Eksotʋs 25 - Chahta Holisso Holitopa 1886

¹ Mihma Chihowah yʋt Moses a̱ im anumpulit,

² Islael im ʋlla ʋhleha ha̱ ish im anumpuli na, nan im issa isht ʋm ʋlashke; hatak moma chu̱kʋsh aiokpanchit bohli ka̱ nan im issa ya̱ is sʋm eshashke.

³ Micha nan im issa ilʋppak o̱ hʋsh im ai ishashke, tʋli holisso lakna, micha tʋli hʋta, micha asonak lakna,

⁴ Micha okchʋmali, micha humakbi, micha tishepa, micha linen lapushki, micha issi kosoma hishi,

⁵ Micha chukfi nakni hakshup humma, micha bacha hakshup, micha shittim iti,

⁶ Pʋla ha chi̱ ka̱ bila, bila ishtahama ya chi̱ ka̱, micha nabalama ya chi̱ ka̱ na balama puta,

⁷ Oniks tʋli, micha efot, micha ikkishi alata, ontaloha chi̱ ka̱ tʋli ak ashke.

⁸ Micha ʋlhtipo holitopa ʋm ikbi na, takla ahanta lashke.

⁹ Ʋlhtipo holba ya̱, micha ishit toksʋli chi pisachi le tuk, moma ka̱ iakaiya hosh, yohmi fehna ho̱ hobachit ish ikbashke.

¹⁰ Mikma shittim iti yo̱ itombi holitopa ya̱ ikbashke, falaia kʋt kubit tuklo micha iklʋnna, micha auahta kʋt kubit achʋfa cha iklʋnna, micha chaha kʋt kubit achʋfa cha iklʋnnashke.

¹¹ Micha anu̱ka, micha kucha aiena ka̱ tʋli holisso lakna a̱hli yo̱ ish lapalechashke; micha tʋli holisso lakna afohoma isht apakfoyupa chi̱ ka̱ ish ai ikbashke.

¹² Micha tʋli holisso lakna chʋnaha bilelit akmochit chukbi ushta ka̱ ish atakalichashke; micha in tʋnnʋp achʋfa ka̱ chʋnaha tuklo hosh takohlashke; mikma in tʋnnʋp achʋfa ka̱ chʋnaha tuklo hosh takohlashke.

¹³ Micha shittim iti yo̱ tʋli ish ikbi cha, tʋli lakna lapalachit ish tahlashke.

¹⁴ Micha tʋli ya̱ chʋnaha yash itombi holitopa in tʋnnʋp bi̱ka ya̱ ish apittashke; yʋmohmi ho̱ itombi holitopa ya ishit sholashke.

¹⁵ Tʋbi ʋt itombi chʋnaha ya̱ aiʋlhta hi oke; kocha wiha he keyu hoke.

¹⁶ Micha itombi holitopa ya̱ nan atokowa chima la chi̱ ka̱ ish fohkashke.

¹⁷ Micha tʋli lakna bano ho̱ im ai i̱ kanʋt aiombinili ya̱ isht ish ikbashke: falaia kʋt kubit tuklo cha iklʋnna aienakmʋt, auahta kʋt kubit achʋfa cha, iklʋnna aienashke.

¹⁸ Micha tʋli holisso lakna yo̱ Chilubim tuklo ho̱ isht ish ikbashke; boʋt toba ho̱ ish ikbi cha, im ai i̱ kanʋt aiombinili ʋhli tuklo ka̱ ish hiohlechashke.

¹⁹ Micha chelub achʋfa ka̱ ʋhli achʋfa ka̱ ish hilechikmʋt, chelub achʋfa ya̱ ʋhli achʋfa ya̱ ish hilechashke: im ai i̱ kanʋt aiombinli ʋhli tuklo fehna kak o̱ chelubim ish ikbashke.

²⁰ Mikma chelubim ʋt sanahchi ya̱ ashatʋblichit ʋba wielit, sanahchi ya̱ im ai i̱ kanʋt aiombinili ya̱ isht ai ompohomashke; mikma nashuka ʋt iti̱ sanalashke, im ai i̱ kanʋt aiombinili ya̱ chelubim nashuka ʋt pit talaiashke.

²¹ Micha im ai i̱ kanʋt aiombinili ya̱ itombi holitopa paknaka ish ontalalashke, micha itombi holitopa ya̱ nan atokowa chima la chi̱ ka̱ ish fohkashke.

