Eksotʋs 29 - Chahta Holisso Holitopa 1886

¹ Micha nana ilʋppak o̱ ish i̱ yʋmihchi hosh na holitompa isht ai ʋtta ya̱ isht ʋm aia̱shwa chi̱ ka̱ ish hullochashke; wak hobʋk himmita achʋfa, micha chukfi nakni tuklo ik aiono kʋt iksho yo̱ ish eshi cha,

² Micha pʋska ik shatʋmmo, micha pʋska lumbo ik shatʋmmo bila yʋmmi, micha pʋska tapʋski ikshatʋmmo bila ahama aiena ka̱ onush bota yo̱ ish ikbashke.

³ Mikmʋt kishi achʋfa ho̱ ish fohki cha, kishi a̱ ʋlhto ho̱ wak hobʋk, micha chukfi nakni tuklo ka̱ aieninchit isht ish lashke.

⁴ Micha Alon, micha ushi ʋhleha aiena ka̱ okla moma im ʋlhtipo okhissa itikba ya̱ isht ish ona cha, oka isht ish achefashke.

⁵ Micha ilefohka ya̱ ish eshi cha, nafohka lumbo, micha nafoka holitopa falaia efot, micha efot, micha ikkishi alata ya̱ ish fohkechi cha, ʋskofʋchi inla fehna efot a̱ ish ʋskofʋchechashke.

⁶ Micha iahlipa ha̱ noshkobo ha̱ ish on talalashke, micha bita holitopa ya̱ iahlipa ha̱ ish on talalashke.

⁷ Yʋmohmikmʋt bila isht ahʋmmi ya̱ ish eshi cha, noshkobo ha̱ on hlatʋblit ish ahʋmmashke.

⁸ Micha ushi ʋhleha ha̱ isht ishla cha, ilefoka lumbo ish fohkʋchechashke.

⁹ Micha, Alon, micha ushi ʋhleha aiena ka̱ ʋskofʋchi ish ʋskofʋchechashke micha shapo ish shapolechashke; mikma naholitompa isht ai ʋtta yʋt immi ha he, nan ʋlhpisa biliashke; micha Alon micha ushi ʋhleha aiena ka̱ ish hullochashke.

¹⁰ Micha wak hobok himmita ya̱ okla moma im ʋlhtipo itikba isht ʋla he ya̱ ish apesashke; mikma Alon, micha ushi ʋhleha aiena kʋt wak hobʋk noshkobo ya̱ ibbak isht ombitepashke.

¹¹ Mikma wak hobʋk ash okla moma im ʋlhtipo okhissa bili̱ka Chihowah itikba ya̱ ish aiʋbashke.

¹² Micha wak hobʋk im issish a̱ ish eshi cha, alta lapish a̱ chibbak ushi isht ish lapalichashke; micha issish a̱ mominchit alta akishtʋla lapali ka̱ ish hlatʋblashke.

¹³ Micha anu̱kaka ompoholmo nia moma, micha takoba nia yʋmmʋt salakha ya̱ onʋtoyulaka̱, micha haiyichi tuklo, micha nia yʋt onʋtoyula aiena ka̱ ish eshi cha, alta ya̱ onochit ish hukmashke.

¹⁴ Amba wak hobʋk ash nipi, micha hakshup, micha i̱ yʋlhki aiena ka̱ binah kohcha ya̱ luak isht ish hukmashke: nan ashʋchi im issa yoke.

¹⁵ Micha chukfi nakni achʋfa ho̱ ish eshashke, mikma Alon, micha ushi ʋhleha aiena kʋt chukfi nakni noshkobo ha̱ ibbak a̱ isht ombitepashke.

¹⁶ Mihma chukfi nakni yash ishbashke, micha im issish a̱ ish eshi cha, alta paknaka ya̱ o̱ fimmit ish fullolechaske.

¹⁷ Micha chukfi nakni yash bʋshlit tushahlichit ish tahli cha, anu̱kaka micha iyi aiena ka̱ ish achefa cha, ai itim aiyuka li ka̱ ish ita chakli cha, noshkobo ya̱ ish achakalashke.

