Eksotʋs 21 - Chahta Holisso Holitopa 1886

¹ Yʋmohmi ka̱ nan ishtapesa ilʋppa puta kak o̱ itikba ya̱ ish in takali chashke.

² Heblu tishu ish chumpakma, afʋmmi hanali ho̱ chim antiashke; atukmʋt afʋmmi isht untuklo ka̱ nanʋlhtoba keyu, pilla ho̱ yuka issʋt kohchʋt ia hi oke.

³ Ilap bano hosh ʋla tukmʋt, ilap bano hosh kohcha hi oke; ohoyo im a̱sha ya tukma, tekchi ʋt awant kohcha hi oke.

⁴ I̱ shahli hʋt ohoyo ima tuk o̱, ushi ʋhleha, micha ushetik ʋhleha aiena ka̱ im eshi tukma, tekchi yash micha im ʋlla ʋhleha aiena kʋto i̱ shahli ak o̱ immi ha hi oke; mikma ilap bano hosh kohchʋt ia hi oke.

⁵ Atuk o̱ tishu hash osh atokolit, A̱ shahli, sa tekchi micha ʋm ʋlla ʋhleha ha̱ a̱ holitopʋshke, yuka issʋt kohchʋt ia la he keyushke, achikma,

⁶ Yohmikma i̱ shahli hʋt nan apesa ʋhleha ha̱ isht im ona hi oke; micha okhissa, keyukmʋt okhissa lapali ya̱ isht ona he ak inli hoke, mikmʋt i̱ shahli hʋt haksobish a̱ chofak ishit bahlit hlumpla hi oke, mikma in toksanli na bilia hi oke.

⁷ Micha hatak osh ushetik ʋt tishu ohoyo ya chi̱ ho̱ kanchikma, hatak tishu chohmit kohchʋt ia he keyu hoke.

⁸ I̱ shahli ilapoʋchi tuk ʋt ik ahninchokmʋt falʋmmichit ik chumpá, ahna hi oke: oklushi inla i̱ kanchi hokʋto a yʋmohma he keyu ka hi oke, ik im a̱hlo hosh yʋmihchi tuk okʋt.

⁹ Micha ushi ak o̱ im apoachi tuk okmʋt, ushetik ʋhleha akinli chohmicha hi oke.

¹⁰ Ohoyo inla ishikmʋt im ilhpak, i̱ nafohka, micha itauwaya he aiʋlhpesa ʋt ik onancho ka he keyu hoke.

¹¹ Tuchina ilʋppa i̱ yʋmihcha he keyukmʋt, tʋli holisso ʋlhtoba keyu kia pilla ho̱ kohchʋt ia hi oke.

¹² Kʋna hosh hatak a̱ isso na, illikma illi pulla hi oke.

¹³ Micha im aiehchi tuk keyu, amba Chitokaka ak osh ibbak a̱ fohki tukma, malelit ai ona ya̱ chim apesa la hi oke.

¹⁴ Amba hatak osh ilapunlʋt haksichit chuka a bili̱ka hatak o̱ ʋba chi̱ hosh im ona tukma, ʋm alta ya̱ i̱ filʋmmichit isht ish ia na, illashke.

¹⁵ Mikma kʋna hosh i̱ki micha ishki ya̱ issokmʋt illi pulla hi oke.

¹⁶ Micha kʋna hosh hatak a̱ hu̱kopa cha, kanchi tuk, keyukmʋt ibbak a̱ fo̱hkʋt haiakakma illi pulla hi oke.

¹⁷ Mikma kʋna hosh i̱ki micha ishki ya̱, kalakshichit mihachikmʋt illi pulla hi oke.

¹⁸ Mikma hatak ʋt iti̱ kʋllot ashwa tuk o̱, achʋfʋt tʋli, keyukmʋt ibbak bonullit isht isso, atuk o̱, ik illo kia in topa itoyulakma,

¹⁹ Atuk osh anonti wakaya cha, in tʋbi ieshit kohchʋt hikiki̱akma, isso tuk ʋt i̱kashofa hi oke, peh nitak i̱ kʋnia tuk ak o̱ atobba hi oke, micha hlakofichit ʋmohmicha hi oke.

