Eksotʋs 23 - Chahta Holisso Holitopa 1886

¹ Anumpa ik a̱hlo ya̱ ish aiokpʋcha he keyu; hatak yoshuba chibbak isht ish iba potolit ai ʋlhpesa keyu atokoli chik tobo kashke.

² Okla la̱wa ya̱ iakaiyʋt nana ik achukmo ish yʋmihcha he keyu; micha laua kʋt nan aiʋlhpesa yʋmihchi ya̱ shanaiyacha chi̱ ka̱ iakaiyʋt ish anumpula he keyu hoke.

³ Micha ilbʋsha yoh kia anumpa in takalikma, shanaiyʋt ish apelʋcha he keyu hoke.

⁴ Chi̱ tʋnʋp i̱ wak, keyukmʋt im issuba nashoba ʋt kʋniʋt a̱yakma, ish afamakmʋt, anonti falaminchit isht ish im ona pulla hi oke.

⁵ Chi̱ nukkilli im issuba nashoba ʋt i̱ shapoh nuta hlipia na, ish pisakmʋt apelʋchi ik chi bʋnno hoh kia ish apelʋchi pulla hi oke.

⁶ Chim ilbʋsha ʋt nan ʋm ʋlhpesa̱ ka̱ ish shanaiyʋcha he keyu hoke.

⁷ Nana a̱hli keyu ka̱ i̱ hopakʋchit ish hikiashke; micha nan okpʋni keyu, micha aiʋlhpesa ya̱ chik bo kashke; yoshuba ya̱ i̱ kashofa la he keyu hoke.

⁸ Micha nahʋlbina ya̱ ish isha he keyu hoke; nahʋlbina yʋt hopoyuksa nishkin lʋblichi, micha aiʋlhpiesa im anumpa ha̱ shanaiyʋchi yoke.

⁹ Micha okla inla ya̱ ish ilbʋshala he keyu: Echip yakni okla inla yosh hʋsh aiasha tuk osh okla inla chu̱kʋsh a̱ ish ithana hokʋt.

¹⁰ Micha afʋmmi hannali ho̱ chi̱ yakni ya̱ ish hokchi cha, na waya ya̱ ish ai ʋmashke.

¹¹ Amba afʋmmi ont ishtuntuklo hokʋno, fohʋt lumʋt itoyulashke; yʋmohmi ho̱ chim okla ilbʋsha yʋt ai ʋpashke; atuk o̱ ashanchi na, nampoa oktak aiasha ak osh ʋpashke. Pa̱kʋpi chim ahollokchi, micha alif chim ahollokchi aiena yʋmmak inli ish chohmichashke.

¹² Nitak hannali ho̱ chi̱ pilesa ha̱ ish yʋmihchashke; atuk osh nitak isht untuklo ka̱ ish fohashke; yʋmohmi ho̱ chi̱ wak, micha chim issuba nashoba, micha chi̱ yuka ohoyo ushi, micha okla inla aiena kʋt fohashke.

¹³ Nana moma hʋchim ahanchi li tuk a̱, ahah, hʋsh ai ahnashke; micha naholbʋt toba hohchifo ha̱ hʋchik anolo kashke, micha chitʋkha a kohcha na ik haklo kashke.

¹⁴ Afʋmmi achʋfakma, hituchina ha impʋchi isht is sʋm a̱sha hi oke.

¹⁵ Pʋska ik shatʋmmo impʋchi isht hʋsh a̱sha hi oke, hʋshi Abib ʋlhpisa hi a̱ chim apesa li tuk mak o̱, nitak untuklo ho̱ pʋska ik shatʋmmo ish pa hi oke: hʋshi yʋmma Echip a̱ ish kohcha tok okʋt; achʋfa kia nan iksho ho̱ sa tikba ya̱ hikia he keyu hoke.

¹⁶ Micha hʋsh toksʋli osapa ya̱ nana ish hokchi tukma nawaya ʋmmona ʋmo impʋchi, micha nahoyo impʋchi, afʋmmi ont tahakma osapa ish atoksʋli tuk ʋt na ish hoyokmʋt isht hʋsh a̱sha hi oke.

¹⁷ Afʋmmi achʋfakma hituchina ha nakni yosh hʋchim aiasha moma kʋt Chihowah Chitokaka itikba ya̱ hiela hi oke.

