Eksotʋs 22 - Chahta Holisso Holitopa 1886

¹ Hatak osh wak, keyukmʋt chukfi yo̱ hu̱kopa cha ʋbi, keyukmʋt kanchikmʋt, wak atukma wak tahlapi, chukfi yatukma chukfi ushta ho̱ falʋmmichit atobbashke.

² Hu̱kupa ʋt tiʋbli hosh anta na, pisa cha isso tuk o̱ illikma, yʋmmak okʋno ʋlhtobʋt issish ʋt hlatapa he keyu hoke.

³ Hʋshi ʋt kohchʋt on tommi ha yokmʋno ʋlhtobʋt issish hlatapa hi oke, mominchit atobba he tuk oka; nana ik im ikshokma, hu̱kupa tuk ak o̱ kanchashke.

⁴ Nana hu̱kupa tuk ʋt okcha̱ya moma hosh wak, keyukmʋt issuba nashoba, keyukmʋt chukfi yokmá nana hosh ibbak fo̱hkʋt haiaka a̱hlikma, inlohmi tuklo ho̱ atobba hi oke.

⁵ Hatak osh osapa, keyukmʋt pa̱kʋpi ahollokchi yo̱ ai impʋchi, micha i̱ nanʋlhpoa ya̱ hatak inla im osapa yo̱ fohkit ai impʋchikmʋt, im osapa achukma moma i̱ shahli, micha pa̱kʋpi im ahollokchi achukma moma i̱ shahli ho̱ isht atobba hi oke.

⁶ Luak ʋt toba cha, kʋti ha̱ lapali na, onush talakchi, keyukmʋt onush hikia ʋt, keyukmʋt osapa ʋt luʋt tahakma, luak tikelichi tuk ʋt atobbi pulla hi oke.

⁷ Hatak osh chuka a bili̱ka hatak o̱ tʋli holisso, keyukmʋt nachukushpa yo̱ im i̱sha chi̱ ka̱ ibbak fohki tuk o̱, kʋna hosh hu̱kopʋt hatak ash in chuka ya̱ ai ishit kohcha tuk osh hu̱kopa ʋt haiakakmʋt inlohmi tuklo ho̱ atobbashke.

⁸ Hu̱kopa tuk ʋt ik haiakokma, chuka yash i̱ shahli ya̱, yʋmmak osh in chuka abili̱ka i̱ nachukushpa ya̱ potoli tuk oh chishba, ahnit nan apesa ʋhleha ha̱ itikba isht onashke.

⁹ Anumpa kobʋffi moma wak a tuk, issuba nashoba atuk okma, chukfi, nafohka, keyukmʋt nana kʋnia, nana kia inla hosh immi mihakma, anumpa ahalaia in tʋnnʋp bi̱ka kʋt nan apesa ʋhleha ha̱ itikba onashke: atuk o̱ kanima ho̱ nan apesa ʋhleha hʋt onochikma in chuka abili̱ka hatak a̱ inlohmi tuklo ho̱ atobbashke.

¹⁰ Hatak osh in chuka abili̱ka hatak osh im i̱sha chi̱ ho̱, im issuba nashoba, keyukmʋt wak, keyukmʋt chukfi, keyukmʋt nanʋlhpoa nana kia ibbak fohki tuk o̱, kʋna hosh pi̱sa keyu ho̱ illi, keyukmʋt im omokpulo, keyukmʋt tihlelit kanima isht ia tukma.

¹¹ Yohmikma in chuka abili̱ka hatak im ʋlhpoyak a̱ ik potolo tuk ʋt Chihowah ya̱ anumpa kʋllo im il onochi ya̱ ita tuklot ashwa ma anumpulashke: mikma immi yatuk ʋt ʋlhpesa ahni na, ik atobbo kashke.

¹² Micha i̱ hu̱kopa tuk okmʋt immi ya̱ im atobba hi oke.

