Eksotʋs 30 - Chahta Holisso Holitopa 1886

¹ Micha na balama ai onochit hukma chi̱ ka̱ alta ish ikbashke, shittim iti yo̱ ish ikbashke.

² Falaia kʋt kubit achʋfashke, mikma auata kʋt kubit achʋfashke iti laui bat fullotashke; mikma chaha kʋt kubit tuklo hashke, lʋpish ʋt yʋmmak inlashke.

³ Micha paknaka, micha naksika apakfoyupa ka̱, micha lʋpish aiena ka̱ tʋli lakna bano ho̱ ish lapalechashke, micha tʋli holisso lakna i̱ fullotʋt apakfoyupa ish ikbashke.

⁴ Micha i̱ fullota nutaka chukbi tuklo ha̱ tʋli lakna chʋnaha tuklo ho̱ ish ikbashke, in tʋnnʋp tuklo ka̱ ish takohli chashke, mikma tʋbi ʋt shamohli na ishit shohla hi oke.

⁵ Micha shittim iti yo̱ tʋbi ish ikbashke, micha tʋli lakna ish lapalechashke.

⁶ Micha nantʋnna ʋba takali yʋmmʋt nan ʋlhpisa afohka itombi holitopa bili̱ka takali ka̱ itikba im ai isht i̱ kana om binili, yʋmmʋt nan ʋlhpisa afohka paknaka talaia ka̱ itikba ish talalashke, yʋmmak o̱ achi afama la hi oke.

⁷ Mikma Alon ʋt onnahinli aiyukali ka̱ nabalama onochit hukma hi oke, pʋla puta ka̱ ai iskiachikmʋt nabalama onochit hukma hi oke.

⁸ Micha Alon ʋt opiakma pʋla ha̱ palalikmʋt, nabalama onochit hukma hi oke, chim ai itishahli moyuma ka̱ Chihowah itikba ya̱ na balama bilia hi oke.

⁹ Nabalama inla, micha ʋbit hukmit im issa, micha im ilhpak im issa aiena ka̱ onochit ish im issa he keyu hoke; micha nan ishko im issa aiena ka̱ ish on hlatʋbla he keyu hoke.

¹⁰ Mikma Alon ʋt afʋmmi achʋfakma himonna ho̱ nanashʋchi im issa issish isht atobbi ya̱ atobbit lʋpish a̱ onocha hi oke; chim ai itishali moyuma ka̱ afʋmmi achʋfakma onochit ato̱homba hi oke: Chihowah ya̱ i̱ holitopa kʋt moma i̱ shahli hoke, achi tok.

¹¹ Mihma Chihowah yʋt Moses a̱ im anumpulit,

¹² Islael im ʋlla ʋhleha ha̱ noshkobo holhtina ka̱ ish eshikma hatak moyuma ka̱ ish hotihnakma imi shilombish ʋlhtoba ya̱ Chihowah imashke; yʋmohmi ho̱ ish hotihnakma ililli okpulo itin takla ya̱ iksho kashke.

¹³ Ilʋppak o̱ imashke, holhtina ka̱ iba holhtina tuk moma kʋt ʋlhtipo holitopa shekel im ʋlhpisa ʋlhpisa ho̱, shekel iklʋnna ho̱ ima hi oke; shekel achʋfa kʋt kelah pokoli tuklo hoke, shekel iklʋnna kak o̱ Chihowah ya̱ im issa ya hi oke.

¹⁴ Afʋmmi pokoli tuklo ʋttʋt ʋba ma̱ya holhtina ka̱ iba holhtina tuk moma kʋt Chihowah im issa ya̱ ima hi oke.

¹⁵ Hʋchimi shilombish isht ʋlhtoba nan im issa ya̱ Chihowah hʋsh imakmʋt, nan in laua yʋt shekel iklʋnna ka̱ ont ia ho̱ ima ke keyukma, ilbʋsha yʋt ola takla ho̱ ima he keyu hoke.

¹⁶ Mikma Islael im ʋlla ʋhleha ha̱ nan isht atobbi tʋli holisso ya ish eshi cha, okla moma nan im ʋlhtipo nan isht ai ahanta isht ish apesashke; yʋmohmi ho̱ Islael im ʋlla ʋhleha ha̱ Chihowah itikba ai isht ithaiyana he, micha hʋchimi shilombish isht ʋlhtoba yoke, achi tok.

