Eksotʋs 39 - Chahta Holisso Holitopa 1886

¹ Micha aholitopa atoksʋla chi̱ ka̱ nafohka fohkʋt toksʋli, okchamali hummaii, micha tishepa ya̱ isht ikbi tok; micha Chihowah yʋt Moses a̱ i̱ miha tuk mak o̱, Alon a̱ nafohka holitopa ya im ikbi tok.

² Micha efot ʋt okchamali, micha hummaii, micha tishepa, micha pʋnnʋt tʋnna linen osh tʋli holisso lakna ishta toba yo̱ ikbi tok.

³ Micha tʋli holisso lakna ya lʋllit tapʋshichi cha, chuhli mʋt, okchamali, micha hummaii, micha tishepa, micha pʋnʋt tʋnna linen ash toksʋli imponna hosh isht shemʋchechit shemʋchit tahli tok.

⁴ Isht itachaka chi̱ ka tahchi abana ikbi cha, takchaka tuklo ka̱k o̱ isht itachaka tok.

⁵ Mikma efot inla im ʋskofʋchi ʋt atakanli tuk ʋt yʋmmʋt aiʋlhtaha tuk akinli ho̱ chohmi tok; Chihowah yʋt Moses a̱ i̱ miha tuk mak o̱ tʋli holisso lakna isht ʋlhtahʋt, okchamali, micha hummaii, micha tishepa, pʋnʋt tʋnna linen atok.

⁶ Micha oniks tʋli ikbi mʋt in chu̱wa yʋt chu̱wa chatuk holbʋchi hosh chunlit, Islael im ʋlla ʋhleha hohchifo lapohli ho̱ afohka yʋt tʋli holisso lakna yo̱ ontalohli tok.

⁷ Micha Chihowah yʋt Moses a̱ i̱ miha tuk mak o̱, Islael im ʋlla ʋhleha hʋt tʋli ishit ithaiyana chi̱ ho̱ efot in tahchʋbana ya̱ on talali tok.

⁸ Micha efot ʋlhtaha ka̱ chohmi hosh toksʋli imponna yosh ikbi yo̱ ikkishi alata ikbi tok; tʋli holisso lakna ʋlhtaha hosh, okchamali, micha hummaii, micha tishepa, micha pʋnʋt tʋnna linen o̱ ikbi tok.

⁹ Iti laui bano fullota hatuk; ikkishi alata ʋt pohloma ha̱ ikbi tok; pohloma hosh falaia kʋt span achʋfakma, auata kʋt span achʋfa tok.

¹⁰ Mihmʋt tʋli iti akaiya ushta ho̱ on talohli tok; iti akaiya ʋmmona kʋt satiʋs, topas, micha kabʋnkel atok; ilʋppak osh iti akaiya ʋmmona hatok.

¹¹ Mikma iti akaiya atukla kʋt emilal, safai, micha taiamont ak atok.

¹² Mikma iti akaiya atuchina kʋt liku, akat, micha amahlist ak atok.

¹³ Mikma iti akaiya ont ai ushta kʋt belil, oniks, micha chaspa atok, ai on taloha on talohʋt tʋli holisso lakna yo̱ on talohli tok.

¹⁴ Micha tʋli ʋt Islael im ʋlla ʋhleha ha̱ ʋlhpi̱sa hosh auahtuklo hohchifo ho̱ ʋlhpi̱sa tok, in chu̱wa ya̱ holbʋt chu̱wa hosh hohchifo aiyukali lapalit apehlichi auahtuklo tuk a̱ ʋlhpi̱sa tok.

¹⁵ Micha tʋli holisso lakna bano ho̱ itapanʋt ishit toba ho̱ ikkishi alata takchaka ya̱ itatakʋli takohlichi tok.

¹⁶ Mihmʋt aiontaloha tuklo ka̱ tʋli holisso lakna yo̱ ikbi mʋt, tʋli holisso lakna chʋnaha tuklo ho̱ ikbi cha, ikkishi alata takchaka tuklo ka̱ chʋnaha tuklo ya̱ takohlichi tok.

¹⁷ Mihmʋt tʋli holisso lakna itatakʋli itapʋnʋt itatakʋli yash ikkishi alata takchaka ya̱ chʋnaha tuklo kash apitta tok.

¹⁸ Micha itapʋnʋt itatakʋli tuklo kash wishakchi ya̱ aiontaloha tuklo kash atakchichi mʋt, efot itikba tahchibana ya̱ ontakohlichi tok.

¹⁹ Micha tʋli holisso lakna chʋnaha tuklo ho̱ ikbi cha, ikkishi alata takchaka tuklo ʋhli efot anu̱kaka pilla et apota ha̱ takohlichi tok,

²⁰ Micha tʋli holisso lakna chʋnaha inla tuklo ka̱ ikbi cha, efot ʋhli tuklo nutaka tikba pilla ai ita talakchi ka̱ ichapaka, efot isht talakchi ʋskofʋchi inla paknaka yak o̱ takalichi tok.

