Eksotʋs 34 - Chahta Holisso Holitopa 1886

¹ Mihma Chihowah yʋt Moses a̱, Tʋli patʋssa tuklo ʋmmona tuk a̱ chohmi ho̱ ish tʋhlashke, mikma tʋli patʋssa yʋmmak o̱ tʋli patʋssa ʋmmona ish koli kash anumpa atakali tuk a̱ ai o̱ holissochi lashke.

² Mikma onnahinlikma chim ʋlhtaha mʋt, onnahinlikma Sinai nʋnih ha ish oiya cha, nʋnih paknaka ya̱ sa tikba ya̱ is sʋm ʋlashke.

³ Mikma hatak nana kia chi awant oiya he keyu; micha nʋnih afullota moma hatak nana kia hikia na, ik peso kashke; mikma nan ʋlhpoa chipunta, micha nan ʋlhpoa hochito aiena kʋt nʋnih yʋmma itikba ya̱ ik ai impo kashke, achi tok.

⁴ Mihma tʋli patʋssa tuklo ʋmmona tuk a̱ chohmi ho̱ tʋhli tok, micha Moses ʋt onnahinli fehna moma ho̱, wakaya cha Chihowah yʋt i̱ miha tuk mak o̱, tʋli patʋssa tuklo kak osh ibbak fo̱ka hosh Sinai nʋnih ha̱ oiya tok.

⁵ Mihma Chihowah yʋt hoshonti afoyuka cha, akowa mʋt, yʋmmak o̱ ta̱kla hikia cha, Chihowah hohchifo ha̱ anohonli tok.

⁶ Micha Chihowah yʋt itikba ont ia cha, chitolit, Chihowah, Chitokaka Chihowah nan i̱ nukha̱klo, i̱ kana, i̱ sʋlaha, micha ai achukma, micha aia̱hli aiena kʋt in la̱wah.

⁷ Tahlepa sipokni hoh kia i̱ nukha̱klot bilia, ik ʋlhpieso, micha anumpa kobʋffi, micha aiashʋchi aiena ka̱ i̱ kashofi, micha anumpa hʋt onʋtola he ʋlhpesa ya̱ hlakoficha he keyu, i̱ki puta ik ai ʋlhpeso atuk mak o̱ im ʋlla ʋhleha puta ka̱, micha ʋlla ʋhleha hash im ʋlla ʋhleha ai iti shali ont atuchina, micha ont ai ushta kia im a̱ya yoke, achi tok.

⁸ Mihma Moses ʋt tu̱shpʋt noshkobo ha̱ aka pit isht akachunoli cha aiokpʋchi tok.

⁹ Micha Chihowah ma, himak a̱ chim isht i̱kana ahayuchi li hokma, chim asilhha lishke, an Chihowah ʋt pi awant iashke (okla ikunla kʋllo ʋhleha hoka), ik pi ai ʋlhpieso, micha il aiashʋchi ya̱ ish pi̱ kashofashke, micha chimmi ikbit ish pi eshashke, achi tok.

¹⁰ Mihma, Yakeh anumpa a̱hli ikbi lishke, chim okla moma itikba ya̱ na fehna yʋmma chohmi kʋt yakni moma ka, micha oklushi nana kia, a yʋmohmi chatuk keyu ho̱ yʋmihchi la chi̱ hoke; mikma okla takla ish ahanta tuk ʋt moma kʋt Chihowah na yʋmihchi ka̱ pisa chi̱ hoke, na hʋchi yʋmihchi li ka̱ ishit nukhlakancha ya chi̱ hoke.

¹¹ Himak nitak a̱ chim apesa li ka̱ ish ithaiyanashke. Yakeh, Amolait, micha Kananait, micha Hittait, micha Pilissait, micha Hifait, micha Chibusait aiena ka̱ hʋchi tikba tihlelit kohcha wehli lishke.

¹² Ahah ish ahni cha, yʋmma ish ia kʋt yakni ya̱ okla ai asha ka̱ anumpa chik itim apesokashke; ishit yoshoba yosh hʋchitin takla ya̱ aiasha yoba na.

¹³ Amba im alta puta, i̱ naholbʋt toba puta ka̱ ish okpʋni cha, im iti lokoli puta ka̱ chanlit ish akʋchashke,

¹⁴ Naholbʋt toba chitokaka inla ka̱ ish aiokpʋcha he keyu hoka, Chihowah yʋmma hohchifo kʋt Nuktanhla ya tuk osh, Chihowah nuktanhla yoke.

¹⁵ Yakni ya̱ okla aiasha ka̱ nan ish itim apesa na, hauit i̱ na holbʋt toba ya̱ iakaiya cha, i̱ naholba ya̱ nan ʋbit isht aiokpʋchi, atuk o̱ chim anoli na, ʋbit isht aiokpʋchi a̱ ishpa yoba nah.

¹⁶ Micha chiso ʋhleha ha̱ ushetik ʋhleha ha̱ ishit ish ima na, ushetik ʋhleha hash osh hauit i̱ naholbʋt toba ya̱ iakaiya cha̱, chiso ʋhleha ha̱ hauit i̱ naholbʋt toba iakaiyʋchi yoba na.

¹⁷ Bilʋt akmot naholbʋt toba ya̱ chik ikbo kashke.

