Eksotʋs 38 - Chahta Holisso Holitopa 1886

¹ Micha shittim iti yo̱ aionochit hukmit im issa alta ya̱ ikbi tok, falaia kʋt kubit tahlapi mʋt, auata kʋt kubit tahiapi hatok, okhowataha ushta ha tok, micha chaha kʋt hubit tuchina tok.

² Micha chukbi ushta ka̱ in lapish a̱ ikbi tok, lapish ʋt ai achʋfa hatok, micha tʋli asonak lakna yo̱ lapalichi tok.

³ Micha alta ya̱ nan im aiʋlhto moma, shuti, micha tobaksi isht piha, micha ampmahaia, micha nipi ishit yichiffi, micha luak aiʋlhto ampo aiena ka̱ ikbi tok, nan aiʋlhto moma ka̱ asonak lakna yo̱ ikbi tok.

⁴ Micha alta ya̱ asonak lakna tʋnna yosh ai apakfoyupa nutaka ya̱ bili̱ka ʋttʋt ia hosh iklʋnna ka̱ ona ikbi tok.

⁵ Micha asonak lakna tʋnna aiʋhli ushta ka̱ iti tʋpa ai ʋlbeha chi̱ ka̱ asonak lakna chʋnaha ushta ho̱ bilelit im ikbi tok.

⁶ Micha iti tʋpa ya̱ shittim iti yo̱ ikbi cha, asonak lakna yo̱ lapalichi tok.

⁷ Micha ʋba takalicha chi̱ ka̱ alta okfowataka bili̱ka yo̱ bohlit chʋnaha yash pit apitta tok, alta yʋt chiluk a̱sha yosh iti bʋsha yo̱ isht ikbi tok.

⁸ Micha nan ai ʋlhto chito asonak lakna yo̱, micha iyi ʋt asonak lakna yosh ohoyo itʋnaha hʋt okla moma im ʋlhtipo okhissa ya̱ ai itʋnaha chatuk ʋt apisa yo̱ isht ikbi tok.

⁹ Micha wanuta ya̱ ikbi tok; okamahli in tʋnnʋp okamahli pilla ho̱ wanuta ya̱ in takohli ʋt pʋnʋt tʋnna linen tapʋski yosh kubit tahlepa achʋfa tok.

¹⁰ In toni̱k ʋt pokoli tuklo cha, ashamohli asonak lakna yʋt pokoli tuklo tok; toni̱k im atakali ʋt micha im isht ita halʋlli ʋt tʋli hʋta atok.

¹¹ Micha falʋmmi in tʋnnʋp a̱ takali ʋt kubit tahlepa achʋfa ma, in toni̱k ʋt pokoli tuklo cha̱, im a shamohli asonak lakna ʋt pokoli tuklo tok; toni̱k im atakali, micha im isht ita halʋlli ʋt tʋli hʋta atok.

¹² Micha hʋshi aiokatula in tʋnnʋp a̱ takali ʋt pokoli tahlapi ma, in toni̱k ʋt pokoli cha, im ashamohli ʋt pokoli tok; toni̱k im atakali, micha im isht ita halʋlli ʋt tʋli hʋta atok.

¹³ Micha hʋshi akohchaka in tʋnnʋp, hʋshi akohcha pilla ho̱ kubit pokoli tahlapi tok.

¹⁴ Holihta okhissa in tʋnnʋp achʋfa ka̱ ʋba takali ʋt kubit auahtahlapi tok; in toni̱k ʋt tuchina cha, im ashamohli ʋt tuchina tok.

¹⁵ Micha wanuta okhissa in tʋnnʋp achʋfa ilʋppa in tʋnnʋp, micha yʋmma in tʋnnʋp, atakali ʋt kubit auahtahlapi tok, in toni̱k ʋt tuchina cha, im ashamohli ʋt tuchina tok.

¹⁶ Wanuta apakfoyupa fullota takali moma kʋt pʋnʋt tʋnna linen tapʋski atok.

¹⁷ Mihma toni̱k im ashamohli puta kʋt asonak lakna atok; toni̱k im atakali, micha im isht ita halʋlli ʋt tʋli hʋta atok; micha i̱ noshkobo lapali kʋt tʋli hʋta atok, wanuta toni̱k moma kʋt tʋli hʋta yosh isht itahʋllit taha tok.