¹⁸ Micha chukfi nakni yash moma alta onochit ish hukmashke; hukmit Chihowah im issa yoke; luak a̱ onochit Chihowah im issa na balama yoke.

¹⁹ Mikmʋt chukfi nakni achʋfa ya̱ ish eshashke, mikma Alon, micha ushi ʋhleha hʋt chukfi nakni yash noshkobo ha̱ ibbak isht ombitepashke.

²⁰ Yohmikma chukfi nakni yash ishbashke, micha im issish a̱ ish eshikmʋt Alon haksobish ishtimpakimma ʋhli, micha ushi ʋhleha haksobish ishtimpakimma ʋhli, micha ibbak ishtimpakimma ibbak ishki, micha iyi ishtimpakimma iyishki aiena ka̱ ish lapalechashke, micha issish a̱ alta ya̱ o̱ fimmit ish lapalechaske.

²¹ Micha issish alta̱ o̱n a̱sha ka, micha ishtahʋmmi bila ya̱ ish eshi cha, Alon micha i̱ nafohka, Alon ushi ʋhleha, micha ushi ʋhleha i̱ nafohka aiena ka̱ ish o̱ fimmashke, mikma Alon, micha i̱ nafohka, micha ushi ʋhleha, micha ushi ʋhleha i̱ nafohka aiena kʋt hullochi yashke.

²² Micha chukfi nakni yash nia, micha hʋtip, micha anu̱kaka ya̱ ompoholmo nia, micha takoba nia, yʋmmʋt salʋkha onʋtoyula ka̱, micha haiyihchi tuklo micha nia yʋt a̱sha, micha fullup ishtimpakimma aiena ka̱ ish ishashke; chukfi nakni nahullochi yoke.

²³ Micha pʋska lumbo chito achʋfa, micha pʋska lumbo iskitini bila yʋmmi achʋfa, micha pʋska tapʋski achʋfa aiena ka̱ pʋska ik shatʋmmo kishi ʋlhtot Chihowah itikba talaia aiena ka̱ kohchit ish eshashke.

²⁴ Micha moma ka̱ Alon ibbak, micha ushi ʋhleha ibbak ish fohki cha, Chihowah itikba ya̱ i̱ walit im issa ya̱ ish walashke.

²⁵ Mikmʋt ibbak a̱ kohchit ish im ai eshi cha, hukmit im issa chi̱ ka̱, Chihowah itikba na balama ya̱ chi̱ ho, alta onochit ish hukmashke, luak onochit Chihowah im issa yoke.

²⁶ Micha Alon hullochi chukfi nakni ikkishi ha̱ ish eshi cha, Chihowah itikba ya̱ wali ya chi̱ ho̱ ish walashke, mikma chimmi hashke.

²⁷ Micha Alon, micha ushi ʋhleha aiena ka̱ immi ha he, ishit chukfi nakni wali tuk, micha ʋba pit wali tuk, walit im issa ikkishi, micha ʋba pit walit fulup a̱ ish hullochashke.

²⁸ Mikma Islael im ʋlla ʋhleha hak osh ima ho̱, Alon micha ushi ʋhleha immi ha he, nan ʋlhpisa bilia yashke; ʋba pit walit im issa yoka, micha Islael im ʋlla ʋhleha hʋt iti̱ nanaiyʋchi im issa, ʋbit isht aiokpʋchi, ʋba pit walit im issa, ʋba pit walit Chihowah im issa yoke.

²⁹ Mikma Alon i̱ nafohka holitopa yʋt ushi ʋhleha iakaiya kʋt immi cha, foyukʋt bila ahama he, micha foyuka ho̱ hullocha hi oke.

³⁰ Micha ushi yosh ʋlhtobʋt naholitompa isht ʋtta toba kʋt okla moma im ʋlhtipo ya̱ chukowʋt aholitopa ya̱ nan isht ai ahantakmʋt nitak untuklo foyukashke.