¹⁸ Pʋska ik shatʋmmo impʋchi ya̱ ish holitoblashke. Hʋshi Abib nitak o̱ chim achi li tuk mak o̱, nitak untuklo ho̱ pʋska ik shatʋmmo ish pashke; Abib hʋshi o̱ Echip a̱ ish kohcha tok okʋt.

¹⁹ Im oshʋtto tiwi moma kʋt ʋmmi hoke; micha chi̱ nanʋlhpoa moma tikba ʋtta kʋt wak okma, chukfi hokma nana kia, nakni okmʋt ʋmmi hoke,

²⁰ Amba issuba nashoba ʋtta ahpi ano falʋmmichit chukfushi isht ish chumpashke; micha falʋmmichit ish chumpa he keyukmʋt, ikunla ya ish kotʋffashke; micha chiso ʋlheha ʋtta ahpi moma ka̱ falʋmmichit ish chumpashke; mikma achʋfa kia ibbak bieka hosh sa tikba ya̱ iklo kashke.

²¹ Nitak hannali ho̱ ish toksʋlashke, amba nitak isht untuklo kano ish fohashke; yakni patʋffi nitak, micha nawaya nitak a̱ ish fohashke.

²² Micha onush ʋmo waya ʋmmona wek puta impʋchi ya̱, micha afʋmmi ont taha, na waya hoyo impʋchi ya̱ ish holitoblashke.

²³ Afʋmmi achʋfakma hituchina ha nakni yosh hʋchim ai asha moma kʋt Chitokaka Chihowah Islael in Chitokaka itikba ya hiela hi oke,

²⁴ Oklushi puta ka̱ hʋchi tikba kohchit kanchi lish, chim ai ʋhli a̱ chitolichi la chi̱ hoke, mikma afʋmmi achʋfakma hituchina ha chin Chitokaka Chihowah ya̱ itikba ish hikia chi̱ hosh ish iakma, hatak nana kia chi̱ yakni a̱ bʋnna he keyu hoke,

²⁵ Ʋbit isht aiokpʋchi issish a̱ pʋska ikshatʋmmo aieninchit is sʋm issa he keyu hoke, micha ʋbanʋblit ontia impʋchi ʋbit isht aiokpʋchi ʋt a̱sha na onnahinli ya̱ ona he ke keyu hoke,

²⁶ Nawaya ʋmmona achukma i̱ shahli a̱ya chin Chitokaka Chihowah im aboha isht ish onashke. Issi kosoma ushi ya̱ ishki i̱ pishukchi a̱ isht ish hona he keyu hoke, achi tok.

²⁷ Mihmʋt Chihowah yʋt Moses a̱, Anumpa ilʋppa puta ka̱ ish holissochashke; anumpa ilʋppa puta chohmi kak o̱, chishno micha Islael aiena ka̱ itim apesa li hoka, im achi tok.

²⁸ Micha yʋmma nitak pokoli ushta, micha ninak pokoli ushta ho̱ Chihowah takla ahanta tok, pʋska ya̱ ikpo, micha oka ya̱ ik ishko tok; micha nan ʋlhpisa anumpa nan ʋlhpisa pokoli yash tʋli patʋssa ya̱ ai o̱ holissochi tok,

²⁹ Atuk o̱ yakohmi tok, Moses ʋt Sinai nʋnih ha̱ nanʋlhpisa tʋli patʋssa tuklo kʋt Moses ibbak a̱ fo̱ka ho̱ akowa mʋt nʋnih ha̱ akowa mʋt, im anumpuli ma, nashuka yʋt shohmalali ka̱ ik ithano ki tok.

³⁰ Atuk o̱ Alon, micha Islael im ʋlla ʋhleha moma kʋt Moses nashuka yʋt shohmakali ka̱ pisa mʋt, bili̱ka ona ka̱ nukshopa tok.

³¹ Mihma Moses ʋt i̱ howa tok; mihma Alon micha okla moma pehlichi ʋhleha hʋt falamʋt im ona tok, mihma Moses ʋt itim anumpuli tok.

³² Atuk osh i̱ himmak ak o̱ Islael im ʋlla ʋhleha moma kʋt bili̱ka ona tok; mihma nanʋlhpisa ha̱ Chihowah yʋt Sinai nʋnih ha̱ ai im anumpuli tuk moma ka̱ ima tok.

³³ Micha Moses ʋt im anumpulit ik tahlo ki̱sha kʋt, nashuka ya̱ ishtompoholmo ya̱ isht ompohomo tok.

³⁴ Amba Moses ʋt itim anumpula chi̱ hosh Chihowah itikba ya̱ ona mʋt, nashuka isht ompoholmo ya̱ ishi tuk osh kohcha tok; micha kohcha mʋt, Chihowah i̱ miha tuk mak o̱ Islael im ʋlla ʋhleha ha̱ im anumpuli tok.

³⁵ Atuk o Islael im ʋlla ʋhleha hʋt Moses nashuka ya̱ pisa ma, Moses nashuka yʋt shohmalali tok, mihma Moses ʋt anonti nashuka ya̱ isht ompoholmo ya̱ isht ompohomo tuk osh im anumpula chi̱ hosh iba chukowa tok.