Eksotʋs 33 - Chahta Holisso Holitopa 1886

¹ Mihmʋt Chihowah yʋt Moses a, Iah, micha chishno, micha chim okla ha̱ Echip yakni ya̱ apehlichit ish kohchi tok aienʋt ilʋppa ashʋt iʋt, yakni Eblaham, micha Aisak, micha Chekob aiena ka̱ anumpa kʋllo im il onochit chim ishtatiaka ima la chi̱ hoke, achi li tok a̱ ish onashke.

² Mikma enchil a̱ hʋchi tikba pila la chi̱ hoke; micha Kananait, Amolait micha Hittait, Pelisait, Hifait, micha Chebusait aiena ka̱ tihlelit kohcha wehli la chi̱ hoke.

³ Pishukchi, micha foebila ayanahanli yakni o̱ hʋchisht ona chi̱ hoke: hʋchitin takla a̱yʋt ia la he keyu; ikunla kʋllo okla, hʋchia hoka, hina takla mosholichit hʋchi kanchi li yoba na, im achi tok.

⁴ Atuk o̱ okla hʋt anumpa ik achukmo ilʋppa haklo mʋt okla yaiya tok, mihma achʋfa kia isht ilakshema isht ik shemo tok.

⁵ Chihowah yʋt Moses a̱, Islael im ʋlla ʋhleha, Ikunla kʋllo okla hʋchia hoke, yakosi itin takla kia hʋchi takla ya̱ onʋt mosholichit hʋchi kanchi la chi̱ hoke: yʋmohmi hoka himaka nan isht ilakshema ya hʋsh shoelashke, yʋmohmi ho̱ nana hʋchi kaniohmichi la chi̱ kʋt ithana lashke, ish im achashke, im achi tuk oke.

⁶ Mihma Islael im ʋlla ʋhleha hʋt nan isht ilakshema ya̱ Holeb nʋnih bili̱ka ya̱ shoeli tok.

⁷ Mihma Moses ʋt ʋlhtipo ya̱ eshi cha, binah ha̱ kohcha hopaki ho̱ hilechi cha, Okla moma im ʋlhtipoh achi tok. Atuk o̱ yakohmi tok, kʋna hosh Chihowah ya̱ hoyokmʋt, kohchʋt okla moma im ʋlhtipo kohcha talaia kak o̱ ona beka tok.

⁸ Atuk o̱ yakohmi tok, Moses ʋt kohchʋt ʋlhtipo ya̱ ona ma, okla hash ot moma kʋt wakaya cha, hatak moma kʋt i̱ binah aiyukali okhissa ya̱ hiohma̱yʋt, Moses a̱ pit iakaiyʋchit pi̱sa na, ʋlhtipo ya̱ ont chukowa tok.

⁹ Atuk o̱ yakohmi tok, Moses ʋt ʋlhtipo ya̱ ont chukowa makinli ho̱, hoshonti toni̱k ʋt aka mintit ʋlhtipo okhissa ya̱ ont a hikia tok; mihma Chihowah yʋt Moses a̱ itim anumpuli tok.

¹⁰ Mihma okla moma kʋt hoshonti toni̱k ʋt ʋlhtipo okhissa ont hikia na pisa tok: mihmʋt okla moma kʋt wakaya cha, hatak moma kʋt i̱ binah okhissa ya̱ ai aiokpʋchi tok.

¹¹ Mihma Chihowah yʋt Moses a̱, hatak osh i̱ kana itim anumpuli ka̱ chohmit nashuka iti̱ sanalit itim anumpuli tok. Mihma anonti falamʋt binah ha̱ ont chukowa tok: amba in tishu hatak himita Nun ushi Choshua ʋto ʋlhtipo ya̱ kohchʋt ik aiyo tok.

¹² Mihma Moses ʋt Chihowah ya̱ yakeh, Okla ilʋppa isht ish onashke, is sʋm achishke: yohmi hokak osh kʋna hosh ish atokoli na si awant ia chi̱ ka̱ chik sʋm anoloshke: yohmi hokak osh hohchifo ho̱ ishit chithana li, micha na sa tikba ya̱ ʋm isht i̱ kana ya̱ ish aiahayuchi ak inlishke, ish achi tuk oke.

¹³ Yʋmohmi hoka himak a̱ chim asilhha lishke, chi tikba ya̱ chim isht i̱ kana aiahayuchi li hokma, himak a̱ chi̱ hina is sʋm otʋninchashke: yohmi na chithaiyana lashke, yohmi na, chi tikba ya̱ chim isht i̱ kana ai ahayuchi lashke: micha okla ilʋppʋt chim oklushi ya̱ ish anukfillashke, im achi tok.

¹⁴ Mihma Ʋno ak osh hʋchi awant ia la chi̱ hoke, micha hʋchi fohachi la chi̱ hoke, achi tok.

¹⁵ Mihma, Si awant ish ia chi̱ keyukmʋt, ilʋppa a pishit chik aiyo kashke.

¹⁶ Nanta hak o̱, Ʋno, micha chim okla aiena kʋt chim isht i̱ kana ya̱ ahayuchi tuk a̱ ilʋppak o̱ isht ai akostinincha hinla cho; pi awant ish a̱ya kak a hinla keyu cho? Yohmi hosh ʋno micha chim okla aiena kʋt okla moma yakni paknaka aiasha ka̱ i̱ filʋmma hi oke, im achi tok.

¹⁷ Mihma Chihowah yʋt Moses a̱, Ish anumpuli tuk, ilʋppak kia yʋmihchi la chi̱ hoke. Ʋm isht i̱ kana ya̱ ish ahayuchi tuk okʋt, micha chi hohchifo ha̱ ithana li hoke, im achi tok.

¹⁸ Mihma Chim asilhha lishke, chim aholitopa ya̱ is sa pesʋchashke, achi tok.

¹⁹ Mihma, Si ai achukmaka ya̱ mominchit chitikba ya̱ ont iachi la chi̱ hoke, micha chitikba ya̱ Chihowah hohchifo ha̱ ai anoli la chi̱ hoke: micha kʋna ho̱ i̱ kana la he, ahni likmʋt, i̱ kana la hi oke; micha kʋna i̱ nukha̱klo la hi, ahni likmʋt, i̱ nukha̱klo la hi oke, achi tok.

²⁰ Micha, Sa nashuka ya̱ ish pisa he keyu hoke, hatak nana hosh sa pesa cha, okcha̱ya he keyu hoka, achi tok.

²¹ Micha Chihowah yʋt, Yakeh ʋm a kanima kʋt tala̱yʋshke, mikma tʋli chito paknaka ya̱ ish o̱ hikiashke.

²² Atukma yakohma hi oke, ʋm aholitopa yʋt ant a̱ya takla ka̱, tʋli chito wakla ya̱ chi fohki la chi̱ hoke: micha ant a̱ya li takla kʋt sʋbbak isht chi ompohomo la chi̱ hoke.

²³ Atuk osh sʋbbak a̱ ishe likma, ʋm a̱shaka ak o̱ ish pisa hi oke, amba sanashuka ya̱ pisa he keyu hoke.