Eksotʋs 2 - Chahta Holisso Holitopa 1886

¹ Atuk o̱ Lefai in chuka achʋfa aiachʋfa hatak osh iʋt, Lefai ushetik o̱ ishi tok.

² Atuk o̱ ohoyo hash osh chakali tuk osh, ʋlla nakni yo̱ eshi tok; micha ʋlla achukma ho̱ pisa mʋt, hʋshi tuchina ho̱ luhmi tok.

³ Atuk osh himak ano luhma he keyu mʋt, hashuk holba kishu̱shi yo̱ eshi cha, nashinʋsbi, micha tiak nia aiena ho̱ isht apolusli mʋt ʋlla yash fohki tok; micha okhina lapalika hashuk chaha foka talali tok.

⁴ Mihma kaniohma chi̱ ka̱, akostinincha chi̱ hosh, in tek ʋt hopaki ho̱ hikia tok.

⁵ Atuk o̱ Falaoh ushetik ʋt okhina ya̱ a yupa chi̱ hosh ona tok; mihma in tishu ohoyo ʋhleha hʋt okhina lapalika ya̱ itʋno̱ho̱wa tok; atuk o̱ kishu̱shi yash hashuk chaha fo̱ka ka̱ pisa mʋt, in tishu ohoyo hʋt ont isht ʋla chi̱ ka̱ pila tok.

⁶ Atuk osh wakʋmmi ma, ʋlla yash pisa tok, mihma, yakeh, ʋlla yash osh yaiya tok. Mihma i̱ nukha̱klo tok, micha, Ilʋppʋt Heblu aiachʋfa ʋlla yoke, achi tok.

⁷ Mihma in tek ash osh Falaoh ushetik a̱, Ia lish ʋlla pishechi ʋt Heblu ohoyo hosh chi̱ pishecha chi̱ ka̱, hoyo la chi̱ cho? im achi tok.

⁸ Mihma Falaoh ushetik ʋt, Iá, im achi tok; mihma ohoyo himita yash osh ʋlla yash ishki ak o̱ ont hoyo tok.

⁹ Mihma Falaoh ushetik ʋt, Ʋlla ilʋppa ishtia cha, a̱ pishechi, mikma chim ʋlhtoba ya̱ chima lashke, im achi tok: mihma ohoyo hash osh ʋlla yash ishi cha, pishechi tok.

¹⁰ Atuk osh ʋlla ʋt hofantit taha ma, Falaoh ushetik a̱ isht im ona na, ushi toba tok, mihma hohchifo ha̱ Moses achi tok: micha oka ya̱ halʋllit kohchi li tok okʋt, achi tok.

¹¹ Atuk o̱ nitak yʋmma yakohmi tok, Moses ʋt hofantit taha mʋt, kohchʋt, itibapishi ʋhleha ha̱ im ona cha, nan isht i̱ weki puta ka̱ pisa tok; mihmʋt Echip hatak ʋt itibapishi ʋhleha ha̱ ai achʋfa Heblu yo̱ isso na, pisa tok.

¹² Mihmʋt ilʋppa imma, micha yʋmma imma aiena ka̱ pit hopo̱koyo cha, hatak nana kia iksho, pisa mʋt, Echip hatak a̱ ʋbi cha, shinak anu̱kaka ya̱ a luhmi tok.

¹³ Atuk osh nitak atukla ka̱ kohchʋt ia ma, yakeh, Heblu hatak tuklo kʋt itachowʋt a̱shwa tok; mihma ashʋchi tuk a̱ yʋmmak o̱, Nantihmi ho̱ chishno bi̱ka ya̱ ish isso cho? im achi tok.

¹⁴ Mihma, Kʋta hosh pi̱ shahli, micha na pim apesa chikbi tuk oh cho? Echip hatak ishbi tuk ʋt chohmichit sʋba chi̱ ho̱ ish ahni cho? achi tok. Mihma Moses ʋt nukshopa cha, Nana ilʋppʋt otʋni tuk pullʋshke, achi tok.

¹⁵ Atuk o̱ Falaoh ʋt nana ilʋppa haklo mʋt, Moses a̱ ʋbi bʋnna tok. Yohmi kia Moses ʋt Falaoh itikba ya̱ ʋttʋt maleli cha, Mitian yakni ya̱ ont ʋtta tok, micha kʋli hofobi bili̱ka binili tok.

¹⁶ Atuk o̱ naholitompa isht ʋtta Mitian ʋtta yʋt ushetik untuklo hosh a̱sha tok; atuk osh i̱ki i̱ nanʋlhpoa chipunta ya̱ oka ipeta chi̱ hosh ʋla cha, oka ochit peni puta ka̱ alotoli tok.

¹⁷ Atuk o̱ chukfi apesʋchi ʋhleha hʋt ʋla cha, kanima pit tihleli tok. Yohmi tuk kia Moses ʋt wakayʋt hikia cha, apelʋchit i̱ nanʋlhpoa chipunta ya̱ oka ipeta tok.

¹⁸ Atuk o̱ i̱ki Luel a̱ im ona ma, Nantihmi ho̱ himak nitak ano chekosi hʋsh la cho? achi tok.

¹⁹ Mihma Echip hatak osh chukfi apesʋchi ʋhleha ibbak a̱ apihlakofichi mʋt, ʋlhpesa ho̱ oka ya̱ pim ochi cha, nanʋlhpoa chipunta ya̱ oka ipeta tok, achi tok,

²⁰ Mihma ushetik ʋhleha ha̱, Atuk osh katima anta cho? nantihmi ho̱ hatak a̱ issʋt hʋsh minti tuk oh cho? oh im anoli na, pʋska ik pá, im achi tok.

²¹ Mihma Moses ʋt im ʋlhpesa cha, hatak a̱ takla ahanta tok; mihma ushetik Sippola ya̱ Moses a̱ i̱ bohli tok.

²² Atuk o̱ ʋlla nakni yo̱ im eshi ma, Moses ʋt hohchifo ha̱ Keshom achi tok; okla inla sia hosh yakni inla yo̱ a̱ya li hokʋt, achi ha tok.

²³ Atuk o̱ nitak kaniohmi ma, yakohmi tok. Echip i̱ mi̱ko ʋt illi tok; mihma yuka kak osh Islael im ʋlla ʋhleha hʋt kifa̱ha̱ha cha, ya̱ha̱ya tok; micha yuka kak osh ya̱ha̱ya kʋt Chitokaka ya̱ im ona tok.

²⁴ Mihma kifa̱ha̱ha ka̱ Chitokaka yʋt haklo tok: micha Chitokaka yʋt Eblaham Aisak micha Chekob a̱iena ka̱ nana itim apesa tok ʋt ithana tok.

²⁵ Micha Chitokaka yʋt Islael im ʋlla ʋhleha ha̱ pi̱hi̱sa tok, micha Chitokaka yʋt ithaiyana tok.