Eksotʋs 40 - Chahta Holisso Holitopa 1886

¹ Mihma Chihowah yʋt Moses a̱ im anumpulit,

² Okla moma im aiʋtta ʋlhtipo ya̱ hʋshi ʋmmona, micha nitak ʋmmona ka̱ ish hilechashke.

³ Micha nanʋlhpisa afohka itombi holitopa yʋmmak o̱ ish fohkashke, micha isht ompoholmo ya̱ itombi holitopa yash isht ish ompohomashke.

⁴ Micha aiimpa ya̱ isht ish chukowa cha, nana achukmʋt taloha chi̱ ka̱ achukmalit ish ontalalashke; micha pʋla aio̱hikia ya̱ isht ish chukowa cha, bila aiʋlhto ya̱ ish pʋlalashke.

⁵ Micha tʋli holisso lakna alta nabalama ahukmi ya̱ nanʋlhpisa afohka itombi holitopa itikba ish talalashke, micha ʋlhtipo ya̱ okhissa takali ya̱ ish atakalichashke.

⁶ Micha okla moma im aiʋtta ʋlhtipo okhissa itikba ya̱ ai onochit hukmit im issa alta ya̱ ish hilechashke.

⁷ Micha okla moma im aiʋtta, micha alta iti takla ya̱ ampo chito ya̱ ish talali cha, oka ish ʋnashke.

⁸ Micha apakfoyulit wanuta ya̱ ish talali cha, wanuta holihta okhissa natakali ya̱ ish takalichashke.

⁹ Micha ishtahama bila ya̱ ish eshi cha, ʋlhtipo ya̱ micha anu̱kaka, nana moma aiasha ka̱, micha nan im aiʋlhto aiena moma ka̱ ish ahʋmmi cha, ish hullochashke, mikma hullashke;

¹⁰ Micha aionchit hukmit im issa alta, micha im aiʋlhto moma ka̱ ish ahʋmmashke, micha alta ya̱ ish hullochashke, micha alta hullo kʋt moma i̱ shahlashke.

¹¹ Micha ampo chito, micha iyi aiena ka̱ ish ahʋmmi cha, ish hullochashke.

¹² Mikmʋt Alon, micha ushi ʋhleha aiena ka̱ okla moma im ʋlhtipo okhissa itikba ya̱ isht ish ona cha, oka isht ish achefashke.

¹³ Micha Alon a̱ nafohka holitopa ish fohkʋchechaske; micha ish ahʋmmi cha, ish hullochashke; yʋmohmi ho̱ naholitompa isht aiʋtta ya̱ isht ʋm ai ʋttashke.

¹⁴ Micha ushi ʋhleha ha̱ isht ishla cha, nafohka ish fohkʋchechashke.

¹⁵ Micha i̱ki ya̱ ish ahʋmmi tuk ʋt chohmichit ish ahʋmmashke; yohmikma naholitopa isht aiʋtta ya̱ isht ʋm ai a̱shwashke, ahama kʋt im aiitishali ma̱ha̱ya ka̱ naholitopa isht ʋtta bilia ya chi̱ pulla hoka.

¹⁶ Yʋmmak o̱ Moses ʋt yʋmihchi tok, Chihowah yʋt i̱ miha moma tuk mak o̱ yʋmihchi tok.

¹⁷ Atuk o̱ yakohmi tok, hʋshi ʋmmona afʋmmi atukla, hʋshi ʋt nitak ʋmmona ma, ʋlhtipo ʋt ʋlhtaha tok.

¹⁸ Mihma Moses ʋt ʋlhtipo ya̱ hilechi cha, im ashamohli a̱ ita kʋllochi mʋt, iti bʋsha ya̱ hiohlechi cha, okhowatkʋchi a okfowʋllichi cha toni̱k a hiohlichi tok.

¹⁹ Mihmʋt Chihowah yʋt Moses a̱ i̱ miha tuk mak o̱ ʋlhtipo yash ompoholmo ya̱ auatʋlit ompohomo tok; micha ompoholmo yash, paknaka ya̱ ompohomo tok.

