Eksotʋs 28 - Chahta Holisso Holitopa 1886

¹ Micha Alon chitibapishi, micha ushi ʋhleha aiena ka̱, Islael im ʋlla ʋhleha i̱ filʋmmichit Alon, micha Natab, micha Abihu, Eliesa, micha Ihlama, Alon ushi ʋhleha aiena ka̱ ish eshi na, naholitopa isht ai ʋtta ya̱ isht ʋm aha̱shwashke.

² Micha chitibapishi Alon a̱ nafohka holitopa, micha isht aiokli ya̱ ish im ikbashke.

³ Micha hatak chu̱kʋsh hopoyuksa moma im anukfila hopoyuksa chu̱kʋsh alotoli li tuk a̱ ish im anumpuli na Alon a̱ hullochi na, na holitopa isht aiʋtta isht ʋm ahanta chi̱ ka̱ Alon a̱ nafohka im ikbashke.

⁴ Nafohka ilʋppa puta kak o̱ ikbashke, ikkishi alata, micha efot, micha nafohka holitopa, micha i̱ fullota a̱sha nafohka, micha iahlipa, micha ʋskofʋchi, aiena hashke; micha chitibapishi Alon, micha ushi ʋhleha aiena ka, nafohka holitopa im ikbi na, naholitompa isht aiʋtta ya̱ isht ʋm a̱ha̱shwashke.

⁵ Micha tʋli holisso lakna micha okchʋmali, micha hummaii, micha tishepa micha linen tapʋski itapʋna aiena ho̱ ishashke.

⁶ Micha efot a̱ tʋli holisso lakna, okchʋmali, hummaii, tishepa, micha linen tapʋski yo̱ ishtatoba toksʋli imponna yo̱ ikbashke.

⁷ Tahchi abana tuklo cha, aiʋhli tuklo ka̱ ai itachakashke, yohmi hosh itachakashke.

⁸ Mikma ʋskofʋchi inla efot a̱ atakali kʋt yʋmmakinli isht ʋlhtaha ya̱ chohmit tʋli lakna, okchʋmali, micha hummaii, micha tishepa, micha linen tapʋski itapʋna yashke.

⁹ Micha oniks tʋli tuklo ho̱ ish eshi cha, Islael im ʋlla ʋhleha hohchifo ka̱ in chunlit ish lapalechashke.

¹⁰ Hohchifo hannali ka̱ tʋli achʋfa ka̱ ish takalichikmʋt, hohchifo inla ka̱ aiʋtta tok ʋlhpi̱sa ho̱ tʋli achʋfa ya̱ ish takalichashke.

¹¹ Tʋli in chunli yosh ikbi yo̱ ishtin chunli in chu̱wa holba ho̱ Islael im ʋlla ʋhleha hohchifo aieninchit tʋli tuklo ka̱ ish in chunlashke, tʋli lakna ashamʋlli a̱sha yo̱ ish ontalohlashke.

¹² Micha efot tahchi ak o̱ tʋli tuklo kash ish ontalohlashke; Islael ʋt tʋli nan isht ithaiyana na bilia yashke; mikma nan isht ithaiyana he mak o̱, Alon ʋt Chihowah itikba ya̱ tahchi ʋbanalit hikiashke.

¹³ Micha tʋli holisso lakna ashamʋlli ya̱ ish ikbashke.

¹⁴ Micha ont ʋhli ka̱ tʋli lakna bano itachahkʋchi tuklo ho̱ ish ikbashke, i̱ poshota ʋlhtaha ho̱ ish ikbi cha, i̱ poshota itachahkʋchi yash ashamʋlli ya̱ ish takalichashke.

¹⁵ Tʋli imponna yosh ikbi yo̱ nan isht apesa ikkishi alata ish ikbashke, efot toba ak o̱ holba ho̱ ish ikbashke; tʋli holisso lakna, nan okchʋmali, hummaii, micha tishepa, micha lineu tapʋski itapana yo̱ isht ish ikbashke.

¹⁶ Pohloma hosh tahchaka ushta kʋt iti laui banashke, falaia kʋt span achʋfakma, auata kʋt span achʋfashke.

¹⁷ Micha tʋli ontʋla tʋli itiakaiya ushta ho̱ ish ontalalashke, itiakaiya ʋmmona satis, topas, micha kabʋnkel, ilʋppak osh itiakaiya ʋmmona hashke.

¹⁸ Mikma itiakaiya atukla kʋt emelal, micha saffai, micha taimont ashke.

¹⁹ Mikma itiakaiya ont atuchina kʋt likua, micha akat, micha amihlist ashke.

²⁰ Mikma itiakaiya ont aiushta kʋt belil, micha oniks, micha chashpa ashke, tʋli lakna afohka ai ontʋlashke.

²¹ Mikma tʋli ʋt Islael im ʋlla ʋhleha hohchifo lapohli hashke, hohchifo ha̱, ʋlhpi̱sʋt auahtuklo hosh isht in chu̱wa in chu̱wa ka̱ chohmi hashke, moyuma kʋt apehlichi auahtuklo ʋlhpi̱sa ho̱ hohchifo hosh lapohli hashke.

²² Micha tʋli holisso lakna bano ho̱ im poshota toba yo̱ ikkishi alata ont ʋhli ka̱ itachakʋchi ish ikbashke.

²³ Micha tʋli holisso lakna chʋnaha tuklo ikkishi alata ya̱ ish ikbashke, mikmʋt chʋnaha tuklo ya̱ ikkishi alata ont ʋhli tuklo ka̱ ish atakolichashke.

