Eksotʋs 3 - Chahta Holisso Holitopa 1886

¹ Yohmi ka̱ Moses ʋt ipochi naholitompa isht ʋtta Mitian ʋtta Chehlo i̱ nan ʋlhpoa chipunta ya̱ im apesʋchi tok; atuk osh nan ʋlhpoa chipinta ya̱ pehlichit isht a̱yʋt, yakni haiaka ya̱ ont a̱shakah ishtona mʋt, Chitokaka in nʋnih chaha Holeb a̱ ona tok.

² Mihma Chihowah im enchil ʋt luak libbi afoyukʋt bʋfaha iklʋnna et ai i̱ haiaka tok; atuk osh pisa ma, yakeh, bʋfaha hʋt luak isht lua, mihmʋt bʋfaha hʋt ik taho tok.

³ Mihma Moses ʋt, Fullota lish na pisa chinto ilʋppʋt nanihmi ho̱ bʋfaha hʋt ik luokma pisa lashke, achi tok.

⁴ Atuk osh pisa chi̱ hosh fullota ma, Chihowah yʋt pisa mʋt, Chitokaka yʋt bʋfaha iklʋnna et ai i̱ howʋt Moses, Moses, achi tok, Mihma yak hikia lishke, achi tok.

⁵ Mihma, Bili̱ka chik minto kashke, chiyi, shulush isht ish hoyolo kʋt ish shu̱fashke, ish ahikia yakni ʋt holitopa hoka, achi tok.

⁶ Micha achakalinchit, Chi̱ki in Chitokaka, Eblaham in Chitokaka, Aisak in Chitokaka, micha Chekob in Chitokaka sia hoke, achi tok. Mihma Moses ʋt nashuka ya̱ luhmi tok; Chitokaka ya̱ pisa kʋt nukshopa tuk okʋt.

⁷ Mihma Chihowah yʋt, Ʋm okla Echip aiasha ka̱ ilbʋsha ka̱ pi̱hisa li kʋt a̱hlishke, toksʋli ka̱ apistikeli pulla kak o̱ ya̱ha̱ya ka̱ ha̱ha̱klo lishke, nan isht im a nukha̱klo ka̱ ithana li hokʋt.

⁸ Atuk osh Echip okla ibbak a̱ kohchit hlakofichit, yakni yʋmma kohchit, yakni achukma, micha chito, pishukchi, micha foebila aiena kʋt ayana̱hanli, Kananait, micha Hittait, micha Amolait micha Pelissait, micha Hifait, micha Chebusait, aiasha yak o̱ isht ona la chi̱ hosh ʋla lishke.

⁹ Yʋmohmi hoka himak a̱ yakeh, Islael im ʋlla ʋhleha ya aya kʋt ʋm ʋlʋshke; micha Echip okla hʋt isht ilbʋshali na, ilbʋsha aiena ka̱ pi̱hi̱sa le tuk oke.

¹⁰ Yʋmohmi hoka, inta, himak a̱ Falaoh ya̱ pit in chi pila lashke; yʋmohmikma ʋm okla Islael im ʋlla ʋhleha ha̱ pehlichit Echip a̱ isht ish kohchashke, achi tok.

¹¹ Mihma Moses ʋt Chitokaka ya̱, Kʋta sia hatuk osh, iʋt Falaoh ya̱ im ona la hinla cho? micha Islael im ʋlla ʋhleha ha̱ Echip a̱ apehlichit kohchi la hinla cho? im achi tok.

¹² Mihma, Chiba foyuka li pulla chi̱ hoke, mikma chipila li tuk a̱ ilʋppak osh chim isht atokowa ya chi̱ hoke; okla ha̱ pehlichit Echip a̱ ish kohchikmʋt, nʋnih paknaka ilʋppa Chitokaka hʋsh aiokpʋcha hi oke, achi tok.

