Eksotʋs 4 - Chahta Holisso Holitopa 1886

¹ Mihma Moses ʋt afalʋmminchit, Yohmi kia yaki, a̱ yimma he keyu, micha ʋm anumpa ha̱ hakla he keyu hoke; Chihowah yʋt chi̱ haiaka tuk keyu, acha chi̱ hoke, achi tok.

² Mihma Chihowah yʋt, Yʋmmʋt nanta hosh chibbak a̱ fo̱ka cho? im achi ma, Tʋbi yoke, im achi tok.

³ Mihma, Aka pilah, achi tok; mihma aka pila ma, sinti o̱ toba tok; mihma Moses ʋt i̱ filʋmmit maleli tok.

⁴ Mihma Chihowah yʋt Moses a̱, Chibbak a̱ pit weli cha hasimbish a̱ ishih, im achi tok. Mihma ibbak a̱ weli cha, hokli ma, tʋbi toba cha, ibbak fo̱ka tok.

⁵ Yʋmohmi ho̱ i̱ki ʋhleha in Chitokaka Chihowah, Eblaham in Chitokaka, Aisak in Chitokaka, micha Chekob in Chitokaka ʋt chi̱ haiaka tuk a̱ yimmashke, achi tok.

⁶ Micha Chihowah yʋt achakalinchit, Himak a̱ chibbak a̱ chikkishi pit fohkih, im achi tok. Mihma ibbak a̱ ikkishi pit fohki tok; atuk osh kohchi ma, yakeh, ibbak ʋt leplosi ʋbit okti chiyuhmi tok.

⁷ Mihma, Anonti chibbak a̱ chikkishi pit fohki, achi tok mihma ibbak a̱ anonti ikkishi pit fohki tok; atuk osh ikkishi ha̱ kohchi ma, yakeh, falamʋt haknip inla ya̱ chohmi tok.

⁸ Atukma yakohma hi oke, chi yimma he keyu, micha nanisht‐atokowa ʋmmona ka̱ hakla he keyu tukmʋt, nanisht‐atokowa ishtaiopi yokʋno yimma hi oke.

⁹ Atukma yakohma hi oke, nanishtatokowa tuklo ilʋppa ik yimmo micha chim anumpa ha̱ hakla he keyukma, okhina oka ya̱ ish ishi cha, yakni shila ya̱ ish onhlatʋblashke, mihma okhina oka ish ai ishi kash osh issish tobʋt, yakni shila yash o̱ aiasha hi oke, im achi tok.

¹⁰ Mihma Moses ʋt Chihowah ya̱, A̱ shahli ma, Anumpuli imponna sia keyu, cha̱shpo ka̱ si yʋmohmi chatuk osh, is sʋm anumpuli taiyakla kia, si yʋmohmi keyushke; amba anumpa sʋlaha, micha isunlʋsh sʋlaha sia hoke, im achi tok.

¹¹ Mihma Chihowah yʋt, Kʋta hosh hatak itʋkha ikbi tok oh cho? micha kʋta hak osh ik anumpulo, micha ik haponaklo, micha pisa, micha ik hopo̱koyo ikbi hoh cho? Chihowah sia hoh keyu cho?

¹² Yʋmohmi hoka inta, iah, mikma chitih ha̱ iba foyuka lish, nana ish acha chi̱ ka̱ chim abʋche lashke, im achi tok.

¹³ Mihma Moses ʋt, A̱ shahli ma, chim asilhha lishke, kʋna ho̱ ish ahnikmʋt ish tohnashke, achi tok.

¹⁴ Mihma Chihowah im ai i̱ nukkilli ʋt Moses a̱ i̱ sanalit libbi mʋt, Lefait Alon ʋt chitibapishi keyu cho? anumpuli imponna hinla ka̱ ithana li hoke: micha yakeh, chi afamʋt minti ak inli hoke. Atuk osh chi pesakmʋt, chu̱kʋsh yukpa chi̱ hak inli hoke.

¹⁵ Mikma ish im anumpuli cha, itih ha̱ anumpa ish fohka chi̱ hoke: mikma Ʋno ʋt chitih ha̱, micha yʋmma itih ha̱ iba foyuka la chi̱ hoke; micha nana ish a kaniohma chi̱ ka̱ hʋchim abʋchi la hi oke.