²¹ Micha Chihowah yʋt Moses a̱ im achi tuk mak o̱, ikkishi alata yash in chʋnaha yak o̱, efot in chʋnaha ya̱ sita okchamali ya̱ pit isht atakchichi tok; yʋmohmi ho̱ efot isht talakchi ʋskofʋchi pisa inla ya̱ paknaka yokma, ikkishi alata yʋt efot a̱ ik i̱ makofo ka chi̱ hatuk.

²² Micha tʋnnʋt toba yosh okchamali bieka ho̱ efot nafohka falaia ya̱ ikbi tok.

²³ Mihma nafohka falaia iklʋnna ya̱ tʋnnʋp nafohka chiluk o̱ chohmi hosh chiluk ʋt hikiakma, chiluk a̱ i̱ fullotʋt taiyaha kʋt ik hlilafo ka chi̱ hatok,

²⁴ Micha nafohka falaia wishakchi ya̱ pamkilanit okchamali, hummaii, micha tishepa itapanʋt tʋnna linen aiena ho̱ ai ikbi tok.

²⁵ Micha tʋli holisso lakna bano ho̱ tʋlula yo̱ ikbi cha, nafoka falaia wishakchi ya̱ pamkilanit ʋt takohli itin takla tʋlula ya̱ takohlichi mʋt, pamkilanit itin taklʋt apakfoyupa ka̱ takohlichi tok.

²⁶ Chihowah yʋt Moses a̱ i̱ miha tuk mak o̱, fohkʋt nan isht ʋtta ya chi̱ ho̱ nafohka falaia wishakchi ya̱ tʋlula, mikmʋt pamkilanit tʋlula mikmʋt pamkilanit takohlit apakfoyupa tok.

²⁷ Micha tʋnnʋt toba yo̱ linen tapʋski nafohka ya̱ Alon micha ushi ʋhleha ha̱,

²⁸ Micha linen tapʋski iahlipa, micha linen tapʋski noshkobo ishit shema, aiokli, micha pʋnʋt tʋnna linen linen obalafohka,

²⁹ Micha pʋnʋt tʋnna linen tapʋski ʋskofʋchi, micha okchamali, micha hummaii, micha tishepa chofak ushi isht ʋlhtaha ho̱ Chihowah yʋt Moses a̱ i̱ miha tuk mak o̱ ikbi tok.

³⁰ Micha tʋli holisso lakna bano patʋssa holitopa bita ho̱ ikbi cha in chu̱wa holbʋt chu̱wa ho̱, aio̱ holissochit Chihowah I holitopa, achi ho̱ lapalichi tok.

³¹ Micha Chihowah yʋt Moses a̱ i̱ miha tuk mak o̱, sita okchamali ishit takchi cha, chahʋchit iahlipa ha̱ atakchichi tok.

³² Yakohmi hosh okla moma im ai ʋtta ʋlhtipo natoksʋli moma kʋt ʋlhtaha tok; mihma Islael im ʋlla ʋhleha hʋt yʋmihchit, Chihowah yʋt Moses a̱ i̱ miha tuk mak o̱ moma ka̱ okla yʋmihchi tok.

³³ Micha ʋlhtipo ai ʋtta, micha i̱ nachukushpa moma, im isht a kamʋssa, im iti bʋsha, im okhowata, micha in toni̱k, micha im ashʋmohli,

³⁴ Micha isht ompoholmo chukfi nakni hakshup humma, micha isht ompoholmo bacha hakshup, micha ʋlhtipot ompoholmo,

³⁵ Nanʋlhpisa afohka itombi, micha im iti tʋptua, micha aiombinilit i̱ nukha̱klo,

³⁶ Aiimpa, micha nan im aiʋlhto moma, micha pʋska otʋni,

³⁷ Mih bano pʋla aio̱hikia bila ai im aiʋlhto, bila aiʋlhto iti akaiyʋt hiohla chi̱ fehna ka̱, micha im aiʋlhto moma, micha pʋla lua chi̱ ka̱ bila,

³⁸ Micha tʋli holisso lakna alta, micha bila ishtahama, micha nabalama micha ʋlhtipo okhissa ya̱ takali,

³⁹ Asonak lakna alta, micha asonak lakna tʋnna, im iti tʋptua, micha nan im aiʋlhto moma, ampo chito, micha iyi,

⁴⁰ Wanuta atakali, in toni̱k, micha im ashamohli, micha wanuta holihta okhissa atakali im asita, micha im ishtafacha, micha okla moma im aiʋtta ʋlhtipo atoksʋli nan aiʋlhto moma,

⁴¹ Aholitopa ya̱ nan isht aiʋtta chi̱kmʋt fohkʋt nan isht ʋtta, micha naholitopa isht aiʋtta ya̱ isht ʋtta chi̱kmʋt fohka he ya̱ naholitompa isht ʋtta Alon i̱ nafohka holitopa, micha ushi ʋhleha i̱ nafohka,

⁴² Chihowah yʋt Moses a̱ i̱ miha tuk moma mak o̱, yʋmohmit Islael im ʋlla ʋhleha hʋt natoksʋli moma ka̱ yʋmihchi tok,

⁴³ Mihma Moses ʋt natoksʋli moma ka̱ pisa tok; mihma yakeh, Chihowah yʋt miha tuk mak o̱ okla yʋmihchi tuk atok, mihma Moses ʋt yukpali anumpa onochi tok.