¹⁷ Mikmʋt Chihowah yʋt Moses a̱ im anumpulit,

¹⁸ Aiachefa yo̱ asonak lakna ampo chito, micha iyi ʋt asonak lakna ak inli ho̱ ish ikbashke, micha okla moma im ʋlhtipo, micha alta itin takla ish hilechi cha oka ish ʋnashke.

¹⁹ Yʋmmak o̱ Alon micha ushi ʋhleha aiena kʋt ibbak, micha iyi aiena ka̱ ai achefa hi oke.

²⁰ Okla moma im ʋlhtipo ya̱ chukowakmʋt, keyukmʋt luak ishit hukmit Chihowah im issa ya̱ hukma chi̱ hosh alta ya̱ bili̱ka ona aienakmʋt ik illo ka hi oke.

²¹ Yʋmmohmit ibbak, micha iyi aiena ka̱ achefa cha ik illo kashke; micha nan ʋlhpisa ʋlhpesa bilia yosh, Alon, micha ushi ʋhleha im ai iti shali moma kʋt in toyulashke, achi tok.

²² Micha Chihowah yʋt Moses a̱ im anummulit,

²³ Nabalama i̱ shahli puta ma a̱hli shekel tahlepa tahlapi, sinnamon balama ʋt yʋmma iklʋnna shekel tahlepa tuklo cha pokoli tahlapi, kalamʋs balama ʋt shekel tahlepa tuklo cha pokoli tahlapi,

²⁴ Micha kassia ʋt shekel tahlepa tahlapi ʋlhtipo holitopa ai ʋlhpisa shekel ashke, micha alif bila yʋt hin achʋfa ho̱ ish ishashke.

²⁵ Micha nanishtahama holitopa bila, ikhi̱sh ikbi ithaiyana hosh ikbi yo̱ nan ahama ish ikbashke; isht ahama holitopa bila hi oke.

²⁶ Micha okla moma im ʋlhtipo ya̱ micha nanʋlhpisa afoyuka itombi holitopa̱,

²⁷ Micha aiimpa, micha nan im ai ʋlhto moma, micha pʋla aio̱hikia, micha nan im aiʋlhto, nabalama ahukmi alta,

²⁸ Micha ai onochit hukmit im issa alta, micha nan im aiʋlhto moma, micha aiachefa ampo chito, micha iyi aiena ka̱ isht ish ahʋmmashke.

²⁹ Micha ish kashofi na holitopa kʋt moma i̱ shahli yashke, nana hosh halelikmʋt holitopa hi oke.

³⁰ Micha Alon, micha ushi ʋhleha aiena ka̱ ahʋmmit ish hullochashke, mikma na holitompa isht aiʋtta ya̱ isht ʋm aiaha̱shwashke.

³¹ Micha Islael im ʋlla ʋhleha ish im anumpulit, hʋchim ai itishali moma ka̱ nan isht ahama bila ilʋppʋt a̱ holitopa chi̱ hoke.

³² Hatak nipi okʋno o̱ fohopa he keyu, micha itaioma ya̱ hobachit inla ya̱ ish ikba he keyu hoke, holitopa hoke, hʋchi̱ holitopa hi oke.

³³ Kʋna hosh yʋmma chohmi ka̱ itaiomi, keyukmʋt okla inla yo̱ onochikmʋt, im okla achʋfa ya̱ ai i̱ filʋmmit fiopa tʋpa hi oke ish achashke, achi tok.

³⁴ Mihmʋt Chihowah yʋt Moses a̱, Nabalama istakti, oneka, micha kalbanum, ish ishashke; nabalama ilʋppa puta ka̱ fala̱kinsen bano yo̱, moma weki kʋt iti laui hashke.

³⁵ Micha ikhi̱sh ikbi champullichi ak o̱ hobachit nabalama ʋlhpesʋt itaioma kashofa, micha holitopa yo̱ ish ikbashke.

³⁶ Micha kaniohmi ka̱ bolit ish lapushkichi cha, kaniohmi ka̱ okla moma im ʋlhtipo anu̱kaka isht atokowa itikba a chi afama la chi̱ ka̱ ish talalashke, chi̱ holitopa i̱ shahli ya chi̱ hoke.

³⁷ Micha nabalama ish ikba chi̱ kʋt itaioma, yʋmma chohmi ka̱ chimmi ish ikba he keyu, Chihowah immi hosh chi̱ holitopa hi oke.

³⁸ Kʋna hosh yʋmma chohmi ka̱ hu̱wa chi̱ hosh ikbikmʋt im okla achʋfa ya̱ ai i̱ filʋmmit fiopa topa hi oke, im achi tok.