chihowah ya̱ ʋbit isht aiokpʋchi ya̱ im issashke, achi tok.

⁹ Mihma Moses ʋt Falaoh ha̱, Is sʋm apesashke; katiohmikma chishno, micha chin tishu ʋhleha, micha chim okla ha̱ isht anumpule li̱, shukʋtti ya̱ chishno, micha chin chuka puta kanʋllichit ishit kanchi na, okhina ak illa ho̱ a̱sha chi̱ cho? im achi tok.

¹⁰ Mihma onnaha yah achi tok, Mihma chim anumpa hatuk mak o̱ yʋmohmashke. Yʋmohmi ho̱ pin Chitokaka Chihowah chohmi kʋt iksho ka̱, ish ithaiyanashke.

¹¹ Mikma shukʋtti ʋt chishno, micha chin chuka puta, micha chin tishu ʋhleha, micha chim okla ʋhleha ha̱ i̱ filʋmmit ia chi̱ hoke, okhina ak illa ho̱ a̱sha chi̱ hoke, achi tok.

¹² Mihma Moses, micha Alon ʋt Falaoh ha̱ i̱ filʋmmit ia tok: mihmʋt Falaoh ya̱ i̱ sanalit shukhʋtti ya̱ kohchi tuk ak o̱, Moses ʋt Chihowah ya̱ i̱ pa̱ya tok.

¹³ Mihma Chihowah yʋt Moses im anumpa ha tuk mak o̱ yʋmihchi tok: mihma shukʋtti ʋt chuka puta, micha chuka alokoli, micha osapa a puta ka̱ ai illit taha tok.

¹⁴ Mihma hoyot itʋnahlit ashachi tok; micha yakni ʋt shua tok.

¹⁵ Yohmi kia ik yʋmohmo ho̱ Falaoh, ʋt pisa mʋt, Chihowah yʋt achi tuk mak o̱, chu̱kʋsh a̱ kʋllochi cha, ik i̱ haponaklo tok.

¹⁶ Mihma Chihowah yʋt Moses a̱, Alon a̱, Chin tʋbi ya̱ ish weli cha, yakni pushi ya̱ ish isso na, Echip yakni hlopulli moma ka̱ issʋp tobashke, ish im achashke, im achi tok.

¹⁷ Mihma yʋmihchit okla tok, Alon ʋt in tʋbi ya̱ eshi cha, ibbak wieli cha, yakni pushi ya̱ isso tok, mihma issʋp toba cha, hatak micha nan ʋlhpoba aiena ka̱ a toba tok: mihma Echip yakni moma ka̱ yakni pushi moma kʋt issʋp toba tok.

¹⁸ Mihma yushpakʋmmi ʋhleha hʋt issʋp kohcha chi̱ hosh im isht yushpakʋmmi ya̱ yʋmihchi tuk osh kohcha he keyu tok; yʋmohmi ho̱ issʋp ʋt hatak, micha nanʋlhpoba aiena ka̱ on aiasha tok.

¹⁹ Mihma yushpakʋmmi ʋhleha hʋt Falaoh ya̱, Ilʋppʋt Chitokaka ibbak ushi yoke, im achi tok: mihma Chihowah yʋt achi tuk mak o̱, Falaoh chu̱kʋsh ʋt kʋllo tuk osh ik i̱ haponaklo tok.

²⁰ Atuk o̱ Chihowah yʋt Moses a̱, Onnahinli fehna mak o̱ tani cha, Falaoh ya̱ itikba ish hikiashke, (yakeh oka aiasha ya̱ minti hoke,) micha, Chihowah yʋt yak achishke, Ʋm okla hʋt ik ia cha, ik sʋm antiá.

²¹ Keyukma ʋm okla ha̱ ik iá ish ahna he keyukma, yakeh, chishno, micha chin tishu ʋhleha, micha chim okla ʋhleha, micha chin chuka anu̱kaka puta ka̱ shu̱shi laua ho̱ chi onochi la chi̱ hoke; yohmikma Echip okla in chuka puta, micha oka aiasha aiena kʋt shu̱shi laua hosh alota chi̱ hoke.

²² Mikma nitak yʋmma ʋm okla aiasha, Koshen yakni ya̱ filʋmmichi likma, shu̱shi laua nana kia yʋmma iksho ka hi oke, yohmi ho̱ yakni ai iklʋnnaka ʋno ak osh Chihowah sia ka̱ ishit ithaiyana chi̱ kak oke.

²³ Micha ʋm okla ha̱ micha chim okla iti̱ filʋmmichi la chi̱ hoke, onnakma nan isht atokowa ilʋppʋt a̱sha chi̱ hoke, ish im achashke, im achi tok.

²⁴ Atuk osh Chihowah yʋt yʋmihchi tok, mihma shu̱shi laua ik achukmo fehna hosh ʋlʋt, Falaoh in chuka, micha in tishu ʋhleha in chuka puta micha Echip yakni moma ka̱ iba chukowa tok: shu̱shi laua pulla kak o̱ yakni ʋt okpulo tok.

²⁵ Mihma Falaoh ʋt Moses, micha Alon a̱ hoyo cha, Oh ia cha, yakni ilʋppak inli ho̱ hʋchin Chitokaka ya̱ ʋbit hʋsh ai okpʋchashke, achi tok.

²⁶ Mihma Moses ʋt, Yʋmohma he ʋlhpesa keyu hoke, Echip okla nan isht a yuwala yo̱ pin Chitokaka Chihowah ya̱ nan ʋbit ishit il aiokpʋcha hinla hokʋt: yakeh, Echip okla itikba ya̱ i̱ nan isht yuwala ya̱ isht il aiokpʋcha hinla cho? Yohmikma tʋli ishit pi bola hinla keyu cho?

²⁷ Yakni haiaka nitak tuchina anowa yo̱ il ona cha, kaniohmichit, pim apesakma, pin Chitokaka Chihowah ya̱ nan ʋbit isht il aiokpʋcha chi̱ hoke, achi tok.

²⁸ Mihma Falaoh hʋt, Ik ia hʋchim ahni li̱, yakni haiaka ya̱ hʋchin Chitokaka Chihowah ya̱ nan ʋbit isht hʋsh aiokpʋchashke, peh hopaki fehna ho̱ hʋchik aiyo kashke: isht is si anumpulashke, achi tok.

²⁹ Mihma Moses ʋt, Yakeh, chi̱ filʋmmit ia lishke, micha shu̱shi laua ʋt onnakma, Falaoh ha̱, micha in tishu ʋhleha, micha im okla ʋhleha ha̱ i̱ filʋmma chi̱ ho̱, Chihowah ya̱ im asilhha la chi̱ hoke. Yohmi kia Falaoh hʋt himakma ik a̱hlot, okla hʋt iʋt Chihowah ya̱ nan ʋbit ik aiokpʋchi, ik ahno tuk ʋt ik yohmo kashke, achi tok.

³⁰ Mihmʋt Moses ʋt Falaoh ya̱ i̱ filʋmmit kohchʋt ia cha, Chihowah ya̱ im asilhha tok.

³¹ Mihma Chihowah yʋt Moses im anumpa hatuk mak o̱ yʋmihchi tok: micha shu̱shi laua yash Falaoh, micha in tishu ʋhleha, micha im okla ʋhleha aiena ka̱ i̱ filʋmmichi tok; achʋfa kia iksho tok.

³² Mihma himak ak kia Falaoh hʋt chu̱kʋsh a̱ kʋllochi cha, okla ik ia, ik ahno tok.