²² Mikma im ai i kanʋt aiombinili paknaka chelubim tuklo kʋt nanʋlhpisa afohka itombi holitopa paknaka a hieli ka̱ itin takla ya̱ yʋmma chi ai afamʋt nana moma anumpa ʋlhpisa ha̱ Islael im ʋlla ʋhleha imma ho̱ chima la chi̱kmʋt chitim anumpule lachi̱ hoke.

²³ Shittim iti yo̱ patʋssa ish ikbashke, falaia kʋt kubit tuklo, auahta kʋt kubit achʋfa, chaha kʋt kubit achʋfa cha, iklʋnna hashke.

²⁴ Micha tʋli holisso lakna bano ho̱ ish lapalechashke, micha tʋli holisso lakna yo̱ ʋhli i̱ fullota ikbit ish apakfoyublashke.

²⁵ Micha im aiʋhli apakfoyupa kʋt ibbak pʋtha achʋfa ho̱ ish ikbi cha, ʋhli i̱ fullota yash tʋli lakna yo̱ i̱ fullota apakfoyupa ish ikbashke.

²⁶ Micha tʋli holisso lakna chʋnaha ushta ho̱ ish ikbi cha, chukbi ushta iyi ushta ai o̱ hikia ka̱ ish talohlichashke.

²⁷ Ʋhli yo̱ bili̱ka yo̱ chʋnaha hʋt takohlikma, tʋbi ʋt shamʋlli ho̱ patʋssa yash ishit sholashke.

²⁸ Micha tʋbi shittim iti yo̱ ish ikbi cha, tʋli holisso lakna ish lapalechashke, yʋmohmi ho̱ patʋssa ya̱ ishit sholashke.

²⁹ Micha im ampo, im ishtimpa, im isht ompoholmo, micha nan isht impʋchi nana isht tosholi aiena a puta ka̱ ish ikbashke, tʋli lakna bano ho̱ ish ikbashke.

³⁰ Micha sa tikba ya̱ pʋska otʋni a̱ patʋssa ya̱ is sʋm on talali na a biliashke.

³¹ Micha tʋli holisso lakna bano ho̱ pʋla aio̱hikia ish ikbashke: boʋt toba ho̱ pʋla aio̱hikia ish ikbashke, im ʋpi, micha i̱ naksish puta micha i̱ kibikshi, micha in luboa, micha i̱ napakanli yʋmmak in lashke.

³² Mikma tahlakla̱ka ya̱ naksish tuchina hosh akohchashke, pʋla aio̱hikia in tʋnnʋp achʋfa ka̱ naksish tuchina hosh akohchakma, pʋla aio̱ hikia in tʋnnʋp achʋfa ya̱ naksish tuchina hosh akohchashke.

³³ Naksish achʋfa ka̱ almont holbʋt toba hosh kibikshi tuchina, luboa achʋfa, pakanli achʋfashke, micha naksish achʋfa ya̱ almont holbʋt toba kibikshi tuchina, micha luboa achʋfa, micha napakanli achʋfashke; micha pʋla aio̱hikia naksish kohcha hannali ka̱ yohmashke.

³⁴ Micha pʋla aio̱hikia ya̱ i̱ kibikshi ʋt almont holbʋt toba ushta hosh in luboa, micha i̱ napakanli aiena hi oke.

³⁵ Mikma yʋmmak inli ka̱ naksish tuklo nutaka ya̱ lumbo achʋfa, micha yʋmmak inli ka̱ naksish tuklo nutaka ya̱ lumbo achʋfa, micha yʋmmak inli ka̱ naksish nutaka̱ ya̱ lumbo achʋfa, pʋla aio̱hikia naksish hannali akohcha ya̱ ʋlhpi̱sashke.

³⁶ In lumboa, micha i̱ naksish puta kʋt yʋmmak inlashke; moma kʋt tʋli holisso lakna bano hosh boʋt tobashke.

³⁷ Micha pʋla aiʋlhto untuklo ka̱ ish ikbashke; mikma okla pʋlali na, itikba ya̱ tohwikela hi oke.

³⁸ Mikma ishit kiselichi, micha pʋla wishakchi tʋptua aiʋlhto ʋt tʋli holisso lakna banashke.

³⁹ Tʋli holisso lakna talent achʋfa ho̱ yʋmma, nan aiʋlhto ilʋppa puta ka̱ aieninchit ikbashke.

⁴⁰ Mikma ahah ish ahni cha, holbʋt toba he ya̱ nʋnih paknaka a chi pisachi le tuk a̱ hobachit ish ikbashke.