Eksotʋs 24 - Chahta Holisso Holitopa 1886

¹ Micha Moses a̱, Chishno micha Alon, Natab, micha Abihu, micha Islael im asʋnonchi pokoli untuklo aienʋt Chihowah ya̱ oiyʋt hʋsh im ʋlashke: micha hopaki ho̱ hielit hʋsh aiokpʋchashke.

² Mikma Moses ak illa hosh Chihowah ya̱ bili̱ka ona chi̱ hoke: amba yʋmmak okʋto bili̱ka ona he keyu, micha okla hʋt apehʋt oiya he keyu, im achi tok.

³ Mihma Moses ʋt ʋla cha, Chihowah im anumpa ilʋppa moma ka̱, micha nan isht apesa ilʋppa moma ka̱ okla ha̱ im anoli tok; mihma okla moma kʋt anumpa achʋfʋt afalamichit, Anumpa moma Chihowah yʋt achi tuk mak o̱ e yʋmihcha chi̱ hoke, achi tok.

⁴ Mihma Moses ʋt Chihowah im anumpa moma ka̱ holissochi tok, atuk osh onnahinli fehna wakaya cha, nʋnih nutaka ya̱ alta, micha Islael apehlichi auahtuklo ʋlhpi̱sa ho̱ toni̱k auahtuklo ikbi tok.

⁵ Mihmʋt Islael im ʋlla ʋhleha hatak himithoa ya̱ pila na, yʋmmak ash osh hukmit ishtaiokpʋchi, micha iti̱ nanaya yosh isht aiokpʋchi aiena wak ʋbit onochit Chihowah ya̱ im issa tok.

⁶ Mihma Moses ʋt issish a̱ iklʋnna ho̱ ishi ch, ampoa mahaia ʋni tok, mihmʋt issish a̱ iklʋnna alta yash o̱ fimmi tok.

⁷ Mihmʋt nan itim apesa holisso ha̱ eshi cha, okla hʋt ha̱klo ho̱ itim anumpuli tok; mihma okla hʋt, Chihowah yʋt achi tuk, moma kak o̱ e yʋmihcha chi̱ hoke, micha il im antia chi̱ hoke, achi tok.

⁸ Mihma Moses ʋt issish ash eshi cha, okla ha̱ o̱ fiimmi mʋt, Yakeh, nan itim apesa issish, Chihowah yʋt anumpa ilʋppa puta ka̱ isht hʋchitim apesa tuk mak oke, achi tok.

⁹ Yohmi ma Moses, micha Alon, Natab, micha Abihu, micha Islael im asononchi pokoli untuklo aienʋt oiya tok.

¹⁰ Micha Islael in Chitokaka ya̱ pisa tok; micha iyi nuta ya̱ saffai tʋli yosh a patʋlhpo ha tok, micha shohkauali kʋt shutik fehna kak o̱ chohmi tok.

¹¹ Mihma Islael im ʋlla ʋhleha i̱ holitopa ʋhleha ha̱ ibbak ik onocho tok: yʋmmak kia Chitokaka ya̱ pisa mʋt, impʋt nan ishko tok.

¹² Mihma Chihowah yʋt Moses a̱, Nʋnih ha̱ oiyʋt is sʋm ʋlashke, micha yʋmmak o̱ ish antashke, mikma nanʋlhpisa, micha anumpa ʋlhpisa holissochi li tuk ʋt tʋli patʋssa chima lashke; yʋmohmi ka̱ ish im abʋchashke, im achi tok.

¹³ Mihma Moses micha in tishu Choshua ʋt wakaya tok; mihma Moses ʋt Chitokaka i̱ nʋnih ha̱ oiya tok.

¹⁴ Micha asʋnonchi ʋhleha ha̱, A̱shʋt hʋsh pi hoyo tuk o̱, anonti e chim ʋlashke; mikma yakeh, Alon, micha Hu ʋt hʋsh apehʋshke, hatak kʋna kia nana a yʋmihcha he ʋt im a̱shakmʋt, yʋmmak o̱ im ʋlashke, im achi tok.

¹⁵ Mihmʋt Moses ʋt nʋnih ha̱ oiya tok, mihma hoshonti ʋt nʋnih ha̱ ompoholmo tok.

¹⁶ Mihma Chihowah im a holitopa ʋt Sinai nʋnih ha̱ on talaia ma, hoshonti hʋt ompoholmo na, nitak hannali tok; atuk osh nitak isht untuklo ma Moses a̱ hoshonti iklʋnna ai i̱ howa tok.

¹⁷ Mihma Chihowah im a holitopa pisa ka̱ Islael im ʋlla ʋhleha hʋt pi̱sa ho̱ luak nahukmit tahli ak o̱ chohmi hosh nʋnih paknaka talaia tok.

¹⁸ Mihma Moses ʋt iʋt hoshonti iklʋnna ka̱ ibachukowʋt nʋnih ha̱ oiya tok; micha Moses ʋt nʋnih ha̱ ahanta na, nitak pokoli ushta micha ninak pokoli ushta tok.