Eksotʋs 31 - Chahta Holisso Holitopa 1886

¹ Mihmʋt Chihowah yʋt Moses a̱ im anumpulit,

² Yakih, Chutah apehlichi aiachʋfa Hu ushi, Uli yo̱ ushi Besaleel a̱ atokolit hochifo lishke,

³ Micha hopoyuksʋt, micha nana akostininchit, micha nanithanʋt micha na toksʋli ilaiyukali moma imponnʋt.

⁴ Natoksʋli inla tʋli holisso lakna, micha tʋli hʋta, micha asonak lakna toksʋla he,

⁵ Micha tʋli tihlit on talohla he, micha iti ya̱ chakonlichi na toksʋli ilaiyukali moma apesʋchit imponna chi̱ ho̱ chu̱kʋsh Chitokaka imi shilombish a̱ alotoli lishke.

⁶ Micha ʋno ʋt, yakeh ʋno ʋt Tan apehlichi aiachʋfa Ahisamak ushi Aholiab a̱ aieninchit ima lishke; chim apesa li tuk moma yʋmicha chi̱ ka̱, chu̱kʋsh hopoyuksa puta ka̱ chu̱kʋsh i̱ hopoyuksa moma nukfoki li tuk oke.

⁷ Okla moma im ʋlhtipo, micha nan ʋlhpisa a foyuka itombi holitopa, micha ai im isht i̱ kana ai om binili, yʋmmʋt paknaka talaia ka̱ micha ʋlhtipo i̱ nan chukushpa moma,

⁸ Micha aiimpa, micha i̱ nachukushpa, micha pʋla ai o̱ hikia kashofa, i̱ nachukushpa aiena moma, micha nabalama alta,

⁹ Micha aionochit hukmit im issa alta i̱ nachukushpa aiena moma, micha ampo chito, micha iyi,

¹⁰ Nan isht ʋtta i̱ nafohka, micha naholitompa isht ʋtta Alon a̱ i̱ nafohka holitopa, micha ushi ʋhleha hʋt na holitompa isht ai ʋtta ya̱ isht a̱shakmʋt i̱ nafohka,

¹¹ Micha isht ahama bila, micha aholitopa nabalama aiena chim apesa li tuk mak o̱, moma yʋmihchashke, im achi tok.

¹² Micha Chihowah yʋt Moses a̱ im anumpulit,

¹³ Islael im ʋlla ʋhleha ha̱, A̱ nitak hullo ya̱ a̱hlit hʋsh holitoblashke; hʋchim ai iti shali moma ka̱ nan ishtatakowa yosh hʋpim itin takla ya̱ itoyula chi̱ hoke; yʋmohmi na, Chihowah sia hʋchi kashofi li ka̱ hʋsh ithaiyana chi̱ hoke.

¹⁴ Yʋmohmi hoka nitak hullo yo̱ hʋsh holitoblashke, hʋchi̱ holitopa hoka, kʋna hosh kobʋffikmʋt illi pulla hi oke; kʋna hosh nitak yʋmma na toksʋli nana kia yʋmihchikmʋt, shilombish yʋmmʋt im okla ha̱ ai i̱ filʋmmit fiopa tʋpa hi oke.

¹⁵ Nitak hannali ho̱ natoksʋli ya̱ yʋmihcha hinla hoke, Amba isht untuklo hokʋto nitak hullo afoha, Chihowah i̱ holitopa hoke; kʋna hosh nitak hullo ya̱ natoksʋli nana kia yʋmihchikmʋt illi pulla hi oke.

¹⁶ Yʋmohmi hoka Islael im ʋlla ʋhleha im ai itishali moma kʋt nan itim apesa bilia ya̱ nitak hullo ya̱ holitoblit, nitak hullo ya̱ ithaiyana hi oke.

¹⁷ Nan isht atakowa yosh ʋno, micha Islael im ʋlla ʋhleha pim itin takla ya̱ itoyula na bilia hi oke; nitak hannali ho̱ Chihowah yʋt ʋba shutik, micha yakni aiena ka̱ ikbi mʋt, nitak isht untuklo ka̱ foha cha, im achukma tok oka, ish im achashke, im achi tok.

¹⁸ Atuk osh Moses a̱ Sinai nʋnih paknaka ai im anumpuli tuk ʋt ont tahli mʋt, nan ʋlhpisa patʋssa tuklo tʋli patʋssa Chitokaka ibbak ushi yosh ai o̱ holissochi yo̱ ima tok.