²⁴ Micha tʋli holisso lakna itapakshʋna itʋchakʋchi tuklo ka̱ ikkishi alata ont ʋhli ka̱ tʋli holisso lakna chʋnaha tuklo ya̱ ish atakohlichashke:

²⁵ Micha itapakshʋna itachakʋchi tuklo kash wishakchi tuklo ka̱ ashamʋlli tuklo ya̱ ish a kʋllochi cha, itikba takali efot in tahchi abana ya̱ ish abanalashke.

²⁶ Micha tʋli holisso lakna chʋnaha tuklo ho̱ ish ikbashke; micha ikkishi alata chukbi tuklo aiʋhli yʋmma efot anu̱kaka takali okhowataka ya̱ ish takohlichashke.

²⁷ Micha tʋli holisso lakna chʋnaha tuklo inla ya̱ ish ikbi cha, efot aka pilla okhowata tuklo itikba takali pilla efot im ʋskofʋchi pisa inla ya̱ paknaka isht itachaka ya̱ in chapaka ak o̱ ish talohlichashke.

²⁸ Mikma ikkishi alata ya̱ chʋnaha ya̱ efot in chʋnaha ak o̱ sita okchʋmali yo̱ isht ish itatakchichi na, efot im ʋskofʋchi pisa inla ya̱ paknaka takalashke, micha ikkishi alata ʋt efot a̱ ik i̱ mokofo kashke.

²⁹ Mikma Alon ʋt Islael im ʋlla ʋhleha hohchifo hʋt afoyuka ho̱ aholitopa ya̱ chukowakmʋt Chihowah yʋt isht ithaiyana bilia chi̱ ka̱ nanisht apesa ikkishi alata ya̱ chu̱kʋsh alatali hosh iba chukowashke.

³⁰ Micha nanisht apesa ikkishi alata ya̱ Ulim micha Hlummim a̱ ish fohkashke; atukma Alon ʋt chukowʋt Chihowah itikba onakmʋt chu̱kʋsh a̱ onochit shaiyalashke, micha Islael im ʋlla ʋhleha nan im aiʋlhpiesa ya̱ Alon ʋt chu̱kʋsh onochit shaiyalit Chihowah itikba hikia na biliashke.

³¹ Micha efot nafohka falaia holitopa ya̱ okchʋmali bieka ho̱ ish ikbashke.

³² Mikma paknaka iklʋnna ya̱ chiluk ʋt hikiashke, mikma chiluk a̱ nantʋnna yosh i̱ fullotʋt apakfoyupa kʋt tʋnʋp ilefohka ak o̱ chohmi na ik hlilafo kashke.

³³ Micha aka pilla ʋhli ya̱ pomkilanit okchʋmali, micha hummaii, micha tishepa yo̱ ʋhli fullota ish ikbashke, mikma tʋlula tʋli holisso lakna itin takla ya̱ takohlit fullotashke.

³⁴ Nafohka falaia holitopa aiʋhli fullota ka̱ tʋlula tʋli holisso lakna, mikma pomkilanit, tʋlula tʋli holisso lakna, mikma pomkilanit osh takalit iashke.

³⁵ Mikma Alon ʋt nan isht im ʋtta ma onʋtoyulashke: atukma aholitopa ya̱ chukowʋt Chihowah itikba ya̱ o nakma, atuk osh kohchakma, ohonla haklo na ik illo kashke.

³⁶ Micha tʋli holisso lakna bano patʋssa ish ikbi cha, isht in chu̱wa in chu̱wa ya̱ chohmi ho̱ in chunlit Chihowah im I holitopa hoke, achit ish takalichashke.

³⁷ Mikma sita okchʋmali ya̱ ish lapalechi na iahlipa ha̱ ontalaiashke, iahlipa itikba ak o̱ ontalaiashke.

³⁸ Mikma Alon noshkobo ha̱ on talaia na, na habenʋchi holitopa moma Islael im ʋlla ʋhleha hʋt hullochi tuk, naholitopa aiashʋchi puta ka̱ Alon ʋt shaiyalashke: micha Alon noshkobo ha̱ on talaia na, biliashke, yʋmohmi ho̱ Chihowah yʋt aiokpʋchashke.

³⁹ Micha linen tapʋski nafohka aiokli ho̱ achunlit ish ikbashke, micha iahlipa ha̱ linen tapʋski o̱ ish ikbashke, micha chufakushi isht ʋlhtaha ho̱ ʋskofʋchi a̱ ish ikbashke.

⁴⁰ Micha Alon ushi ʋhleha ha̱ ilefoka lumbo ish im ikbashke, micha ishit holitopa ya̱, micha pisa aiokli a̱ ʋskofʋchi ish im ikbikmʋt shapo ya̱ ish im ikbashke.

⁴¹ Micha chitibapishi Alon, micha ushi ʋhleha aiena ka̱ ish fohkʋchechashke, micha bila isht ish ahʋmmashke, micha i̱ hullochit ish kashofashke; yʋmohmi na naholitompa isht aiʋtta ya̱ isht ʋm aha̱shwashke.

⁴² Micha isht il ompohoma chi̱ ka̱ linen obalafoka ya̱ ish im ikbashke, hʋtip a̱ ʋttʋt iakmʋt iyubi ont ʋhlashke.

⁴³ Mikma Alon micha ushi ʋhleha aiena kʋt okla moma im ʋlhtipo ant chukowakmʋt, keyukmʋt aholitopa nan isht ai ʋtta chi̱ hosh alta ya̱ bili̱ka onakmʋt, foyukashke; yʋmohmi hosh nan ashʋchi onʋtoyulʋt ik illo kashke. I̱ nan ʋlhpisa bilia yosh im isht atiaka yʋt iaka̱ya aiena kʋt in toyulashke.