²⁰ Mikma hatak osh i̱ yuka hatak, keyukmʋt i̱ yuka ohoyo yo̱ iti tʋpa isht isso tuk o̱, micha ibbak onuchi pulla ho̱ illikma, nahotopa onʋtula pulla hi oke.

²¹ Yohmi kia itonla na, nitak achʋfa, keyukmʋt nitak tuklo ona tuk okmʋno, nahotopa onʋtula he keyu hoke, in tʋli holisso ya tuk oka.

²² Hatak ʋt iti̱ kʋllo cha, ohoyo ʋlla shali yo̱ hotopali, yohmi na, ʋlla ʋt im akʋma, yohmi kia achaha̱ya kʋt ik aiokpulokma, ohoyo i̱ hatak ak osh apesʋt onochi ho̱, nahotopa onʋtula pulla hi oke, micha nan apesa ʋhleha hʋt apesa ho̱ atobba hi oke.

²³ Amba acha̱ka kʋt aiokpulokma, fiopa hatuk a̱ fiopa akinli ho̱ hʋsh abanalashke.

²⁴ Nishkin okma nishkin, noti yokma noti, ibbak okma ibbak, iyi yokma iyi,

²⁵ Hushmi yokma hushmi, nipi okpʋni yokma nipi okpʋni, fʋma hokma fʋma hashke.

²⁶ Mikma hatak osh i̱ yuka hatak, keyukmʋt i̱ yuka ohoyo yo̱ nishkin a̱ isso na, nishkin ʋt kʋniakma, nishkin atuk mak o̱ yuka issʋt ik ia, im ahnashke.

²⁷ Micha i̱ yuka hatak noti a̱, keyukmʋt i̱ yuka ohoyo noti a̱ issot kohchikma, noti atuk mak o̱ kohchʋt ik iá, im ahnashke.

²⁸ Wak ʋt hatak o̱, keyukmʋt ohoyo ho̱ bahli na, illikma wak ash osh tʋli ishit boa pulla hi oke, mikma nipi ya̱ ʋpa he keyu hoke; amba wak immi ʋto i̱ kashofa hi oke.

²⁹ Amba wak ʋt cha̱shpo ka̱ lʋpish isht bahli chatuk, mihma immi ya̱ atokolit im anoli tok atok okma, atuk o̱ ik im okhishto ho̱, hatak, keyukmʋt ohoyo ho̱ ʋbikmʋt wak ʋt tʋli ishit boa hi oke; mikma immi hʋt illi ak inla hi oke.

³⁰ Tʋli holisso atobba he yo̱ onochikma, im ilhfiopak ʋlhtoba ka̱ kaniohmi ho̱ onochi tukma atobba hi oke.

³¹ Ushi yo̱ bahli tuk okma, keyukmʋt ushetik o̱ bahli tuk okma, nan ʋlhpisa ilʋppak o̱ ai iakaiya hosh i̱ yʋmihcha hi oke.

³² Wak ʋt hatak yuka ho̱, keyukmʋt ohoyo yuka bahlikma, i̱ shahli ya̱ tʋli hʋta shekel pokoli tuchina ho̱ imakma, wak ash osh tʋli ishit boa hi oke.

³³ Micha hatak osh hichukbi a̱ tiwi, keyukmʋt hichukbi ya̱ kulli tuk osh ik ompohomo tuk o̱, wak, keyukmʋt issuba nashoba yokma nana hosh aka itolʋt fohakma,

³⁴ Hichukbi immi atuk ʋt immi yatuk ash tʋli holisso ima cha, atobba hi oke, micha nan ʋlhpoba illi ak osh immi hashke.

³⁵ Micha hatak i̱ wak ʋt inla immi ho̱ okpʋni na illikma, mikma wak okcha̱ya ka̱ kanchi cha, ʋlhtoba tuk tʋli holisso yash ita kashapashke, mikma wak illi ak kia ita kashapashke.

³⁶ Micha cha̱shpo ka̱ wak ʋt bahli chatuk a̱ ithana atuk ak osh, immi ʋt ik im okhishto tukmʋt; yohmikmʋt wak a̱ wak ak inli ho̱ atobbashke; micha illi ak osh immi hashke.