Eksotʋs 6 - Chahta Holisso Holitopa 1886

¹ Yohmi ma Chihowah yʋt Moses a̱, Himak a̱ Falaoh ya̱ nana i̱ kaniohmichi la chi̱ ka̱ ish pisa chi̱ hoke; ibbak kʋllo ho̱ ik iá, ahna chi̱ micha ibbak kʋllo ho̱ isht tihlelit i̱ yakni ya̱ kohcha chi̱ hoke, im achi tok.

² Mihmʋt Chitokaka yʋt Moses a̱ im anumpulit, Chihowah sia hoke.

³ Micha Chitokaka nan isht im aia̱hli ataha iksho hohchifo hosh Eblaham, Aisak, micha Chekob aiena ka̱ i̱ haiaka li tok; amba Chihowah sa hohchifo hokʋno, yʋmmak ash osh sʋthana tok keyu hoke.

⁴ Micha Kenan yakni, yakni aiitʋnowa atok, okla inla yosh aiasha tok a̱ ima la chi̱ hosh, kʋllochit itim apesa li tok.

⁵ Atuk osh Echip okla hʋt Islael im ʋlla ʋhleha ha̱ yukachit ieshi na, kifaha̱ha̱ ka̱ haklo li akinlishke, micha nana itim apesa li ʋt ithaiyana lishke.

⁶ Yʋmohmi hoka Islael im ʋlla ʋhleha ha̱, Chihowah sia hoke, micha Echip okla hʋt naweki hʋchi onochi tuk a̱ a hʋchi kohchi la chi̱ hoke, micha hʋchi yukachi tuk a̱ hʋchi hlakoffichi la chi̱ hoke; micha shakba wieli hosh, micha napalʋmmi chinto onochi hosh hʋchi kohchit isht hʋchi hlakoffichi la chi̱ hoke.

⁷ Micha ʋm okla hʋchia ha chi̱ ho̱ hʋch ishe la chi̱ hoke: micha hʋchin Chitokaka sia ha chi̱ hoke: micha ʋno ak osh Chihowah hʋchin Chitokaka sia hosh Echip i̱ naweki nutaka ya̱ hʋchi kohchi le tuk a̱, hʋsh ithana chi̱ hoke.

⁸ Mikma ya̱kni yʋmma Eblaham, Aisak, micha Chekob a̱ ima la chi̱ hosh, anumpa kʋllo il onochi li tok ʋt, hʋchisht ona la chi̱ hoke; mikma hʋsh aiasha he ʋlhpesa yakni ya̱ chi̱ ho̱, hʋchima la chi̱ hoke; Chihowah sia hoke, im achi tok.

⁹ Mihma Moses ʋt Islael im ʋlla ʋhleha ha̱ yʋmihchit im anumpuli tok; yohmi kia shilombish nukha̱hʋmmit, micha yukʋt ilbʋsha kak osh Moses a̱ i̱ haponaklo tok keyu tok.

¹⁰ Mihma Chihowah yʋt Moses a̱ im anumpulit,

¹¹ Ont chukowa cha, Echip i̱ mi̱ko Falaoh ya̱ im anumpuli na, i̱ yakni ya̱ Islael im ʋlla ʋhleha hʋt kochʋt ik ia ik im ahni, im achi tok.

¹² Mihma Moses ʋt Chihowah itikba im anumpulit, Yakeh. Islael im ʋlla ʋhleha hʋt ik sa̱ haponakloshke; yohmi ka̱ Katiohmi kak o̱ itiʋlbi hakshup ik tapo sia ha̱ Falaoh ʋt a̱ haponakla hinla cho? achi tok.

¹³ Mihma Chihowah yʋt Moses micha Alon a̱ im anumpulit, Islael im ʋlla ʋhleha ha̱ pehlichit Echip yakni a̱ kohcha chi̱ kʋt, Islael im ʋlla ʋhleha, micha Falaoh ya̱ anumpa ima chi̱ ka̱ atokolit i̱ miha tok.

¹⁴ Ilʋppa puta kak osh i̱ki ʋhleha in chuka achʋfa puta ka̱ i̱ noshkoboka yoke, Islael a̱ im ʋttahpi Luben ushi ʋhleha hʋt; Hanok, micha Pallu, Heslon, micha Kami. Ilʋppa puta kak osh Luben in chuka achʋfa ʋhleha hoke.