³¹ Atuk o̱ hullochi chukfi nakni ya̱ ish eshi cha nipi aholitopa ya̱ ish ahonashke.

³² Mikma Alon, micha ushi ʋhleha hʋt chukfi nakni yash nipi ya̱, micha pʋska kishi ʋlhto tuk a̱ okla moma im ʋlhtipo okhissa talaia ka̱ aieshit aieninchit ai ʋpa hi oke.

³³ Micha hullochi, micha kashofa chi̱ nana puta ka̱ isht atobbi tuk ak o̱ ai ʋpashke: amba okla inla yʋt ai ʋpa he keyu, holitopa hoka.

³⁴ Micha hullochi tuk nipi, keyukmʋt pʋska nana kia, atampa hosh a̱sha na onnahinlikma, yohmikma atampa tuk ash luak ishit ish hukma hi oke, ʋpa he keyu, holitopa hoka.

³⁵ Micha nana moma chim apesa li tuk mak o̱, Alon micha ushi ʋhleha ha̱ ish i̱ yʋmihchashke, nitak untuklo ho̱ hullochi hosh isht ish ahantashke.

³⁶ Micha nitak aiyukali ho̱ wak hobʋk a̱ nanashʋchi ishit ʋlhtoba ho̱ ish im issashke, micha nan ishit atobbi alta ish im ikbikmʋt, alta ya̱ ish kashoffaske, micha kashoffit bila ish ahʋmmashke.

³⁷ Nitak untuklo ho̱ alta ya̱ atobbit ish kashoffashke, mikma alta ʋt holitopa i̱ shahli yashke; nana hosh alta ya̱ halelikmʋt holitopa hi oke.

³⁸ Yohmi ka̱ ilʋppak o̱ alta ya̱ onochit ish im issa hi oke: onna hosh onnakma chukfushi afʋmmi ʋmmona tuklo ho̱ ish im i̱hi̱sa na, bilia hi oke.

³⁹ Chukfushi yash achʋfa ka̱ onnahinlikma ish im issa tukmʋt, achʋfa ya̱ opiakma ish im issashke.

⁴⁰ Micha chukfushi achʋfa ka̱ bota tohbi kʋshkoa ishit pokoli ho̱ boa na bila toba hin achʋfa kʋshkoa ai ushta ho̱ ittaiyomi, micha nanishko im issa ya̱ okapa̱ki hin achʋfa kʋshkoa aiushta ho̱ ish im issashke.

⁴¹ Micha chukfushi achʋfa ya̱ na‐balama, micha luak ishit hukmit Chihowah im issa mak o̱ onnahinli ya̱ ilhpak im issa yash, micha ishko im issa ya tuk mak o̱ chohmichit ish yʋmihchashke.

⁴² Ilʋppʋt hʋchim ai itishali moma ka̱ hukmit im issa bilia yo̱ Chihowah itikba okla moma im ʋlhtipo okhissa ya̱ a yʋmohma hi oke; yʋmmak o̱ a hʋchi itafamʋt, yʋmmak o̱ a chim anumpule la hi oke.

⁴³ Micha yʋmmak o̱ Islael im ʋlla ʋhleha ha̱ ai itafama la hi oke, mikma ʋlhtipo hʋt ʋm ai isht aholitopa ak o̱ ishit kashofa hi oke.

⁴⁴ Micha okla moma im ʋlhtipo, micha alta aiena ka̱ kashofi la hi oke; micha Alon, micha ushi ʋhleha hak kia naholitopa isht ai ʋtta ya̱ isht ʋm a̱ha̱shwa chi̱ ka̱ hullochi la chi̱ hoke.

⁴⁵ Micha Islael im ʋlla ʋhleha ha̱ itin takla ya̱ ahanta lish in Chitokaka sia ha chi̱ hoke.

⁴⁶ Mikma ʋno ak osh in Chitokaka Chihowah sia, atuk osh itin takla ahanta la chi̱ hosh Echip yakni ya̱ pehlichit kohcha li tok a̱ ithaiyana chi̱ hoke. In Chitokaka Chihowah sia hoke.