¹³ Nana hosh niblit tahli tuk okma, isht atokowa ya̱ isht ʋlashke, mikma nipʋt taha tuk ano atobba he keyu hoke.

¹⁴ Micha hatak osh in chuka abili̱ka hatak o̱ nana ho̱ im a pota tuk o̱ immi hʋt awant a̱ya keyu ho̱ aiokpuloka, keyukmʋt illikma, atobbi pulla hi oke.

¹⁵ Amba immi ʋt awant a̱ya hokma atobba he keyu hoke: nan ilhtohno yatuk okmʋt nana asitʋbachi̱ ha tuk oke.

¹⁶ Mikma hatak osh ohoyo himita yo̱ haksichi cha, iba tʋshki tukmʋt im atobbi cha, iba itauwayashke.

¹⁷ I̱ki ʋt ima he keyu kʋt a̱hlikma, ohoyo himita im ʋlhtoba chatuk mak o̱ tʋli holisso im atobbashke.

¹⁸ Ishtahullo ohoyo hʋt ik okcha̱yá, ish ahna he keyu hoke.

¹⁹ Kʋna hosh nanʋlhpoa ya̱ iba tʋshkikmʋt illi pulla hi oke.

²⁰ Chihowah ak illa keyu, na holbʋt toba nana kia nan ʋbit isht aiokpʋchikmʋt ishit kanchit ʋmohmicha hi oke,

²¹ Okla inla chu̱kʋsh okpʋnit ish ilbʋsha la he keyu hoke. Okla inla yosh Echip yakni hʋsh aiasha tok okʋt.

²² Ohoyo i̱ hatak illi, micha ʋlla i̱ki illi, kʋna kia hʋsh ilbʋshala he keyu hoke.

²³ Kaniohmichit hʋsh ilbʋshali na, et a̱ pa̱ha̱ya ka̱ haklo li pulla hi oke.

²⁴ Mikmʋt ʋm i̱ nukkilli ʋt libbi fehnakmʋt, bʋshpo falaia ho̱ ishit chibe la hi oke, mikma hʋchi tekchi ʋhleha hʋt i̱ hatak illi yokma, hʋchʋm ʋlla ʋhleha hʋt i̱ki illi ya hi oke.

²⁵ Ʋm okla ilbʋsha yʋt hʋchi̱ bili̱ka ahanta ka̱ tʋli holisso ish im pota hokmʋt, im atablit chelichi a̱ ish in chohma he keyu, micha chelichi ish onocha he keyu hoke.

²⁶ Chin chuka abili̱ka hatak i̱ nafohka ya̱ nan isht atoni ish im eshi tuk mʋt, hʋshi ʋt okatula takla ka̱ ibbak a̱ ish fohka hi oke.

²⁷ Yʋmmak illa ho̱ anchi yatuk oke; haknip alata yatuk oke, nanta ho̱ fohkʋt nusa chi̱ cho? atukma yakohma hi oke, a̱ pa̱ha̱yakma, haklo la hi oke, nan i̱kana sia hokʋt.

²⁸ Chitokaka ʋhleha ha̱ ishit yopomot ish anumpula he keyu; micha chim okla i̱ mi̱ko ya kalakshichit isht ish anumpula he keyu hoke.

²⁹ Chi̱ na waya ʋmmona ya̱ chim oka pa̱ki, micha alif bila aiena ka̱ is sʋm issa kʋt chik achibalo kashke; chiso ʋttahpi ya̱ is sʋma hi oke.

³⁰ Chi̱ wak a̱, micha chin chukfi ya̱ yʋmmak inli ish chohmicha hi oke, Nitak untuklo ho̱ ishki ya̱ awant a̱ya hi oke; nitak ont isht untuchinakma is sʋma hi oke.

³¹ Hatak a̱ holitopa hʋchi ha chi̱ hoke, micha nanʋlhpoa ya̱ nampoa hosh oktak a̱ a nibli tuk nipi yo̱ ish pa he keyu hoke, ofi puta ka̱ ish i̱ pila hi oke.