¹⁵ Mikma Simeon ushi ʋhleha hoke, Chemuel, micha Chamin, micha Ohat, micha Chakin, micha Soha, micha Kenan ohoyo ushi Shaul ak atok. Ilʋppak osh Simeon in chuka achʋfa ʋhleha hoke.

¹⁶ Mikma ilʋppa puta kak osh im ai iti shali ʋlhpi̱sa hosh Lefai ushi ʋhleha hohchifo ha tok: Keshon, micha Kohalh, micha Melali ak atok. Mihma Lefai ʋt okcha̱yʋt ahanta afʋmmi moma kʋt afʋmmi tahlepa achʋfa cha, pokoli tuchina akucha untuklo tok.

¹⁷ Keshon ushi ʋhleha hʋt in chuka achʋfa puta kʋt ʋlhpi̱sa hosh Libni, micha Shimi ak atok.

¹⁸ Mikma Kohalh ushi ʋhleha hʋt; Amlam, micha Isha, micha Heblon, micha Ussiel ak atok. Mihma Kohalh ʋt okcha̱yʋt ahanta afʋmmi moma kʋt, afʋmmi tahlepa achʋfa cha pokoli tuchina akucha tuchina tok.

¹⁹ Mikma Melali ushi ʋhleha hʋt Mahali, micha Mushi ak atok. Ilʋppa puta kak osh im ai iti shali ʋlhpi̱sa kʋt Lefai in chuka ʋhleha hatok.

²⁰ Atuk o̱ Amlam ʋt i̱ki in tek Chokebet a̱ ishit itauwaya tok; atuk o̱ Alon, micha Moses im eshi tok, Mihma Amlam ʋt okcha̱yʋt ahanta afʋmmi moma kʋt afʋmmi tahlepa achʋfa cha pokoli tuchina akucha untuklo tok.

²¹ Mikma Isha ushi ʋhleha hʋt; Kolah, micha Nefek, micha Sikli ak atok.

²² Mikma Ussiel ushi ʋhleha hʋt; Mishael, micha Elsafan, micha Silhli ak atok.

²³ Mihma Alon ʋt Aminnitab ushetik Naashon in tek Elishiba ya̱ ishit itauwaya tok; atuk o̱ Natab, micha Abihu, Eliasa, micha Ihlama im eshi tok.

²⁴ Mihma Kolah ushi ʋhleha hʋt Assi, micha Elkanah, micha Abiesaf ak atok. Ilʋppa puta kak osh Kolait in chuka achʋfa ʋhleha hoke.

²⁵ Atuk o̱ Alon ushi Eliasa ʋt Putiel ushetik ʋhleha achʋfa ha̱ eshi cha itauwaya tok; atuk o̱ Finihas a̱ im eshi tok; ilʋppa puta kak osh Lefait ʋhleha hʋt in chuka achʋfa ʋlhpi̱sa hosh i̱ki ʋhleha i̱ noshkoboka a tok.

²⁶ Apehlichi ʋlhpi̱sa ho̱ Chihowah yʋt Alon, micha Moses a̱ ilʋppak o̱ Islael im ʋlla ʋhleha ha̱ pehlichit Echip yakni ya̱ hʋsh kohchashke, im achi tok mak oke.

²⁷ Ilʋppak osh Islael im ʋlla ʋhleha ha̱ Echip a̱ apehlichit kohcha chi̱ hosh Echip i̱ mi̱ko ya̱ im anumpuli tok mak oke: ilʋppak osh Moses, micha Alon mak oke.

²⁸ Atuk o̱ yakohmi tok, Chihowah yʋt Moses a̱ Echip yakni ya̱ ai im anumpuli nitak ʋt,

²⁹ Chihowah yʋt Moses a̱ im anumpulit, Chihowah sia hoke, Echip i̱ mi̱ko Falaoh ya̱ nana chim achi li tuk a̱ moma ish im anumpulashke, im achi tok.

³⁰ Mihma Moses ʋt Chihowah itikba ya̱, Yakeh, itiʋlbi hakshup ik tapo sia hoke: yohmi ka̱ katiohmi kak o̱ Falaoh ʋt a̱ haponakla hinla cho? achi tok.