Eksotʋs 32 - Chahta Holisso Holitopa 1886

¹ Mihma Moses ʋt nʋnih ha̱ akowa kʋt ahchibali na, okla hʋt pisa mʋt, okla hash osh Alon a̱ im itʋnaha cha, Wakaya cha, pi tikba ia chi̱ ka̱ naholbʋt toba ya̱ pim ikbashke, Echip yakni a̱ pehlichit pi kohchi tok hatak Moses ilʋppak okʋno, nana kaniohmi tuk a̱ kil ithano hokʋt, im achi tok.

² Mihma Alon ʋt, Tʋli holisso lakna haksobish takali, hʋchi tekchi ʋhleha micha hʋchiso ʋhleha, micha hʋchiso tek ʋhleha aiena haksobish takohma̱ya ka̱ tʋptulit isht hʋs sʋm ʋlashke, im achi tok.

³ Mihma okla moma kʋt tʋli holisso lakna haksobish takali haksobish takohma̱ya tuk a̱ tʋptuli cha, Alon a̱ isht im ona tok.

⁴ Mihma ibbak a̱ im eshi cha, bilʋt akmot, wakushi ikbi ha yʋt, ishit pilesa ishit tihlit ikbi tok: mihma, Ilʋppa puta kak osh hʋchi̱ na holbʋt toba yosh Echip yakni ya̱ apehlichit hʋchi kohchi tuk mak oke, Islael ma, okla achi tok.

⁵ Atuk o̱ Alon ʋt pisa mʋt, itikba ya̱ alta ikbi tok; micha anumpa bohlit, Onnaha yʋt Chihowah impʋchi yoke, achi tok.

⁶ Atuk osh onna kʋt onnahinli fehna moma ho̱, okla wakaya cha, hukmit im issa ya̱ im issa mʋt, itin nanaiyʋchi im issa ya̱ isht ʋla tok, mihmʋt okla hʋt binilit impʋt nan ishko tuk osh wakayʋt ihlauʋlli tok.

⁷ Mihma Chihowah yʋt Moses a̱, Iah, akowah, chim okla Echip yakni a̱ pehlichit ish kohchi kash osh il okpʋni hoke.

⁸ Im apesa li tuk hina ya̱ chekosi fehna ho̱ kohchit fullotʋshke, bilʋt akmot wak ushi toba ikbi cha, aiokpʋchit nan ʋbit im issa cha, Ilʋppa puta kak osh hʋchi̱ naholbʋt toba ʋhleha hosh Echip yakni hʋchi pehlichit kohchi tuk oke, Islael ma, achishke, achi tok.

⁹ Mihmʋt Chihowah yʋt Moses a̱, okla ilʋppa pi̱hi̱sa li tuk oke, mikma yakeh, ikunla kʋllo okla hoke.

¹⁰ Yʋmohmi hoka inta, ik a̱sha is sʋm ahni na, ʋm ai i̱ nukkilli ʋt i̱ sanalit libbashke, micha yʋmmak o̱ lushummi lashke, micha chishno ak o̱ okla chinto ho̱ chikbi lashke, im achi tok.

¹¹ Mihma Moses ʋt in Chitokaka Chihowah ya̱ im ilbʋshʋt, Chihowah ma, nanta katiohmi ho̱ chim ai i̱ nukkilli ʋt chim okla ha̱, nan isht aia̱hli chinto, micha ibbak kʋllo hosh pehlichit Echip yakni ya̱ isht ish kohcha tuk ʋt i̱ sanalit libbi cho?

¹² Nanta katiohmi̱ ho̱ Echip okla hʋt nan ik achukmo yʋmihchit nʋnih fohka ai ʋbit tahlit yakni paknaka ai ishit kanchit mosholicha chi̱ hosh pehlichit kohcha tuk oke, acha chi̱ cho? chim ai i̱ nukkilli libbi kʋt ish shanaiya cha, nan ik achukmo chim okla i̱ sanali ilʋppa ish issashke.

¹³ Eblaham Aisak, micha Islael chin tishu ʋhleha, yʋmmak oka chishno ak inli ile hochifot anumpa kʋllo anumpulit, chim isht atiaka apaknʋchit ʋba shutik fochik a̱ chohmichi la chi̱ hoke, micha yakni isht anumpuli li tuk ilʋppa chim isht atiaka ya̱ ima likma immi bilia hi oke, ish im achi tok ʋt ish ithaiyanashke, achi tok.

¹⁴ Mihma Chihowah yʋt im okla ha̱ i̱ sanalit nanuk achukmo yʋmihcha chi̱ hosh anukfilli tuk ʋt issa tok.

¹⁵ Mihma Moses ʋt filema mʋt, nʋnih ha̱ akowa tok, mihma nanʋlhpisa ai o̱ holisso patʋssa tuklo kʋt ibbak a fo̱ka tok; patʋssa yʋt tahlakla̱ka a holisso ha tok; in tʋnnʋp achʋfa ka̱ a holisso mʋt, in tʋnnʋp achʋfa ka̱ a holisso ha tok.

¹⁶ Micha patʋssa yʋt Chitokaka yosh ikbi ha tok, micha holisso ha̱ Chitokaka yosh holissochit patʋssa ya̱ in chunli ha tok.

