Eksotʋs 20 - Chahta Holisso Holitopa 1886

¹ Mihma Chitokaka yʋt anumpa ilʋppa moma ka̱ anumpuli tok,

² Ʋno ak osh Chin Chitokaka Chihowah sia hosh Echip yakni, micha yuka aboha ya̱ apehlichit chi kohchi li tuk oke.

³ Naholbat toba inla yʋt sa tikba chim aiasha he keyu hoke.

⁴ In chu̱wʋt naholbat toba, keyukmʋt nana kia shutik ʋba aiasha, keyukmʋt nutaka yakni aiasha, keyukmʋt yakni nutaka oka ai asha holba ya̱ ish ikba he keyu hoke.

⁵ Aka ish im akahchunoli, micha ish aiokpʋcha he keyu hoke, Chin Chitokaka Chihowah sia hʋt Chitokaka nukta̱ha̱hla sia hosh i̱ki ʋhleha nanashʋchi tuk a̱ im ʋlla ʋhleha ai itishali ont atuchina, micha ont ai ushta kia a̱ nukkilli ka̱ im a̱ya li hoke.

⁶ Micha tahlepa sipokni kia sa holitobli cha, ʋm anumpa ha̱ holitoblikma i̱ nukha̱klo li hoke.

⁷ Yʋmmakfokalechit chin Chitokaka Chihowah hohchifo ha̱ ish hochifa he keyu hoke; hohchifo ha̱ yʋmmakfokalechit hochifo tukma nan ik ashacho, Chihowah yʋt ahna he keyu hoke.

⁸ Nitak hullo nitak a̱ ish ithaiyana cha, ish holitoblashke.

⁹ Nitak hanali ish toksʋli cha, chin na toksʋli moma ka̱ ish atahlashke.

¹⁰ Amba nitak ont isht untuklo hokʋto chin Chitokaka Chihowah i̱ nitak hullo yoke, yʋmmak ak o̱ toksʋli nana kia chishno, micha chisso, micha chisso‐tek chin tishu nakni, micha chin tishu ohoyo, micha chi̱ nanʋlhpoa, micha okla inla yosh chi̱ holihta okhissa anu̱kaka chi̱ hikia aiena kʋt ish yʋmihcha he keyu hoke.

¹¹ Nitak hannali ho̱ Chihowah yʋt ʋba, micha yakni, okhʋta, micha nana yʋmma aiasha moma ka̱ ikbi cha, nitak isht untuklo ka̱ foha tok oke; yʋmohmi ha tuk osh Chihowah yʋt nitak hullo nitak a̱ holitoblichi cha, hullochi tok oke.

¹² Chi̱ki, micha chishki ya̱ ish holitoblashke; yʋmohmi hosh chi̱ nitak ʋt falaia hosh yakni ya̱ Chihowah chin Chitokaka yʋt chima tok a̱ ish aiahantashke.

¹³ Kʋna kia ish bi ná.

¹⁴ Hʋsh itin luma̱ka ná.

¹⁵ Ish hu̱kopa ná.

¹⁶ Chin chuka a bili̱ka hatak a̱ i̱ sanalit anumpa ik a̱hlo anolit ish atokoli ná.

¹⁷ Chin chuka a bili̱ka hatak in chuka ya̱ ish anushkunna ná: chin chuka a bili̱ka hatak tekchi, micha in tishu, micha in tishu ohoyo, i̱ wak toksʋli, micha im issuba haksobish falaia, micha nana hosh chin chuka a bili̱ka hatak a̱ immi hokma ish anushkunna ná, achi tok.

¹⁸ Mihma okla moma kʋt hiloha, micha hʋshukmʋlli, micha ishtpu̱fa falaia ʋt ola, micha nʋnih hʋt shobulli aiena ka̱ pisa tok; micha okla hʋt pisa mʋt, kanʋllit hopaki ho̱ hieli tok.

¹⁹ Micha Moses a̱, Chishno ak osh ish pim anumpulikma e haklashke; amba Chihowah yʋt ik pim anumpulo kashke, pilli yoba ná, im achi tok.

²⁰ Mihma Moses ʋt okla ha̱, Hʋchi nukshopa ná, hʋchi tikba ya̱ Chitokaka im anukshopa yʋt takali na, ik hʋchi yoshobo ka chi̱ ho̱ imoma ka̱ hʋchi pesʋt ʋla hoke, im achi tok.

²¹ Mihma okla hʋt hopaki ho̱ hieli tok, mihma Moses ʋt okhlili sukko Chitokaka yʋt abinili ka̱ bili̱ka ia tok.

²² Mihma Chihowah yʋt Moses a̱, Yakohmichit Islael im ʋlla ʋhleha ha̱ ish im achashke. Ʋba et a hʋchim anumpule li ak inli ka̱ hʋsh pi̱sa tuk oke.

²³ Sa takla ka̱ tʋli hʋta naholba hʋsh ikba he keyu hoke; micha hʋchimmi a he tʋli lakna naholba hʋsh ikba he keyu hoke.

²⁴ Lukfi yo̱ alta is sʋm ikbi cha, hukmit isht aiokpʋchi, micha iti̱ nanaiyʋchi isht aiokpʋchi, chin chukfi, micha chi̱ wak aiena ka̱ ʋbit ai onochit isht ish ai okpʋchashke, Kanima moma sa hohchifo ha̱ a bohyuli likmʋt hʋchim ʋla likmʋt hʋchi yukpali la hi oke.

²⁵ Tʋli yo̱ alta is sʋm ikba chi̱ hokmʋt tʋli tʋhlahli yo̱ isht ish ikba he keyu hoke; chim ishit tʋhlachi ya̱ ish o̱ wielikmʋt ish litehla chi̱ hokʋt.

²⁶ Micha atuya yo̱ iʋt ʋm alta ya̱ chik ono kashke; yʋmohmi ho̱ o̱ hikiʋt chi shahbi ʋt yʋmmak o̱ ik ahaiako kashke, im achi tok.