¹⁶ Micha okla im anumpula chi̱ hosh, chim anumpa eshi ya chi̱ hoke, micha yʋmmak osh, yʋmma fehna kak osh itih ha he tuk, chim ʋthtobakma, Chitokaka yak a he tuk a̱ chishno ak achi̱ hoke.

¹⁷ Micha tʋbi ilʋppa ish ieshi tuk osh, nan isht atokowa ya̱ isht ish yʋmihchashke, achi tok.

¹⁸ Mihma Moses ʋt falamʋt ipochi Chehlo ya̱ im ona cha, Chim asilhha lishke, falamʋt ak ia cha, itibapishi li ʋhleha Echip aiasha ka̱ ak im ona cha, okcha̱ya momakma, ont ak pesa, im achi tok, Mihma Chehlo ʋt Moses a̱ Achukma̱kʋt ish a̱yashke, im achi tok.

¹⁹ Mihma Chihowah yʋt Moses a̱ Mitian a̱, Iʋt falamʋt Echip a̱ ish onashke, ilhfiopak chim ishi bʋnna tok hatak moma kʋt illit taha hoke, ai im achi tok.

²⁰ Mihma Moses ʋt tekchi, micha ushi ʋhleha aiena ka̱ ishit, issuba nashoba om binilichit pehliechi cha, falamʋt Echip yakni ya̱ ona tok. Micha Moses ʋt Chitokaka in tʋbi ya̱ ishit ibbak fohki tok.

²¹ Mihma Chihowah yʋt Moses a̱, Falamʋt iʋt Echip a̱ ish onakmʋt, yohmi ish ahni cha, nafehna moma chibbak fohki le tuk a̱, Falaoh itikba ish a yʋmihchashke, yohmi kia chu̱kʋsh a̱ kʋllochi likma, okla ha̱ ik iah, ik ahno ka chi̱ hoke.

²² Micha Falaoh ya̱ Chihowah yʋt yak achishke, Islael ʋt sʋso hoke, ʋm ʋttahpi fehna yoke.

²³ Atuk o̱ sʋso hʋt ik iah, yʋmohmi cha ʋm antiashke, chim achi lishke, atuk o̱ ik iah chik ahnokma, yakeh, chiso ha̱ chim ʋttahpi fehna ka̱ ʋbe la chi̱ hoke, achishke, ish im achashke, im achi tok.

²⁴ Atuk o̱ yakohmi tok, hina takla chuka afoha ona ma, Chihowah yʋt afama cha, ʋbi bʋnna tok.

²⁵ Yohmi ma Sippola hʋt tʋli halupa eshi cha, ushi yash tikba hakshup a̱ in tʋbli tok; micha iyi imma pit pila mʋt, Issish im ʋlhpesa a̱ hatak chia ho mʋhlishke, achi tok.

²⁶ Yohmi ho̱ ik iah ahni tok: yohmi ma, Hakshup tʋpa pulla kak o̱ issish im ai ʋlhpesa a̱ hatak chia hoke, achi tok.

²⁷ Mihma Chihowah yʋt Alon a̱, Yakni haiaka ya̱ Moses afamʋt iah, im achi tok. Mihma ia tuk osh, Chitokaka i̱ nʋnih chaha ya̱ ont ai afama cha, i̱ su̱ksowa tok.

²⁸ Mihma Moses ʋt Alon a̱ Chihowah yʋmmak osh et pila tuk a̱ im anumpa moma, micha nan isht atokowa moma im apesa tuk a̱, im anoli tok.

²⁹ Mihma Moses, micha Alon ʋt ia cha, Islael im asʋnochi moma ka̱ hoyot itʋnahli tok.

³⁰ Mihma anumpa moma Chihowah yʋt Moses a̱ im anumpuli tuk a̱ Alon ʋt anumpuli cha, okla itikba ya̱ nanishtatokowa ya̱ a yʋmihchi tok.

³¹ Mihma okla hʋt yimmi tok; micha Chihowah yʋt Islael im ʋlla ʋhleha ha̱ im a̱ya tuk, micha ilbʋsha ka̱ pisa tuk a̱ haklo mʋt, noshkobo ha̱ akachunoli cha, okla aiokpʋchi tok.