¹⁷ Atuk o̱ Choshua ʋt okla shakapa ka̱ haklo mʋt, Moses a̱, Binah ha̱ tʋnʋp shakapa ho̱ haklo lishke, im achi tok.

¹⁸ Mihma Im aiya hosh shakapa ano keyu, micha ilap ak o̱ im aiya ho̱ pa̱ya hoh keyu, amba taloa hosh shakapa ka̱ haklo lishke, achi tok.

¹⁹ Atuk o̱ yakohmi tok, binah ha̱ bili̱ka ona mʋt, wakushi yash, micha hihla aiena ka̱ pisa tok; mihmʋt Moses im ai i̱ nukkilli ʋt libbi mʋt, nʋnih nuta ya̱ patʋssa yash ibbak a̱ mokofit aka pila cha, koli tok.

²⁰ Micha wak ushi okla ikbi kash eshi cha, luak itʋchit hukmi mʋt, fotohlit pushechi cha, oka ya̱ o̱ fimmi mʋt Islael im ʋlla ʋhleha ha̱ ishkochechi tok.

²¹ Mihmʋt Moses ʋt Alon a̱ okla hʋt nanta ho̱ chi katiohmichi ho̱ nanashʋchi chinto yakohmi ka̱ ish onochi cho: im achi tok.

²² Mihma Alon ʋt, A̱ shahli im ai i̱ nukkilli ʋt ik libbo kashke, okla hʋt nan ik achukmo amosholi ya̱ ish ithaiyanʋshke.

²³ Pi tikba ia chi̱ ka̱ naholbʋt toba ya̱ ish pim ikbashke; Echip yakni ya̱ pehlichit pi kohchi tuk, hatak Moses ilʋppak okʋno nana kaniohmi tuk a̱ il ithana keyu hoka, ʋm achi tuk oka.

²⁴ Mihma kʋna hosh tʋli holisso lakna i̱shikmʋt tʋblashke, im achi li tuk oke. Yohmi ma okla ʋma tuk oke: yohmi na luak pit itʋchili ma, wak ushi ilʋppak osh kohcha tuk oke, achi tok.

²⁵ Atuk o̱ Moses ʋt okla hʋt nipi bano na pisa mʋt (Alon ʋt in tʋnʋp ʋhleha ha̱ im i̱ hofahyalit nipi banochi tuk oke.)

²⁶ Yohmi ma Moses ʋt binah okhissa ya̱ hikia cha, Kʋta hosh Chihowah ya̱ ibafoyuka cho; ʋno ʋm ʋlashke, achi tok, Mihma Lefai ushi ʋhleha moma kʋt im itʋnaha tok.

²⁷ Mihma Chihowah Islael in Chitokaka ʋt yak achishke, Hatak moma kʋt hʋchi̱ bʋshpo falaia ya̱ hʋsh ilapakshʋnni cha, binah okhissa puta chukowʋt kohchʋt hlopullit hatak moma kʋt hʋchitibapishi ha̱, micha hatak moma kʋt ai itapiha ya̱, micha hatak moma kʋt in chuka a bili̱ka ya̱ hʋsh bashke, achishke, achi tok.

²⁸ Mihma Lefai im ʋlla ʋhleha hʋt Moses im anumpa hatuk mak o̱, yʋmihchi tok; mihma nitak yʋmma akakoha kʋt hatak tahlepa sipokni tuchina foka tok.

²⁹ Moses ʋt himak nitak a̱ hatak moma kʋt ilap ushi, micha itibapishi hatuk kia Chihowah im isht ile hullochashke; yʋmohmi ho̱ himak nitak a̱ nan isht yukpali a̱ hʋchi onochashke, achi hatuk oka.

³⁰ Atuk o̱ onna ma, yakohmi tok, Moses ʋt okla ha̱, Nanashʋchi chinto ho̱ hʋsh ashʋchishke, atuk o̱ himak a̱ oiyʋt Chihowah ya̱ im ia la chi̱ hoke, na hʋsh ashʋchi ya̱ atobbi li yoba na (or kashofit atobbi li yoba na) achi tok.

³¹ Mihmʋt Moses ʋt falamʋt Chihowah ya̱ im ona cha, Ikikkeh, okla ilʋppʋt nan ashʋchi chito ho̱ ashʋchi cha, tʋli holisso lakna naholbʋt toba ikbishke.

³² Yohmi kia himak a̱ ish ahnikmʋt, nanashʋchi ya̱ ish i̱ kashofashke, atuk o̱ ish yʋmihcha he keyukmʋt, chi̱ holisso ho̱ ish holissochi tuk ʋt is sa kashofashke, achi tok.

³³ Mihma Chihowah yʋt Moses a̱, Kʋna hosh a̱ yoshuba tukma, yʋmmak o̱ a̱ holisso ha̱ a kashofi la chi̱ hoke.

³⁴ Yʋmohmi hoka himak a̱ iah, micha okla pehlichit, yakni chim anoli li tuk a̱ ish onashke. Yakeh, ʋm enchil ʋt hʋchi tikba ia chi̱ hoke: yohmi kia im a̱ya li nitak mʋt, nan ashʋchi tuk a̱ im a̱yʋt onochi la hi oke.

³⁵ Atuk osh Chihowah yʋt okla ha̱ Alon ʋt ikbi ma, wak ushi okla ikbi tuk pulla kak o̱ nan ik achukmo onochi tok.