¹⁸ Ʋbit ishit ʋm aiokpʋchi issish a̱ pʋska shatʋmmi ya̱ aieninchit is sʋm issa he keyu hoke; micha ʋbit isht ʋm aiokpʋchi nia ʋt a̱sha na onna he keyu hoke.

¹⁹ Chi̱ yakni awaya ʋmmona ti̱kba yo̱ Chihowah chin Chitokaka im aboha ya̱ isht ish ona hi oke. Issi kosoma ushi yo̱ ishki i̱ pishukchi a̱ isht ish honna he keyu hoke.

²⁰ Yakeh, ai atahli le tuk ʋt chisht ala la chi̱, hina chi fohkit chisht a̱ya chi̱ ka̱ enchel o̱ chitikba et hilechi li tok.

²¹ Ahah ish im ahni cha, im anumpa im antiʋt, chik nukowacho kashke, na hʋchi̱ yoshuba ya̱ chi̱ kashofa he keyu; sa hohchifo kʋt iba foyuka hoka.

²² Amba im anumpa ha̱ ish im antia cha, anumpohonli li moma ka̱ ish yʋmihchi ho̱ mʋhlikma, chin tʋnʋp ʋhleha ha̱ in tʋnʋp sia ha he; micha chi̱ sanali ʋhleha ha̱ i̱ sanali sia ha hi oke.

²³ Ʋm enchel ʋt chi tikba ia cha, Amolait, micha Hittait, micha Pelissait, micha Kananait, micha Hifait, micha Chebusait aiena aiasha ka̱ chisht onakma, ai ishit kanchi la hi oke.

²⁴ I̱ naholbʋt toba puta ish im akahchunola he keyu, micha ish im antia he keyu, micha nana atoksʋli ya̱ iakaiyʋt ish yʋmihcha he keyu hoke; amba hʋsh akʋchit hʋsh ʋmohmichi cha, i̱ nan in chu̱wa ya̱ kinahlichit ish kaiyancha hi oke.

²⁵ Micha Chihowah hʋchin Chitokaka ya̱ hʋsh im antia hi oke; mikma hʋchi̱ pʋska, micha hʋchim oka hʋchim apaknʋcha hi oke; mikma ʋno ʋt hʋchim itin takla ya̱ abeka ha̱ ai isht kanchi la hi oke.

²⁶ Nana kia hʋchi̱ yakni a̱sha kʋt ushi kanchi, micha ushi iksho kʋt iksho ka hi oke, chi̱ nitak holhtina ka̱ onanchi la hi oke.

²⁷ An nukshopa ka̱ chi tikba ya̱ pila likmʋt, okla moma ish im ona ka̱ ishit kanchi la chi̱ hoke; micha chin tʋnʋp moma ka̱ chi̱ filʋmmichi la hi oke.

²⁸ Micha fohkʋt puta ka̱ chitikba ya̱ pila likma, Hifait, Kananait, micha Hittait chi tikba tihlela chi̱ hoke.

²⁹ Afʋmmi achʋfa ho̱ chi tikba tihlelit kohchi la he keyu; yohmi na yakni ʋt chukillissakma, nampoa hʋt apaknʋt chi̱ sanala hinla hoke.

³⁰ Kanomosi anonti kanomosi ho̱ chi tikba tihlelit ko̱honchi likma, ish apaknʋt yakni ya̱ ish a binila hi oke.

³¹ Micha chim aiʋhli ya̱ okhʋta Humma ʋttʋt ia hosh Filistin im okhʋta ont ʋhli, micha chokushmi ʋttʋt ia hosh okhina ont ʋhli kak o̱, ʋhlichit apesa la hi oke; yakni ya̱ okla aiasha ka̱ chibbak fohki la chi̱ hoke; mikma chi tikba tihlelit ish kohcha hi oke.

³² Yʋmma, micha i̱ naholbʋt toba puta ka̱ nana ish itim apesa he keyu hoke.

³³ Chi̱ yakni ya̱ aiasha he keyu a̱, chi yoshublicha hinla hoka; i̱ naholbʋt toba ya̱ ish im antiakma ishit chi yoshuba chi̱ pulla hoke im achi tok.