Eksotʋs 5 - Chahta Holisso Holitopa 1886

¹ Atuk osh yohmi ha yak osh, Moses, micha Alon ʋt iba chukowʋt, Falaoh ya̱ im anolit, Islael in Chitokaka Chihowah yʋt yak achishke, Ʋm okla hʋt ik ia cha, yakni haiaka ya̱ impʋchi isht ik sʋm aiashah, achishke, achi tok.

² Mihma Falaoh ʋt Chihowah hak osh Kʋta ha tuk o̱ im anumpa ha̱ im antia lish, Islael a̱ ik iah, ahni la hinla cho? Chihowah ya̱ ithana li keyu hoke, micha Islael a̱ ik iah ahni la he keyu hoke, achi tok.

³ Mihma Heblu in Chitokaka yʋt pi afama tuk oke; e chim asilhhʋshke, iʋt nitak tuchina anowa yakni haiaka ya̱ il ona cha, pin Chitokaka Chihowah ya̱ ʋbit aiokpʋchi il im issashke; ililli okpulo micha bʋshpo falaia aiena ishit pi fa̱ha̱ma yoba na: achi tok.

⁴ Mihma Echip i̱ mi̱ko yʋt, Nantihmi ho̱ Moses, micha Alon hʋsh ita tuklo kʋt okla toksʋli ka̱ hʋsh ataklʋmmi cho? hʋsh a toksʋli oh iah, im achi tok.

⁵ Micha Falaoh ʋt, Yakeh, himak a̱ okla yakni aiasha kʋt laua ho̱, toksʋla he tuk a̱ hʋsh fohachishke, achi tok.

⁶ Mihma Falaoh ʋt mih nitak akinli ho̱ okla toksʋli apesʋchi ʋhleha, micha i̱ nanʋlhtoka ʋhleha ha̱ im apesʋt,

⁷ Himakma cha̱shpo chatuk a̱ chohmit, lukfi nuna ikba chi̱ ka̱ okla ha̱ onush ʋpi hʋsh ima he keyu, ilap ak inli hosh iʋt onush ʋpi a̱ ik aiowa cha.

⁸ Micha cha̱shpo ka̱ lukfi nuna holhtina kaniohmi ho̱ ikbi chatuk a̱ hʋsh im apesashke, achʋfa kia hʋsh ola taklʋcha he keyu hoke, peh okla aiasha hoke; Yohmi kak osh pa̱ha̱yʋt, Ki lia cha pin Chitokaka ya̱ ʋbit isht aiokpʋchi il im issashke, achi hoke.

⁹ Hatak ʋt toksʋli hʋt i̱ shahli hosh onʋtolashke, yʋmohmi cha toksʋlashke, micha anumpa ik ahobo ya̱ yohmi, ik ahno kashke, achi tok.

¹⁰ Mihma okla toksʋli ha̱ apesʋchi, micha i̱ nanʋlhtoka aiena kʋt kohchʋt ia mʋt, okla ha̱ im anumpulit, Falaoh ʋt yak achishke, onush ʋpi ya̱ hʋchima la he keyu.

¹¹ Hʋchishno ak osh kohchʋt oh ia cha, kanima moma ka̱ hʋsh ai ahayucha hinlakmʋt hʋsh aiowashke, yohmi kia hʋsh toksʋli kʋt achʋfa kia ola takla he keyu hoke, achi tok.

¹² Yohmi ho̱ okla hʋt Echip yakni moma ka̱ ita fimimpʋt onush ʋpi ya he tuk a̱, nanʋpi ya̱ aiowʋt itʋnowa tok.

¹³ Mihma toksʋli apesʋchi ʋt atu̱shpalechit, onush ʋpi ʋt a̱sha tok a̱ chohmit ish toksʋla he tuk a̱ nitak osh nitakma hʋsh atahlashke, achi tok.

¹⁴ Atuk o̱ Falaoh ya̱ toksʋli im apesʋchi ʋt Islael im ʋlla ʋhleha nanʋlhtoka atokolit i̱ hiohlichi tuk ash osh boa tok, mihmʋt ponaklot, Nantihmi ho̱ cha̱shpo chatuk a̱ chohmit, pilashash lukfi nuna ikbi hʋchim ʋlhpisa tuk ʋt hʋch ik onacho tuk osh himak nitak a̱ yohmi akinli cho? achi tok.

¹⁵ Yohmi ma Islael im ʋlla ʋhleha ha̱ ʋlhtoka yʋt ʋlʋt, Falaoh ya̱ im ilbʋshʋt, Nantihmi ho̱ chin tishu ʋhleha ha̱ ish yakohmichi cho? achi tok.

¹⁶ Chin tishu ʋhleha ha̱ onush ʋpi ik emoshke, mikmʋt, Lukfi nuna oh ikbi, pim achishke, mihma yakeh, chin tishu ʋhleha hʋt boʋshke. Yohmi kia ashʋchi kʋt chim okla hatuk oke, achi tok.

¹⁷ Yohmi kia, Peh hʋsh aiasha hoke, peh hʋsh aiasha hoke, yʋmohmi kak osh, Il ia cha, Chihowah ya̱ ʋbit isht aiokpʋchi ya̱ il i̱ yʋmihchashke, hʋsh achi hoke.

¹⁸ Yʋmohmi hokʋt, Oh ia cha, himak a̱ ho toksʋli, onush ʋpi ya̱ hʋch ema chi̱ keyu; yohmi kia lukfi nuna holhtina hano hʋsh ima chi̱ hoke, achi tok.

¹⁹ Mihma Islael im ʋlla ʋhleha nanʋlhtoka ʋhleha hʋt, Nitak achʋfakma hʋsh atahla he tuk lukfi nuna achʋfa kia, hʋsh ola taklʋcha he keyu, achi ha ya̱ ik achukmo hosh aiasha ka̱ pisa tok.

²⁰ Atuk osh Falaoh ya̱ i̱ filʋmmit kohcha mʋt, Moses, micha Alon ita tuklo kʋt hina takla hinli tuk o̱, afama tok.

²¹ Micha Chihowah yʋt hʋchi pi̱sa cha, hʋchim apesashke; pi̱ balama yash Falaoh itikba, micha in tishu ʋhleha itikba ya̱ hʋsh yuwalʋchi; micha ishit piba chi̱ ka̱ bʋshpo falaia ibbak a̱ hʋsh fohki hoke, im achi tok.

²² Mihma Moses ʋt falamʋt Chihowah ya̱ im ona cha, Chihowah ma, nantihmi ho̱ okla ilʋppa nana ik achukmo ka̱ ish yʋmihchi cho? nantihmi ho̱ et is sa pila tuk oh cho?

²³ Chi hohchifo pulla kak o̱ Falaoh ya̱ im anumpule la chi̱ hosh, ʋla li tuk takla ka̱, okla ilʋppa ik achukmo ho̱ yʋmi̱hinchi hoke; mihma chim okla ha̱ ish hlakofichi keyu kʋmohmishke, achi tok.