²⁰ Micha nanʋlhpisa ya̱ eshi cha, itombi holitopa ya̱ fohki mʋt, iti tʋptua ya̱ itombi holitopa ya̱ apitta tok; micha itombi holitopa paknaka ya̱ aiombinili i̱ nukha̱klo ya̱ ontalali tok.

²¹ Mihmʋt Chihowah yʋt Moses a̱ i̱ miha tuk mak o̱, itombi holitopa ya̱ ʋlhtipo ya̱ isht chukowa cha, isht ompoholmo ya̱ hilechi cha, nan ʋlhpisa afohka, itombi holitopa ya̱ ompohomo tok.

²² Micha aiimpa ya̱ okla moma im aiʋtta ya̱ anu̱kaka ʋlhtipo ya̱ falʋmmi in tʋnnʋp ompoholmo ya̱ kohcha yo̱ hilechi tok.

²³ Micha Chihowah yʋt Moses a̱ i̱ miha tuk mak o̱, pʋska ya̱ Chihowah itikba ya̱ achukmalit talali tok.

²⁴ Micha pʋla aio̱hikia ya̱ okla moma im aiʋtta anu̱kaka aiimpa ichapaka ʋlhtipo ya̱ im okamahli in tʋnnʋp a hilechi tok;

²⁵ Micha Chihowah yʋt Moses a̱ i̱ miha tuk mak o̱, pʋla ha̱ Chihowah itikba a palali tok.

²⁶ Micha tʋli holisso lakna alta ya̱ okla moma im aiʋtta isht ompoholmo itikba ak o̱ hilechi tok.

²⁷ Micha Chihowah yʋt Moses a̱ i̱ miha tuk mak o̱ nabalama aionochit hukmi tok.

²⁸ Micha ʋlhtipo okhissa takali hilechi tok.

²⁹ Micha Chihowah yʋt Moses a̱ i̱ miha tuk mak o̱, aionochit hukmit im issa alta, okla moma im aiʋtta ʋlhtipo okhissa ya̱ bili̱ka hilechi cha, hukmit im issa, micha ilhpak im issa onochit im issa tok.

³⁰ Micha ampo chito ya̱ okla moma im aiʋtta, micha alta itin takla hilechi cha, ai ibbachefa chi̱ hosh oka ʋni tok.

³¹ Micha Moses, micha Alon, micha ushi ʋhleha aiena ibbak, micha iyi aiena ka̱ yʋmmak aiachefa tok.

³² Chihowah yʋt Moses a̱ i̱ miha tuk mak o̱, okla moma im ai ʋtta chukowakmʋt, micha alta ya̱ bili̱ka onakmʋt, ibbachefa beka tok.

³³ Micha ʋlhtipo, micha alta apakfoyupa ka̱ wanuta ya̱ hilechi mʋt, wanuta okhissa takali ya̱ hilechi tok. Yʋmohmi hosh Moses ʋt natoksʋli a̱ atahli tok.

³⁴ Yohmi ma hoshonti ʋt okla moma im aiʋtta ya̱ ompoholmo ma, Chihowah im aholitopa ʋt ʋlhtipo ya alotoa tok.

³⁵ Mihma okla moma im aiʋtta ya̱ hoshonti ʋt ompoholmo hatuk o̱, micha Chihowah im aholitopa ʋt ʋlhtipo a̱ alotoa hatuk o̱ Moses ʋt chukowa he keyu tok.

³⁶ Atuk o ʋlhtipo paknaka ya̱ hoshonti hash ai ishit ʋba ishtia ma, Islael im ʋlla ʋhleha hʋt anowʋt a̱ya moma ka̱ ma̱ha̱ya tok.

³⁷ Amba hoshonti ha̱ ʋba isht ik aiyokma, ik aiyo tuk osh, nitak nana ka̱ ʋba ishtiak mak o̱ beka tok.

³⁸ Islael in chukachʋfa moma kʋt nowʋt a̱yʋt ont hlopulli moma ka̱ pi̱sa ho̱ Chihowah i̱ hoshonti hʋt nitak ma, ʋlhtipo ya̱ onʋtoyula tuk osh, ninak ma, luak osh onʋtoyula beka tok oke.