¹⁸ Micha wanuta holihta okhissa takali ʋt chufak ushi isht ʋlhtaha hosh, okchamali, micha hummaii, micha tishepa yosh pʋnʋt tʋnna linen tapʋski atok; micha falaia kʋt kubit pokoli tuklo cha, auata yʋmma chaha kʋt kubit tahlapi wanuta takali ya̱ chohmi tok.

¹⁹ Micha in toni̱k ʋt ushta, micha im ashamohli ʋt asonak lakna yosh ushta tok; im atakali ʋt tʋli hʋta, micha i̱ noshkobo puta lapali, micha im isht ita halʋlli puta kʋt tʋli hʋta atok.

²⁰ Micha ʋlhtipo ya̱, micha wanuta apakfoyupa ka̱ isht ahonʋhla moma kʋt asonak lakna atok.

²¹ Na holitompa isht ʋtta Alon ushi Ihlama ʋt pehlichi ho̱, Lefai ʋhleha hʋt nan isht aiasha chi̱ ho̱, Moses ʋt apesa tuk mak o̱, isht atokowa ʋlhtipo pulla holhtina tuk ʋt ʋlhtipo moma ka̱ ilʋppak oke.

²² Mihma Chihowah yʋt Moses a̱ im apesa tuk mak o̱, Chutah apehlichi aiachʋfa Hu ushi, Uli ya̱ ushi Besaleel ʋt moma ka̱ ikbi tok.

²³ Micha Ahisimak ushi Aholiab Tan apehlichi aiachʋfa nan in chunli, micha natoksʋli imponna, micha i̱ fullota okchamali, micha hummaii micha tishepa, pʋnnʋt tʋnna linen tapʋski isht ʋtta ʋlhtaha yosh iba fo̱ka tok.

²⁴ Micha aholitopa natoksʋli moma isht ʋlhtaha tuk, tʋli holisso lakna moma kʋt im issa, tʋli holisso lakna fehna kʋt talent pokoli tuklo akucha chakali cha, shekel tahlepa untuklo cha, pokoli tuchina kʋt ʋlhtipo aholitopa shekel a̱ ʋlhpisa hatok.

²⁵ Micha tʋli hʋta ya̱ okla moma im aiishit holhtina tuk a̱ talent tahlepa achʋfa cha, shekel tahlepa sipokni achʋfa cha tahlepa untuklo, pokoli untuklo akucha tahlapi kʋt ʋlhtipo aholitopa shekel a̱ ʋlhpisa hatok.

²⁶ Hatak moma kʋt afʋmmi pokoli tuklo ʋhlit ʋba ma̱ya hosh holhtina ia chatuk ʋt hatak tahlepa sipokni tahlepa hannali, micha tahlepa sipokni tuchina, tahlepa tahlapi cha, pokoli tahlapi kʋt bekah achʋfa, yʋmmʋt shekel iklʋna hosh ʋlhtipo aholitopa shekel a̱ ʋlhpisa hatok.

²⁷ Micha tʋli hʋta talent tahlepa achʋfa tuk ak o̱ bilelit akmochit, ʋlhtipo aholitopa im ashamohli, micha isht ompoholmo im ashamohli aiena ka̱ ikbi tok, talent tahlepa achʋfa tuk a̱ ashamohli tahlepa achʋfa tuk, talent achʋfa tuk a̱ ashamohli achʋfʋt ia tok.

²⁸ Micha shekel tahlepa sipokni achʋfa tahlepa untuklo cha, pokoli untuklo akuhcha tahlapi tuk a̱, toni̱k im atakali a̱ ikbi mʋt, i̱ noshkobo ya̱ lapalichi cha, ita takchichi tok.

²⁹ Mikma asonak lakna im issa ʋt, talent pokoli untuklo, micha shekel tahlepa sipokni tuklo cha tahlepa ushta tok.

³⁰ Micha yʋmmak o̱ okla moma im ʋlhtipo okhissa afohka isht ikbi mʋt, asonak lakna alta, micha asonak lakna tʋnna, micha alta nan im aiʋlhto moma ka̱,

³¹ Micha wanuta apakfoyupa ka̱ im ashamohli, micha wanuta holihta okhissa im ashamohli, micha ʋlhtipo im isht afacha moma micha wanuta apakfoyupa ka̱ isht honʋhla moma ka̱ isht ikbi tok.