¹³ Mihma Moses ʋt Chitokaka ya̱, Yakeh, Islael im ʋlla ʋhleha ha̱ im ona lish, Hʋchi̱ki ʋhleha in Chitokaka yʋt et hʋchi̱ sa pila tuk oke, im achi likma, mikma, Hohchifo hʋt nanta ho̱? ʋm achikma, nanta ho̱ im achi la he oh cho? im achi tok.

¹⁴ Mihma Chitokaka yʋt Moses a̱, Sia kʋt mih Sia ha chi hoke, im achi tok, micha Islael im ʋlla ʋhleha ha̱ yak ish im achashke, mih Sia hakosh hʋchi̱ sa pila tuk ʋt, ish im achashke, achi tok.

¹⁵ Micha achakalinchit Chitokaka yʋt Moses a̱, Islael im ʋlla ʋhleha ha̱, yak ish im achashke, Hʋchi̱ki ʋhleha in Chitokaka Chihowah, Eblaham in Chitokaka, micha Aisak in Chitokaka, micha Chekob in Chitokaka ak osh et hʋchi̱ sa pila tuk oke; ilʋppak osh sa hohchifo bilia yoke, mikmʋt ilʋppak osh himak a pilla aiitishali moma aiasha he ʋt ishit sʋthaiyana hi oke.

¹⁶ Iá, micha, Islael im asʋnonchi ʋhleha ha ish itʋnahli cha, Hʋchi̱ki ʋhleha in Chitokaka Chihowah, Eblaham, micha Aisak, micha Chekob in Chitokaka yʋt a̱ haiaka cha, Hʋchim a̱ya li pulla cha, Echip a̱ nana a hʋchi̱ kaniohmi̱hinchi ka̱, pi̱hi̱sa le tuk oke.

¹⁷ Micha Echip aiilbʋsha ka̱ hʋchi kohchi lish, Kananait, micha Hittait, micha Amolait, micha Pelissait, micha Hifait, micha Chebusait aiena i̱ yakni, pishukchi, micha foebila a yana̱hanli yakni a̱ chishtona lashke, achi le tuk oke, achishke, ish im achashke.

¹⁸ Mikma chim anumpa ha̱ hakla chi̱ hoke; mikma chishno, micha Islael im asʋnonchi ʋhleha aienʋt Echip i̱ mi̱ko ya̱ hʋsh im ona cha, Heblu in Chitokaka Chihowah yʋt pi afama tuk oke; Yohmi ka himak a̱ chim asilhhʋshke, yakni haiaka nitak tuchina anowa yo̱ il ona cha, Chihowah pin Chitokaka ya̱ ʋbit isht aiokpʋchi il im issashke, hʋsh im achashke.

¹⁹ Mikma Echip i̱ mi̱ko ʋt ik iá hʋchim ahna chi̱ keyuka̱ ithana lishke, keyushke, ibbak kʋllo mak osh ik onʋtoyula hoh kia.

²⁰ Mihma sʋbbak a̱ wieli lish a̱ nafehna moma im itin takla ya̱ ayʋmihchi la chi̱ kʋt, Echip a̱ isht issot kanchi la chi̱ hoke; atuk o̱ yohmi ha yokmʋno ik ia hʋchim ahna chi̱ hoke.

²¹ Mikma okla ilʋppʋt Echip okla itikba ya̱ holhponayo hanta ya̱ ai ahayucha chi̱ ho̱ ima la chi̱ hoke; atukma yakohma hi oke; hʋsh iakmʋt nan iksho ho̱ hʋsh ia he keyu hoke.

²² Amba ohoyo puta kʋt chuka abili̱ka ya̱, micha nowʋt a̱ya yosh in chuka ahanta tuk aiena ka̱, tʋli hʋta ishtshema, micha tʋli lakna ishtshema, micha nafohka aiena ka̱ im a potashke, micha hʋchiso, micha hʋchiso tek ʋhleha aiena ka̱ hʋsh fohkʋchashke; micha Echip okla ha̱ hʋsh wehpula chi̱ hoke, hʋsh im achashke, achi tok.